Marcos 4 - Ivatan

No parabola no tinokos

¹ As somnitnan si Jesus a mananawo do kanayan. As do kaoyod da aro no nakpeh a omdivon sia am somnakay do asa ka tataya as kapaydisna na as sira o tawotawo sirawri am navidin sa do kanayan awri.

² As nanerbi so parabola do matatarek a nanawo a pinawnonong na dira as kavata na sia,

³ “Adngeyen nio ya. Mian o asa ka tawo a nangay a manokos.

⁴ As do tinokos naya am mian o nangay do pananahanan a nia so chinan da no manomanok.

⁵ Mian sa o nagagtos do kabatoan a nia so nakalo a tomovo,

⁶ amna do kakohat no araw am nahayo sa takwan nakayamot sava ya so mapia.

⁷ Mian sa o nangay do kamanolokan a nia so nakalo a madiman do kahonghong dira no pachisohotan dawri as nakasi sava.

⁸ Amna mian sa o natokos do mapia a tana a nia sa so tomnovo kano minsi so mavid. Mian sa o nakasi so tatdo a poho, mian sa o anem a poho as kano yatoyatosen.”

⁹ Do pinakavosan sia ni Jesus am vinata na, “Kapiahen nio o kapanngey nio kano kaintindi nio sia.”

No inmonmoan no parabola no tinokos

¹⁰ Do kasirasiran darana kanira no disipolos na sawri kano kadwan sa a omonot sia am inahes da sia o inmonmoan no parabola naya.

¹¹ Vatan na sia dira, “Mapia kamo ta ipapanmo dinio o komapet do paypatolan no Dios asna dira do kadwan am panerbian sa so parabola,

¹² tapian di da voya o tori da tiban as kadi da makaintindian so madngey da, ta tarek sa manehseh as kapakabo do gatos da.”

¹³ Vatan na sia dira, “Ara nio paroava maintindi o akmaya sia a parabola? An di nio maintindi am maypango o kapanmo nio so inmonmoan no parabola ko sa kadwan.

¹⁴ Niaya o inmonmoan no parabola aya. No nanokos aya am no mapawnonong so Chirin no Dios.

¹⁵ No natokos sawri do panahanan am irepresenta na sa o makadngey so Chirin no Dios. As do kadngey da sia am nyeng a mawara si Satanas a ompakaro sia dira.

¹⁶ No nangay awri do kabatoan am irepresenta na sa o masoyot a omrisibi so Chirin aya,

¹⁷ pero nakatneb ava ya dira so mapia as do kawara no pakasisian kano katetek dira a makayamot do onotan daya am masonong daya tadichokoran.

¹⁸ As no nangay sawri do kamanolokan am irepresenta na sa o omrisibi so nanawo aya,

¹⁹ amna makayamot do matatarek a ichalijat da kano kahoho da no kaynakman kano kadwan pa a dira da am katavonan o saray daya as kadi darana makatovoan.

²⁰ As no natokos do mapia a tana am irepresenta na o manngey so nanawo aya as kapia no karisibi da sia as kapakatovo da nia a mian so kavoyan sia dira a akma so kapakasi no nimoha aya so tatdo a poho, anem a poho anmana yatoyatosen.”

No parabola no relaken

²¹ Vatan na pa sia, “Pangayen paro o relaken do kawlivan na anmana do ahbo no kama as kadi pangayan sia do pakavoyan nia?

²² As arava o tayotayohen a di anti maytotwaw as no atavo a sekreto am mapanmo anti.

²³ Kapiahen nio o kapanngey nio kano kaintindi nio sia.

²⁴ “Makapatak kamo do kaparin no kapanngey nio. No adpang no itoroh nio am nawri pa o adpang no marawat nio as karapa pa anti dia o marawat nio.

²⁵ Takwan an sino o manngey as kapanganohed na am mayparakoh o nanawan sia asna sira o dia manngey as kadi da manganohdan am pakarohen pa o ichapatak da.”

No parabola no tomnovo a votoh a komparahen do paypatolan no Dios

²⁶ Vinata na pa, “No paypatolan no Dios am akma so asa ka tawo a nanokos.

²⁷ Do nakatayoka na manokos am komnaro as kanolay na sia tomovo as tomnovo as kapaypalovo na amna mapanmo nava an maypango ya.

²⁸ No tana aya o pakayapoan no yanien, ta tomovo o mohamoha as kayan no kekepen na as kayan dana no asi na.

²⁹ As an matwa dana am yanien ya do tiempo no kapanyani.”

No parabola no dekey a votoh

³⁰ Vinata na dira, “Ango paro maparin a pakomparan sia o paypatolan no Dios. Anmana ango paro parabola a serbien ta a palialitan ta sia ya.

³¹ Maparin ya pakomparahen do asa ka dekey a votoh a nimoha do tana aya.

³² Dekey ya amna an tomovo am mayrakorakoh ya a kayo a angayan da no manomanok as kapamarin da dia so otioyan da do yangaw na sa.”

³³ As aro pa o pinawnonong na dira a pinanahan na do parabola a manda do kaparin da a makaintindi so inmonmoan da nia.

³⁴ Fermi parabola o serbien na dira do kaaroan no tawo asna dira do disipolos na am niexplika na o atavo so kapiahen.

No milagro ni Jesus do kabkasan

³⁵ Do mahep no araw awri kanaw am vinata na dira do disipolos na sawri o kapayatovang da.

³⁶ As chinaroan da sawri o aro a tawo as kapachivan da sia do falowa as mian pa sa o aro a falowa a nachivan dira.

³⁷ Amna narahet o kawan as kapaybebkas na as no sakayan daya am angayan dana no danom,

³⁸ amna tori si Jesus a makaycheh do hangnan do mawdi no falowa awri. Niyokay da as kavata da sia dia, “Maistro, madiman ta!”

³⁹ Nayokay as kamando na dia o salawsaw as kavata na sia do taaw, “Maypadinak ka na,” as nanyeng dana a mangheteng as kapaypadinak na.

⁴⁰ Vatan na sia dira, “Ango ichamo nio. Ara paroava o saray nio?”

⁴¹ Oyod sa naychaknin as kavata da sia do kadwan dira, “Sino paro ya ta aran no salawsaw kano abkas am anohdan da!”