Proverbo 16 - Ivatan

¹ Maparin ta mayplano, pero mian do Apo taya o kapakatongtong na.

² Maparin mo a vatahen do aktokto mo o kapayanong no atavo a parinyen mo, pero no Apo taya o makapanmo so somnivog a mian do aktokto mo.

³ Akdawen mo o kabendision dimo no Apo taya do plano mo sa tapian mapatongtong o ichahoho mo.

⁴ Atavo a pinarin no Apo taya am mian o pamandan na. No pamandan da no omonot sa do marahet am kararayawan.

⁵ Isoli no Apo ta o mato so iyangay. Maynyoha ava o kastigo da nia.

⁶ Ichaddaw mo o Dios tapian kapakaboan ka. Sincharan mo o Apo taya tapian mavawa ka do marahet.

⁷ An pakamiahen mo o Apo taya am aran sira o kakontran mo am mayvadiw sa a kaychayvan mo.

⁸ Mapipia o dekey a naho do malinis a paraan as kano rakoh a kartos a yapo do matayo a paraan.

⁹ Imo o mayplano, pero no Dios o mapawnot dimo do mismo logar mo a parinyen.

¹⁰ No patol am tinorohan no Dios so ipakapamarin na as no vatahen na o kawnotan.

¹¹ Ichahoho no Dios o mahosto a panovolan kano panpang do kapaydakaw.

¹² Maparin ava kanonolay no asa ka patol o marahet, takwan no hostisia o omparin sia mahni a maytetnek o asa ka gobierno.

¹³ Ichahoho no patol a madngey o kakawyoran as nawri sa ipakamia na o mapavata so kakawyoran.

¹⁴ No masolib a tawo am chitahen na pakamiahen o patol, ta an somoli o patol am maparin a mayinmonmoan ya so kadimanan.

¹⁵ No fabor no asa ka patol am akmay asa ka demdem a tomoroh so timoy a viay no mohamoha.

¹⁶ Oyod a rakoh o ichapipia no kayan no kasolivan a mangtokto kano kayan no vohawan kano polak.

¹⁷ Mayam sa o mapsek a tawo do panahanan a maypavawa do marahet. Dawa katiban mo o pangwanan mo tapian librien mo o karakohan mo.

¹⁸ Arava o pangwanan no kahambog an dia no pakasnekan kano kararayawan.

¹⁹ Mapipia o kavidin a mahbo a makasiasi as kano kahambog kano kapachinatay do tinakaw a kaynakman.

²⁰ Kapiahen mo a intindien o nanawo dimo tapian matodah mo o ichakey mo. Pangayen mo do Apo taya o saray mo tapian mian o somnivog a kasoyosoyotan mo.

²¹ No masolib as somnivog a mapia a tawo am mavahey sia do rakoh a kapanmoan na so mayanong. Ta do matanoy a vahevahey na am masonong a panganohdan o vatahen na.

²² No kasolivan am akmay atboran a tomoroh so viay no mian so pinangtoktoan, pero kastigo o aspangan da no abo so pinangtoktoan.

²³ Mapia o kaktokto no mian so pinangtoktoan a manam so kapayliliak na. As an mayliliak ya am masonong a panganohdan o vatahen na.

²⁴ No matanoy a vahevahey am mawnawnas a adngeyen as mapagsal so viay.

²⁵ Maparin a panahanan a mangwan do kararayawan o tori mo a hahawen a mapia.

²⁶ Mapawyod o tawo a maytrabaho a makayamot do kanen. Maytrabaho sia tapian di sia mapteng.

²⁷ Fermi da chitahen no omonot sa do marahet o icharahet no kadwan. Aran no chirin da am akmay apoy a mayrarayaw.

²⁸ No marahet so chintokto am maytokos so inanahet. Mapasitnan sa ya so kapaydidiman kano manrarayaw sa ya so mapia a kayvayvan.

²⁹ Sira o magogolohen am lokohen da sa o mismo da kayvan as kapawnot da sira do kararayawan.

³⁰ Makapatak ka dira do maraway so kayak kano katidib dimo, ta tarek a mian o naktokto da dimo a marahet.

³¹ No manaro a viay am asa ka primio dira do mapia so dadakay. No ovan am asa ka onor a akmay korona do oho.

³² Mapipia o karakoh no pasinsia mo as kano karakoh no ipakapamarin mo. Mapipia o kayan no kontrolado mo so karakohan mo as kano kayan no ipakapamarin mo a omkontrolado so kavahayan sa.

³³ Akmay machisoswerte o makey a makapanmo so inolay no Dios sia, pero mian do Dios o kapesek na sia.