1 Timoteo 3 - Ivatan

No kaparin da no adngedngeyen do timban

¹ Kakawyoran o vavatahen aya a akma sia, “An sino mahoho a adngedngeyen do timban am tayto a manita so oyod a mapia a anongen.”

² No makey no akmaya sia a anongen am mayanong o kabo no kaparoparoan na, kaasa no kakovot na, kapia no dadakay na, kapatak na do atavo a iyangangay na, kapsek na, kayavayavahen na, kapia na a mananawo,

³ kadi na maynoynomen, katanoy na kano rakoh so pasinsia, kadi na machisepasepangan as kano kadi na lakaman no kartos.

⁴ Mayanong sia a asa ka tawo a masolib a tomidib do familia na a akma so kaparin na sira so kamanganakan na a manib as kano manganohed sia.

⁵ Ta an di na parin no asa ka tawo a patongtongen o anongen na do tanyan na a familia am nawri pava o maparin na tagrarahen o anongen no machonong do tawotawo sa no Dios.

⁶ Mayanong ava do anongen aya o vayo pa a manganohed di Jesus ta tarek na idaay o kakalo na mato no anongen na as kakma na so kaparin ni Satanas a nadaay as nikastigoan no Dios.

⁷ Maimportante pa o kayan no mapia a kasincharan sia kano kayan no anib sia aran dira do di omonot di Cristo, ta an mian o paroan sia o kaparin no viay na am tarek a nia o serbien ni Satanas a irarayaw so kapayserbi na do Dios.

No kaparin da no diakono

⁸ Alit na pa dira do pidien a diakono o kapayanong no kapia no dadakay da, ichasaray sa do vatahen da, kadi da maynoynomen, kadi da mayagoman,

⁹ kahni darana do panganohdan taya a abo so kapaykamadamadanan.

¹⁰ Mayanong o kapanma a omproyba dira as an nakarahan o nakaproyba dira as abo o paroan sira am maparin dana sa matongdo do anongen daya.

¹¹ As sira o kakovot da sa a mavavakes am mayanong o kapia no dadakay da, kadi a vahyan dira a makachirichirin so maparahet so kadwan, kapia no disiplina da do viay da as kaparin da ichasaray do atavo.

¹² Mayanong do asa ka diakono o kaasa no kakovot na as kapia na tomidib dia o kametdehan na sa as kano atavo a komwan do familia na.

¹³ An mapia o asa ka diakono do trabaho na am mahap na anti o anib no tawotawo as kaparin na pa a mian so angdet a mapawnonong so panganohdan taya a komapet di Jesu Cristo.

No kaynyeran no nanawo aya a onotan ta

¹⁴ Tayto ako a mayplano a mangwan dinio daw so makalo amna tayto koymo a paytolasan,

¹⁵ tapian an di ako a nyeng a makangay dinio am mapanmo nio na o mayanong a kaparin no viay no asa ka membro do familia no Dios a nia so timban no maviay aya a Dios as paytetnekan no kakawyoran.

¹⁶ No kakawyoran aya a tayto ta panganohdan am makakniknin as kano makapamarin. Niaya o kaynyeran na: Naytawo si Cristo. Pinatalamad no Espirito o kaiya no manohed. Navoya sia no angheles. Pinawnonong sia do atavo a nasiones. Pinanganohdan no tawo do tana aya as nayvidi do hanyit.