Marcos 3 - Ivatan

No maychalekalen so tanoro a tinovatova ni Jesus

¹ As do nakapirwa na somdep do sinagoga am mian dawri o tawo a maychalekalen so tanoro as kadi na makalanetan sia.

² As niobservan da sia an tovatovahen na sia do araw aya no kapaynaynehah tapian maparin da sia a parahten.

³ Vinata na do mahakay aya a maychalekalen so tanoro, “Mangay ka dia.”

⁴ Vatan na sia dira, “No siyo paro mayanong a parinyen do araw no kapaynaynehah. No kapanidong anmana no kapakasiasi so kadwan. No kalibri anmana no kararayaw so viay no asa ka tawo.” Amna tominbay sava.

⁵ Tiban na dira atavo ni Jesus a mangsah kano maket no makehnet ori a kaparin no tawol da. Vinata na do mahakay awri, “Laneten mo o tanoro moaya.” As kalanet na sia am nanyeng dana a mapia.

⁶ Minehbet sa o Fariseo sawri a machipanmo dira do machangay di Herodes an maypango o kahapan da si Jesus a dimanen.

No aro sa tawo a minonot di Jesus

⁷ Amna naypangwan si Jesus do taaw kanira no disipolos na sawri as inonotan da sa no oyod a aro tawo a yapo do kavahayan no Galilea as kano Judea,

⁸ do Jerusalem kano kavahayan no Idumea as kan do taypangay no Jordan kan do Tiro kan Sidon do nakadngey da sia o pinariparin na sawri.

⁹ As vinata na do disipolos na sawri o kapayprepara da so tataya a sakayan na tapian di da sia lalasen no maysisidin aya tawotawo.

¹⁰ Ta do nakaaro no tinovatova na am aro pa sa o maganit a makey a maypasngen a tomodo sia.

¹¹ As do nakavoya da sia no mararahet a espirito am domnogod sa do salapan na as kapangyaw da nia, “Imo o Manganak no Dios.”

¹² Amna niyokoyokod na sa do kadi da a mapapanmoan nia.

No dose a pinidi ni Jesus a apostoles na

¹³ Kwanasaw am nangay do asa ka tokon as katawag na dira do chinakey na sa a mangay sia.

¹⁴ As namidi so dose a machivan sia kano tovoyen na a mananawo,

¹⁵ as tinorohan na sa so ipakapamarin da a mapahbet so mararahet a espirito.

¹⁶ As no pinidi na saya am sa Simon a ningaranan na pa so Pedro,

¹⁷ si Santiago a anak ni Zebedeo kani Juan a kakteh ni Santiago a ningaranan na pa so Boanerges a mayinmonmoan so anak sa no adey,

¹⁸ si Andres, si Felipe, si Bartolome, si Mateo, si Tomas kani Santiago a anak ni Alfeo, si Tadeo kani Simon a yapo do Canaan,

¹⁹ as kani Judas Iscariote a iya so mintraydor di Jesus do kwanasaw.

Si Jesus as kani Beelzebul

²⁰ As kwanasaw am nangay si Jesus do asa ka vahay. As nakpeh sa mirwa o aro a tawo as kadi da makakanan da Jesus kanira no rarayay na sawri do karoaro dawri.

²¹ Do nakadngey da sia no familia na am inangay da tawagan a makayamot do nakavata da sia no tawotawo o nakapangbo na so nakem.

²² As vinata da no eskriba a yapo do Jerusalem, “Mian dia si Beelzebul as makapakaro so marahet a espirito a makayamot do kayan dia no apohen da no demonio.”

²³ Asna tinawagan na sira a mangay sia as kavata na sia dira do asa ka parabola, “Maypango o kapakaro na sia ni Satanas si Satanas.

²⁴ As no paypatolan a sirasira so maylalaban am maypakaha

²⁵ a akma so kararayaw no asa ka familia a di maysosondo.

²⁶ As an si Satanas as labanen na sa o rarayay na am maypango kapaytetnek no ipakapamarin na.

²⁷ Ta an mian o makapamarin a tawo a mian so mapia a gwardia do vahay am arava o ichavakel na amna an mawara o rakorakoh pa kania so ipakapamarin a somdep sia as kahap na so armas do gwardia aya am arava o mapaparin na as mahap o warawara na.

²⁸ “Kakawyoran na sia, ta no atavo a gatos no tawo kano kapakachirichirin so machikontra do Dios am maparin a kapakaboan,

²⁹ katadkan no kapakachirichirin so machikontra do Masanto a Espirito, ta kapakaboan ava ya a abo so pandan.”

³⁰ Vinata na ya do nakavata da sia o kayan sia no marahet a espirito.

No somnivog a ina kano kakakteh sa ni Jesus

³¹ As nawara o ina na kanira no kakakteh na sa dawri as kapaytovoy da so tomawag di Jesus.

³² As vinata da no maychadisdisna sawri a aro a tawo do omdivon ori sia, “Tayto sa do gagan sa ina mo kanira no kakakteh mo a komita dimo.”

³³ Amna tinbay na sira, “Sino o ina ko as sango o kakakteh ko,”

³⁴ as katidib na dira do omdivon ori sia a maydisna as kavata na sia, “Niaya sa o ina ko kanira no kakakteh ko.

³⁵ Ta an sino o omparin so inolay no Ama ko am sira o somnivog a kakakteh ko as kano ina ko.”