Proverbo 20 - Ivatan

¹ No manghavas a kaynom am parinyen na o asa ka tawo a dia makapanmo so parinyen na as kaoyod na aro no vahevahey na. Ta no kavook aya am yapo ava do mapia a pinangtoktoan.

² Ichamo mo o patol a akma so kamo mo no somoli a leon. No kapasoli mo sia am akmay kapaypadiman mo.

³ Aran sino o abo so pinangtoktoan am maparin a mapasitnan so kapaydidibati. Oyod a mapia an paypavawan mo ya.

⁴ No maytaketakey a oyod a matalakak a magarado do tiempo no kapaymohamoha am arava anti o yanien na.

⁵ No chintokto no tawo am akmay danom do vito, pero no rakoh so kapanmoan so mapia o tomayid sia.

⁶ Arava o di makavata sia o kaparin na ichasaray, pero tod mo na kapiahen a kapanmohen o somnivog a kaparin no tawo.

⁷ Mapalak sa o kamanganakan an omonot do kakawyoran kano mapia o ama da.

⁸ No patol o tomoroh no hosga. Mapanmo na o marahet.

⁹ Ara paro makavata so kaentero na malinis no tawol na anmana kabo no gatos na?

¹⁰ Isoli no Dios o manerbi so panovolan kano panpang a dia hosto.

¹¹ Mapanmo mo o dadakay no asa ka metdeh do pariparinyen na. Mapanmo mo an mapsek sia kano omonot ya do kakawyoran.

¹² Tinorohan na yaten no Apo taya so mata a panideb kano titidoan a panngey.

¹³ An serbien mo o tiempo mo do kapakaycheh am maypakasiasi ka, as an makapangto ka am bastante o kanen mo.

¹⁴ No manadiw am fermi na vatahen o kaynyen no sadiwen. As an nakarahan ya am ivid na o nakahomis no pinakasadiwan na.

¹⁵ An mapia o kaintindi mo so vatavatahen mo am rakorakoh o balor na nia kano vohawan anmana briliante.

¹⁶ No todakey a omgarantia do pamagan no di na sinchad am mayanong o katoroh na no propidad na a garantia do otang aya.

¹⁷ No nahap mo do marahet a paraan am maparin mo a ichapia do dekey a tiempo akmay kakan so masdep a kanen amna do kwanantisaw am akma kay somnovo so graba.

¹⁸ Adngeyen mo o mapia a konseho tapian mapia o matodah mo. Akma kavay mangay do gira tod a kalo a abo so plano.

¹⁹ Maparin ava mangonong do sekreto o makadab. Paypavawan mo sa o taywara aro so vahevahey.

²⁰ An avayen mo sa o inyapoan mo am akma ka anti relaken a tod awsep do kasarisarian.

²¹ An oyod a masonong o kahap mo so kaynakman mo am oyod pa anti a dekey o inakyan mo nia.

²² Chitahen moava o kaimo no romanes a mamahes do pinarin dimo. Asna no Dios o ichasaray mo, ta iya o mapasonong so atavo.

²³ Ipsok sa no Dios o manerbi so dia hosto a panovolan kano panpang.

²⁴ Makayamot ta no Dios o ompawnot diaten am ango chitan ta so kaintindi ta so atavo a mapaparin.

²⁵ Kapiahen mo a iktokto o manam mo a ipromisa do Dios, ta tarek mo a ipanehseh do kwanasaw.

²⁶ No masolib a manyokoyokod a patol am mapanmo na o namarin so marahet a iya so kastigoan na a abo so kasi na nia.

²⁷ Tinorohan na yaten no Apo taya so aktokto kano konsinsia. Dawa arava o ichaytayo ta do mismo a karakohan ta.

²⁸ Mavidin anti do pwesto na o asa ka patol a mahosto, malinis so gobierno kano mapia do atavo a di mangatatarek.

²⁹ Onor o ayet do kahenakan. No ovan o onor dira do kamangalkeman.

³⁰ An kadwan am kaylangan o kapanahan ta do madaynyen a eksperensia tapian mananawo ta.