Proverbo 2 - Ivatan

No mapia resolta no kasolivan

¹ Manganak, onotan mo o nanawan ko dimo as kadi mo makawayakan do yokoyokoran ko saya nimo.

² Adngeyen mo o mapia a konseho as kapakapia mo sia intindien.

³ Pasivogen mo o kachita mo so kasolivan kano mapia a kapakaintindi.

⁴ Pawyoren mo ya a chitahen a akma so kapawyod mo sia a chitahen o polak anmana no natayo a kaynakman.

⁵ Ta an nia o parinyen mo am mapanmo mo o inmonmoan no kasinchad do Apo taya as kapaypangay no kapanmo mo so komwan do Dios.

⁶ Ta no Apo ta Dios o tomoroh so kasolivan, as yapo pa sia o atavo a kapakaintindi kano kapanmoan so mayanong.

⁷ No Apo taya o tomoroh so sidong kano proteksion do atavo a manamonamo so viay.

⁸ Pachonongan na sa o mapia so kawnot sia as kanira pa no mapia so dadakay do kadwan.

⁹ An onotan mo sia am mian o kasolivan mo a ompidi so mayanong a nawri dana so parinyen mo do kapayengay mo a tawo.

¹⁰ An mian o kasolivan mo am nia o tomoroh dimo so kayayakan mo.

¹¹ No kapakaintindi kano kapanmoan mo so mayanong am tomoroh dimo so proteksion,

¹² as kapavawa na dimo do marahet sa a pariparinyen kano tawo a maychirin so ipaydidiman,

¹³ a sira so tayto dana tomnadichokod do manamonamo a kaparin no viay a omonot dana do viay do kasarisarian no gatos,

¹⁴ a sira pa so makonswelo no kapamarin so marahet kano todango a di mayanong a parinyen.

¹⁵ Maparin sava ya ichasaray kano panganohdan.

¹⁶ No mapia aya a kasolivan o ompavawa pa dimo do malalapos a mavakes a manentasion no vatavatahen da.

¹⁷ Nia sa mavavakes am karoan da sa o kakovot da as katadichokod da pa dia o pinaypromisan da do kapaychakovot da.

¹⁸ Akma ka nay mangwan do kadimanan mo an mangwan ka do yanan da as makavolaw ka pava.

¹⁹ Makapayvidi pa sava o mangay dira ta iyawaw da o rarahan aya no viay.

²⁰ Dawa onotan mo o viay da no mapipia a tawo as kachita mo sia o kapakanamonamo mo so viay.

²¹ Ta sira o manamonamo kano abo so kaparoparoan do viay da am rawaten da o kasoyosoyotan do tana aya.

²² Pero sira o marahet so kaparin a viay am rarayawen sa no Dios a akma so kabotbot so tamek a ipoha.