Proverbo 21 - Ivatan

¹ Pawnoten no Dios o aktokto no patol a akma so kasonosonong na sia panahanen o danom do ahsong.

² Maparin mo a vatahen o kapia na atavo no pariparinyen mo, pero no Apo taya o makapanmo sia so mahosto o rason no chintokto ta.

³ No kapamarin so mayanong kano ichapia no kadwan am ipaypakamia na ya no Apo taya as kano katoroh ta no sakrifisio sia.

⁴ Makontrolado sa o makagatogatosen no kakey da mato kano marahet a chintokto da as niaya am gatos.

⁵ An kapiahen mo o kapayplano mo am maybastante ka. As an mayapora ka am arava o kapakanawob mo.

⁶ No kaynakman a nahap do dia hosto a paraan am makalo a mabo, amna manam so kabo na nia am tori naranaymo a inangay do kararayawan.

⁷ Ichararayaw da no marahet so parinyen o golo a pasitnanen da. Fermi da sobnahen o mayanong a dia parinyen.

⁸ No mian so gatos am matalineng ava o kaparin no viay na. No abo so gatos am mamarin sa so mapia.

⁹ Mapipia o katda do gagan as kano katda do vahay a yanan no masosolien a kakovot a mavakes.

¹⁰ Fermi da chitahen no marahet so pinangtoktoan o kapamarin da so marahet. Arava o kasi da no kadwan.

¹¹ An kakastigoan o madaay a tawo am aran no dekey so pinangtoktoan am makahap so nanawo. No mapia so pinangtoktoan am mananawo anti do nanawan sia.

¹² No mahosto a Dios o makapanmo so chintokto da no marahet so parinyen as iya o pakayapoan no kararayaw da.

¹³ An ichaskeh mo a adngeyen o tanyis da no makasiasi am an mian anti o kapangaylangan mo am adngeyen kava.

¹⁴ An mian o somoli nimo am no masonong a ipaytanotanoy na am asa ka masekreto a regalo.

¹⁵ An maytotwaw o hostisia am masoyot sa o mapipia a tawo, pero mangsah sa o mararahet so parinyen.

¹⁶ Arava o pangwanan no maskeh a omonot do mayanong an dia no kararayawan.

¹⁷ Ipaypaynakem ava o kapagosto do karakohan do kanen, palek kano kaydamnayan.

¹⁸ Maytadiorong dira do makagatogatosen o pakasisian a ichahoho da parinyen do mapepsek a tawo.

¹⁹ Mapipia o katda do takey as kano kapachichasa do kakovot a mavakes a masosolien as aro so reklamo.

²⁰ Maydamnay sa no kaynakman da o rakoh so pinangtoktoan, pero no abo so pinangtoktoan am makalo na gastohen o kartos na a akma so nakakalo na makahap sia.

²¹ Makapsek ka do kadwan as kapakanamonamo mo tapian manaro o viay mo. Aniven ka anti no kadwan kano kapian da anti mo.

²² No masolib a general am maparin na homisen o asa ka siodad a mahni so gadagada as mapipia so sinjalo.

²³ An makey ka mavawa do problema am makapatak ka do vatavatahen mo.

²⁴ No tawo a oyod a makey a mato am mahambog, madaay as kano arava o kasisien na.

²⁵ No matalakak a maskeh a maytrabaho am no romanes a karakohan na o pakasisien na.

²⁶ Nawri iktokto na o matatarek a ichakey na a mahap a dira, asna no mapia tawo am fermi a manoroh.

²⁷ Ipsok no Apo taya o sakrifisio da no marahet so aktokto a kanatonan na an mian o marahet a intension da.

²⁸ No vahevahey no maydaydadayen am o panganohdan ava, pero nawri o panganohdan o vatahen no mapia a komtokto no vatahen na.

²⁹ Mapanmo no mapia tawo o somnivog na a kaparin, pero no marahet so aktokto am toman sia.

³⁰ No kasolivan kano rakoh a pinangtoktoan no tawo am makapanghomis ava an ilaban so Apo taya.

³¹ Maparin ka mapia so preparasion do gira, pero no Apo taya o tomoroh so kapanghomis.