Hebreo 2 - Ivatan

No makakniknin aya a kalibrian ta

¹ Dawa mayanong o kapakapia ta sia naknakmen kano onotan o nadngey taya a nanawo tapian di ta sa kawayakan,

² ta an no pinarawat daya no angheles a onotan as sincharan do kakastigo dira do mapasada sia,

³ am maypango o kaparin ta a makavolaw do kastigo an tadichokoran ta o oyod aya makakniknin a kalibrian a nia so tayto a pinapanmo a mismo no Apo taya as nia pa o tayto a pinawnonong diaten no mismo sa a nakadngey sia kano nakatestigo do akmaya sia.

⁴ As sira o napatoyo aya sia am pinasinchad sa no Dios a sivog a pachirawatan na do nakatoroh na dira so ipakapamarin a maymilagro as kayan pa no narawat da a matatarek a kasolivan a mayserbi a yapo do Masanto a Espirito a nia so omononot do pinidi no Dios a parawaten dira.

No mamanito dana kano atavo

⁵ No paypatolan do manam aya tiempo am arava tinongdo a paypatolan da no angheles,

⁶ asna tawotawo o pinidi no Dios a manyokoyokod takwan niaya o nakatolas, “Ango paro o tawo a dawa mo a manakem kano isanga.

⁷ Pinarin mo o tawo a mahohbo kanira no angheles do maynyed a tiempo amna tayto mo na sa tinorohan so anohed kano onor

⁸ do nakatayto mo mapanayahbo so atavo a inamaog mo do ipakapamarin no tawo,” as aran tayto pa di makapaynolay o tawo do atavo a inamaog am ito o araw aya a kapakatongtong no kapamanito no tawo do atavo a inamaog.

⁹ No akmaya sia a kaparin no tawo am mavoya ta a pinayparahanan ni Jesus a iya so naytawo as nayvadiw a mahohbo kanira no angheles do dekey a tiempo as kwanasaw am nakarawat so mato kano makakniknin a onor takwan nangay a tomoroh no viay na a omadidi so tawo a makayamot do grasia no Dios.

¹⁰ Ta navoya no nangamaog kano makapamarin a Dios, ta mayanong o kapayparahan na do mahara a pandidiwan no Apohen aya no nalibri a si Jesus tapian aro sa o mayvadiw a kamanganakan no Dios a mangay anti a machasa sia do paypatolan na.

¹¹ Dawa yaten a pinayvadiw a manamonamo as kamanganakan no Dios as kano naytawo aya a omadidi diaten am malit ta a tomawag do Dios a Ama ta, dawa ipachisnek nava yaten a tawagan ni Jesus a kakakteh na.

¹² Niaya o kavoyan ta so akmaya sia do nakavata na sia do Dios Ama o, “Pawnonongen ko anti o ngaran moaya dira do kakakteh ko sa as do panghovokan da am dadayen kano pamatohen koymo.”

¹³ Mian pa o vatahen na a akma sa sia, “No Dios anti o ichasaray ko,” kan, “Tayto ako dia a machividang dira do kamanganakan saya no Dios a nia sa so pinawnot na a manganohed diaken.”

¹⁴ Dawa makayamot ta tawotawo o payvadiwen saya no Dios a kamanganakan na am naytawo si Jesus a mangay a tomoroh no viay na tapian torohan na o tawo so kalibrian do ipakapamarin no kadimanan anmana si Satanas,

¹⁵ as kapakaro na so kamo aya no kadimanan a nia so mapakovot so atavo a tawo mintras maviay,

¹⁶ ta mapanmo ta o kadi na siran no angheles no inangay na sidongen, ta yaten a tawo a tayatayabo ni Abraham.

¹⁷ Naytawo si Jesus a akma diaten tapian payparahanan na o atavo a payparahanan no tawo tapian do diaya am maypapia o kaintindi kano kapachipandidiw na niaten do kaiya no machipangdaw as machitbay niaten do Dios do sinadasadan ta a iya so Mato a Pali.

¹⁸ Dawa makayamot do nakapayparahan na kano nakadidiw na so kahawahaway sia am mapanmo na o mapía dana a sidong a itoroh do tawo a tentasionan.