Efeso 3 - Ivatan

No ministerio ni Pablo dira do Hentil

¹ Dawa makayamot dia am mavidin koynio a ipachahoahok aran akma sawri o katayto ko a makalaboso a makayamot do kapayserbi ko di Jesu Cristo a nia so ichapia nio.

² As do ahahawen ko am ari nio na mapanmo o nakapainkargado na nia no Dios diaken o trabaho aya a kapawnonong so grasia naya dinio,

³ a niaya so pinapanmo na diaken akma so tayto ko a ipapanmo dinio do maynyed aya a tolas ko

⁴ a dia pa so kapanmoan nio sia o kaintindian ko so nanawo aya a komapet di Cristo,

⁵ a nia so dia pinapanmo dira do nanma a tawo amna tayto dana pinapanmo no Espirito dira do apostoles kanira no profeta.

⁶ Niaya o nanawo no kapaychakasa no Israelita kano Hentil a makarisibi so nipromisa sa no Dios a makayamot di Jesu Cristo do nakadngey da so Evanghelio aya.

⁷ Makayamot do ipakapamarin no Dios am tinorohan na yaken so rakoh a privilihio a pachirawatan na a makayamot do grasia na a mapawnonong so Evanghelio aya.

⁸ Aran akma sawri o kayan da no mapipia kaniaken a tawotawo na am pinarawat na diaken o anohed a mapawnonong sia dira do Hentil o di aya machipanda a sidong kano kasisien ni Cristo,

⁹ as kapavoya ko nia do atavo a tawo o plano aya no Nangamaog a Dios a dia pinapanmo do nakarahan a tiempo,

¹⁰ tapian no makakniknin aya a kasolivan no Dios a mavoya dira do nanganohed am sincharan darana sichangoriaw no mian so ipakapamarin do tohos,

¹¹ akma so adan na a plano a pinatongtong na di Jesu Cristo a Apo ta

¹² a iya so yanan no anohed kano agsal ta do salapan no Dios a makayamot do saray ta nia.

¹³ Dawa do kayan no pandidiwan ko a makayamot dinio am akdawen ko o kadi nio a dispresioan.

No addaw ni Cristo

¹⁴ Dawa makayamot do makakniknin aya a plano no kalibrian am ipachahoahok ko do mato a Dios

¹⁵ a iya so Ama no atavo a nanganohed a mian do tana aya kan do hanyit,

¹⁶ o kapaypahni na so saray nio kano kapaypangdet na dinio do makakniknin a sidong no Espirito na,

¹⁷ as ka si Cristo a iya so ichasaray nio o maynolay do viay nio do kararaw tapian do kayan no rakoh a kaintindian nio so addaw na

^18-19 am mapanmo nio kanira no atavo a manganohed di Cristo o karakorakoh no makakniknin aya a addaw ni Cristo a nia so dia parin a matodah no pangtoktoan no tawo, as kapakarisibi nio so maypaypangay a kasolivan kano sidong no Dios a nia so ichatodah nio so kakeyan na ninio.

²⁰ Dawa dadayen o Dios a iya so makaparin so manghavas pa kano iyahes ta sia anmana ichayiktokto ta a makayamot do ipakapamarin naya do viay ta.

²¹ Dadayen kano pamatohen sia no atavo a nanganohed sia a makayamot di Jesu Cristo. Dadayen sia a abo so pandan! Amen.