Proverbo 15 - Ivatan

¹ No matanoy a katbay am mapabo so soli, pero no mapasoli a atbay am atongan na o soli.

² Makakeakey o kasolivan an pavatahen ya no rakoh so pinangtoktoan, pero no vivi da no abo so pinangtoktoan am akmay atboran no abo so sinmo a vahevahey.

³ Arava o di na voya no Apo taya, mayalit o parinyen a mapia anmana marahet.

⁴ Mapagsal o matanoy a vahevahey, pero no malotod a chirichirin am manrawarawa.

⁵ Rakoh o kapaychawaw no tomadichokod do nanawo no ama na pero oyod a mapia o karisibi no kapaynananawo na dimo.

⁶ Mavidin o kaynakman da no manamonamo so kaparin, pero mabo o kaynakman da no omonot do marahet do tiempo a kaoyod da maykaylangan sia.

⁷ No kasolivan am mapanmo no kadwan do viay da no mapia so pinangtoktoan asna dira ava do abo so pinangtoktoan.

⁸ Ipakamia no Apo taya o dasal da no mapipia a tawo, pero ipsok na o aran sakrifisio da no makagatogatosen.

⁹ Ipsok no Apo taya o pariparinyen da no makagatogatosen, pero ichaddaw na sa o omparin so mapia kano mayanong.

¹⁰ Sigorado o kastigo no mamarin so marahet. Sigorado o kararayawan no maskeh a paynananawhen.

¹¹ Mapanmo no Apo taya o aran no mian do logar da no nadiman as maypango kayan no ichaytayo sia a chintokto no tawo.

¹² Makey ava paynananawhen o mahambog. Mangahes sava ya so konseho dira do rakorakoh so kapanmoan so mapia.

¹³ Mayak sa o mian so ichasoyot, pero an mian o ichangsah am machitarek o katitiban da.

¹⁴ Fermi pa sa makey a nanawhen o rakoh so pinangtoktoan, pero makamia dana sa a ignorante o abo so pinangtoktoan.

¹⁵ No viay no makasiasi am fermi a kalijalijatan, pero no abo so ichalijat am masaray sa kararaw.

¹⁶ Mapipia o kapakasiasi a sominchad do Apo taya as kano kaynakem a mian so kagologoloan.

¹⁷ Mapipia o kakan so aran karinakan na a machirayay dira do maddaw nimo as kano kapaychan mo so karne a machakan dira do somoli nimo.

¹⁸ No kasosolien am sitnanan no kapaysosobna, pero tomoroh so karadinepan o matanoy kano maypasinsia.

¹⁹ An matalakak ka am arava o kaboan no problema mo, pero an manamonamo o viay mo am arava o problema mo.

²⁰ No anak a mian so pinangtoktoan am tomoroh so kasoyosoyotan do ama na. Voyvoh o abo so pinangtoktoan o omparo so ina na.

²¹ Nawri ichakonswelo da no abo so pinangtoktoan o kabo no kasolivan da, pero no mapia so pinangtoktoan am fermi na chitahen o mayanong a parinyen na.

²² Hapen mo o atavo a konseho dimo tapian maypapia ka do ichahoho mo, ta do kaboan no konseho am sigorado o kapayrahet mo.

²³ Oyod a mapia o kasolib mo a omserbi so machinaho a chirin do mayanong a serbian sia.

²⁴ No rakoh so pinangtoktoan am mayam do rarahan a mangwan do viay asna no mangwan ava do kararayawan.

²⁵ Rarayawen no Apo taya o katdan da no mato so iyangay, pero ipachidiman sa no Apo taya o makasiasi a bioda.

²⁶ Isoli no Apo taya o marahet a chintokto, pero oyod na ipakamia o matanoy a ichichirin.

²⁷ An makey ka mayganansia do marahet a paraan am tomoroh ka so problema do familia mo. Manrisibi kava so lagay tapian mayendes o viay mo.

²⁸ No mapia tawo am mapatak a tombay, pero no marahet so pinangtoktoan am malisto a mayliliak a nia so mapasitnan so problema.

²⁹ Adngeyen no Dios o dasal da no mapia so kaparin, pero sikasohen na sava o dia omonot do mapia.

³⁰ Ichasoyot mo o kayayak da no kadwan as kagsal mo no mapia a balita.

³¹ An adngeyen mo o paynananawan dimo am rakoh o pinangtoktoan mo.

³² An maskeh ka paynananawhen am no mismo mo a karakohan o rarayawen mo, pero an risibien mo o kapaynananawo dimo am maypangay pa o kapanmoan mo so mayanong.

³³ No anib kano kasinchad do Apo taya am mismo dana ya a kapanghap so kasolivan, ta manam so kaparin mo a makarisibi so onor am kaylangan o kapamahbo mo so karakohan mo.