Lucas 12 - Ivatan

¹ Do kapaysisidin da no livolivohen a makpekpeh sia am vinata na dira do disipolos na saya, “Makapatak kamo dira do toman saya a Fariseo ta akma sayay libadora.

² Arava o tayotayohen a di anti maytotwaw ta atavo a sekreto am mapanmo do kwanasaw.

³ Dawa no pinavata sa do kasarisarian am ipapanmo anti so masehdang as no inakaak am ipangyaw anti do kadngeyan sia no atavo.

Voyvoh o Dios a logar a ichamo

⁴ “Kaychayvan, vatahen ko dinio o kadi nio mamoan nira no maparin a omdiman so karakohan nio ta nawri o pamandan no maparin da dinio.

⁵ Asna nawri ipatanggal ko dinio o makaparin aya mapayrapas sia o karakohan as kano pahad a rarayawen do infierno. Nia o ichamo nio as kano katanggalen nio.

⁶ No Dios am kawayakan navaynio ta aran sira o dedekey a manomanok a oyod a dekey so balor am manakem pa sa no Dios.

⁷ Dawa mavakel kamoava ta rakorakoh o balor nio kano manomanok saya. Aran no vidang no book nio am mapanmo na.

No kadi machisnekan ni Cristo kano makavata so machikontra do Masanto a Espirito

⁸ “An sino o di machisnek niaken am ipachisnek ava anti sia no Naytawo aya do salapan da no angheles no Dios.

⁹ Asna an sino machisobna diaken am ipachisobna ko pa anti o kasinchad ko sia dira do angheles no Dios.

¹⁰ No tawo a makachirichirin so machikontra do Naytawo aya am maparin pa kapakaboan asna no makachirichirin so machikontra do Masanto a Espirito am kapakaboan ava.

¹¹ “An iyangay daynio isalap do sinagoga sa as kan do hosgado kanira no makapamarin a makayamot do kawnot nio diaken am ichavakel nioava an ango atbay nio kano vatahen nio.

¹² Ta pawnoten naynio no Masanto aya Espirito do oras anti a kalogar nio a mayliliak.”

No rahet no kapayagom

¹³ Mian o asa dira do tawotawo saya a nakavata sia di Jesus, “Maistro, iyokoyokod mo pa o kakteh koaya do kapayatay so inamohon namen do naama namen ori.”

¹⁴ Vatan sia ni Jesus, “Ara paro tomnongdo diaken a mapayatay sia ya dinio?”

¹⁵ Vatan na pa sia, “Makapatak kamo a di mayagom takwan nawri ava o adpang no viay no asa ka tawo o kaynakman na.”

¹⁶ Pinawnonong na pa o akmaya sia a parabola. “Mian o maynakem a tawo a oyod a navid so nayani do takey na.

¹⁷ Niktokto na an ango mayanong na parinyen do kapaykolang no bodega na a onongan na so nayani naya.

¹⁸ Vatan na sia, ‘Rarayawen ko sawen o nanma ko saya bodega as katadi ko dia no rarakoh a pakakayanan dana no niyani koaya kano kadwan a warawara ko,

¹⁹ as kavata ko anti sia do karakohan ko, “Makaydamnay ka na as katod mo na nganakanan kano ominoynoman as kayayak mo, ta bastante dana manawob do awawanen o kaynakman moaya.”’

²⁰ Amna vinata sia no Dios, ‘Imo a nahara so nakapaychawaw, do sichamahep am madiman ka as sango anti do vata mo ngayan no pinay-iras moaya.’

²¹ Nia o kaparin no mapay-iras so kaynakman do tana aya as kabo no mapia a maparin na isalap do Dios.”

No logar sa panmahen a chitahen do viay ta

²² Vatan na sia dira do disipolos na sawri, “Nia o pakayapoan no nakavata ko sia o kadi nio mavaklan no viay nio do tana aya. Ichavakel nioava o kanen nio anmana onayen nio.

²³ Ta no kaviay aya am no kakan ava. As no mangonay am rakorakoh o sinmo na kano onayen na.

²⁴ Tiban nio pa kono sa o manomanok. Maymoha sava as manyani sava. Arava o bodega da amna pakanen saya no Dios as chapanngo no katidib na dinio a rakorakoh so balor?

²⁵ As kano ara paro kabdibdisan sia no asa ka tawo o pamandan no viay na do kapayvavakel na nia?

²⁶ An di nio parin ya am ango paro pa o sinmo no kapayvavakel no tomaydedekey saya do viay.

²⁷ Tiban nio sa o vonyitan. Maytrabaho sava as kano mamarin sava so lamit, amna vatahen ko dinio ta aran si Solomon a oyod a maynakem am nangonay ava so maviavid so katitiban kanira.

²⁸ An sikasohen pa no Dios o dibobot a nia so maviay pa sicharaw as sosohan do ichadadwa na karaw am chapanngo no kasikaso na dinio a torohan so onayen nio, inioaya a dedekey so saray?

²⁹ Nawri ava o ipayvavakel nio o kapaychitachita nio so kanen, inomen kano ichaviay nio.

³⁰ Nia o kaparin da no dia saray no Dios asna machitarek kamo takwan no Ama nio do hanyit am sikasohen na o pangaylanganan nio sa.

³¹ Chitahen nio o komwan do paypatolan no Dios as no nesisita nio saya am itoroh na sa anti atavo.

³² “Mavakel kamoava a aran mayhahaw kamo, ta inio o parawatan sia no Dios Ama o kapaypatol na.

³³ Idakaw nio o miniminyan nio as kapanoroh nio nia dira do makasiasi. Mapay-iras kamo so kaynakman do hanyit a nia sa so di mangopas kano di yadan kano di ameken as dia parin a takawen.

³⁴ Ta an dino o yanan no kaynakman nio am dawri a mismo o yanan no aktokto nio.

No kapananggal do ito a kapayvidi ni Jesus

³⁵ “Fermi kamo a preparado as kavidin nio a mapasehdang so relaken nio,

³⁶ a akma sira so pachirawatan a ompanaya so apo da a yapo do ponsion tapian nyeng da sia ipanyiwang as serbian.

³⁷ Mapalak sa anti a tori a preparado do kawara na. Vatahen ko ta no apohen daya anti am padisnahen na sa anti as kapayserbi na dira.

³⁸ Mapalak sa o adasan a preparado a aran do kamavak do mahep anmana do kamalatiat.

³⁹ Kapanmohen nio ta an mapanmo no tayvahay an mango o kawara no manakaw am mavidin a mayokay a omgwardia do vahay na tapian diasdep.

⁴⁰ Dawa makaprepara kamo, ta do oras a di nio a ahahawen am mawara o Naytawo aya.”

⁴¹ Ahsan sia ni Pedro, “Apo, tayto mo pawnonongen o parabola diamen atavo?”

⁴² Amna vatan sia ni Jesus, “Niaya o kaparin no asa ka masolib kano ichasaray no apohen a pachirawatan. Iya o painkargadoan na sia o kanen da no rarayay na sa a pachirawatan.

⁴³ Mapalak anti ya do kawara no apohen na an mavidin na patongtongen so mahosto o anongen naya.

⁴⁴ Vatahen ko dinio ta ichasaray na anti ya do atavo a miniminyan na.

⁴⁵ Asna an no asa ka pachirawatan as vatahen na do karakohan na, ‘Kapayvidi na pava no apohen koaya daw,’ as kasitnan na maysarasaray do rarayay na a pachirawatan as kapaynolay na so kakan na kano kapaydidinyat na,

⁴⁶ am do kawara anti no apohen na do di na tanggal a oras am kastigoan na anti sia as kapagropo na sia dira do di sawri parin a ichasaray a pachirawatan.

⁴⁷ Mahara anti o kastigo no pachirawatan a dia nananggal kano di minarin so logar na parinyen a tori na mapanmo so hosto,

⁴⁸ asna no kapalit na anti so pinarin asna dia nakapanmo so logar na parinyen am kakastigoan pa anti ya, pero mapapaw anti o marawat na a kastigo, takwan rakoh o akdawen dira do rakoh so narawat, ta nia o katnayan a parinyen na.

Si Jesus o sitnanan no kasisiay

⁴⁹ “Nawara ako a manangay so apoy do mondo aya as no ichakey ko am no kaninyas narana.

⁵⁰ Tayto o natongdo a payparahanan ko as mavidin ko ichalijat a manda do kakavos na nia.

⁵¹ Vatahen nioava o nakawara ko a tomoroh so mapia anod, ta no kakawyoran na am nawara ako a manangay so pakayapoan no kasisiay.

⁵² Do sinahad no asa ka vahay am mian sa anti o dadwa a maskeh no onotan da no tatdo.

⁵³ Masisiay anti o tawo. Mian anti o ama a omlaban so manganak na as alit pa no manganak aya. Mian anti o ina a omlaban so anak na mavakes anmana asa ka anaken a mavakes do inyapoan no kakovot na.”

⁵⁴ Vatan na pa sia, “An mavoya nio o kayan no demdem do mankadpidan na am vatahen nio o kaito no timoy as mawara o timoy.

⁵⁵ An yapo o salawsaw do sur am vatahen nio o kaito no kohat as mawara o kohat aya.

⁵⁶ Inio a toman masolib a makatoroh so inmonmoan no demdem as kadi nio makapanmoan so tiempo aya sichangoriaw,

⁵⁷ ango paro di nio makapanmoan so mayanong nio a parinyen.

⁵⁸ An mavayat mo o tawo a pinakagatosan mo am machipanmo ka sia as kaareglo mo so kaso moaya a manam so kapahosgado na nimo as kagorogod da dimo a iyangay a kalabosohen.

⁵⁹ Vatahen ko ta an di ka nakapaga do atavo a gatos mo am makavolaw kava.”