Proverbo 18 - Ivatan

¹ No tawo a nawri so onotan o ichakey na am makapachisondo ava do kadwan. Fermi na sobnahen o anohdan no kaaroan no tawo.

² Do abo so pinangtoktoan am arava o sinmo no aran ango a kasolivan asna nawri o ichakey na o kavahey na no kayan no mapanmo na.

³ Fermi a mayrayay o kapakagatos kano pakasnekan as an mabo o anib no tawo dimo am no katek nimo o mahap mo.

⁴ No vahevahey no asa ka tawo am maparin a asa ka atboran no kasolivan. Marahem a akmay taaw as manamonamo a akma so danom no atbod.

⁵ Mayanong ava o katagom do nakagatos as kabo no hostisia do abo so sinadan.

⁶ No vahevahey no abo so mapia a pinangtoktoan am pakayapoan no kapaysosobna kano kapaydidiman.

⁷ No vahevahey na nia o mismo a omrarayaw so karakohan na.

⁸ Oyod a makakeakey a adngeyen o kapaychirichirin so marahet do kadwan. Akmay masdep ya kanen.

⁹ No matalakak am kakteh no makeakeyen a mayrarayaw.

¹⁰ Oyod a mahni a pasarayan o Dios. Sira o manamonamo so viay am machipel sa sia.

¹¹ Ichasaray da no may-inakem o kaynakman da a omlibri sira a akma so kaproteksion dia no makarang a gadagada o asa ka kavahayan.

¹² Arava o pamanpandan no kahambog an dia do kararayawan. No mapamahbo am makarawat so onor.

¹³ Dekey o pinangtoktoan no dia manngey as manmanma tombay.

¹⁴ Makangdet ka ta nia o tomoroh so ayet do kaganit mo. An abo ya am nabo dana o akey mo a maviay.

¹⁵ Fermi na chitahen no rakoh so kasolivan o karapa na pa do napanmo na.

¹⁶ Oyod a masonong o kasinchad da dimo no mato a tawo an torohan mo sa so regalo.

¹⁷ Maparin a panganohdan o asa ka testigo katadkan na an mian o machitarek a testigo a omproyba do daday na.

¹⁸ An mian sa o maysobna a dia makapaysondo am mapia an maysoswerte sa ya.

¹⁹ Sidongen mo o kakteh mo as pasolien moava ta akma so kasadit no kasdep do nitahtahan a ayeran o kasadisadit no kapaysondo nio a mirwa.

²⁰ Arava o kadwan a makarawat so resolta no vinatavata mo an dia voken a imo.

²¹ No rida am maparin a tomoroh so viay anmana kararayawan. Dawa makapatak ka do atavo a vatahen mo.

²² Mapalak o mahakay a nakavoya so kakovoten na. Ta no kakovot naya am bendision sia no Dios.

²³ An mangahes o makasiasi am machisiasi, pero no maynakem am oyod a malotod a tombay.

²⁴ Mian sa o toman a kayvan as mian sa o somnivog a kayvan a akma mo nay kakteh.