Taetusi 3 - Vato Vari Vakameka Voru Ia Batu Ne

Koe Loborona Vatovato Velaka

¹ Sine va moqere ne qira basoero aro, mara va mazala qira vano kenakena ro mana vano batubatu na qavuna go. Ria mara vaogoto qira mana vanama ne zazu na pataro i velaka go.

² Mara kasi seko sakate na kakia basoe, ba pera qira go. Do iri na ko bule mana vakitaka velaka qira basoero ne go.

³ Tanego ṉalu bana ne qata bulaṉoe, go qata legulegu, qata soko go pataro ivakula so tokama qita, patana ro pua dena. Qata variqo ze too ita zazu sakata ro, mana qatiki soko qira kaega kero ne basoero ne, gereso ria iriki soko qita go kaega.

⁴ Do ṉalu vari nanao mana mamaligara ia God vari vakavele i lama sadaka go,

⁵ iva kavele qita. Iki sauna kaega pata velaka ro qata zazu ne, do i sauna so manava ia, go ni vakavele qita go. Spirit tabo iva dalo qita, go ita mata podo napu, go tatana pala too de ikoego ia.

⁶ God i teke lupo qita me Spirit tabo ia de qata koego ita, loborona de ikoego Jesu Kristo i vakavele qita go,

⁷ go ita tatana toṉove go too iki rove go kaega lupo. Too qata vaogote go tatana za pala go ne God i manava ne qita, mana i taru vatotoloṉo qitae tarakenaqana tanuna go. Seko dena i pata ogoto, qa soko sine vamoqere nigo, ono sine vasadake vari vatatana dena, go basoero iri vaogote go God, mara teke ne ṉalu ro ria zazu na pataro ni velaka go. Pataro i velaka go ne, iato i mazala go tavisi ne qira go basoero ne.

⁹ Do ono tabali kakamu ne aro seko bulaṉoi ro mana tutusi loda ro vano ṉalu bana ro, mana varitara ba vari valegu ne talupasana ro seko Tamana ro ia Mosese go. Seko igogo nae i kaega go kapata velaka na, mana iki tavisi ne kaega basoe go.

¹⁰ Ka basoe i vari vatatana ne pataro i mazala vari va pera mana vota qira basoero ne, ono sine ne ia karua ṉalu, do ṉalu iki soko kaega gatana, tabali kakamu neto aro basoe nae.

¹¹ Aro qo rove, basoe igogo nae ne, i vana bana neto vari vatana ogoto ne. Osina vatovato sakata ro i zazu ne go nae, i vasadake kebu ro ia tanuna.

Seko Valupolupo Ia Pol

¹² Ṉalu tuna turi ne zatu go Atemasi ba Tikikasi de qo koego ne, aro ono lete pada ne lama mia ve era komala lavata Nikopolis, tanego era tuna garetu koe nae ṉalu na lolomu.

¹³ Ṉalu Apolosi mana Zenas loia ne, tiruna vanama go zaza riru ne, ono tavisi ne qiru mana mia iru niki pusi ne kaki pata, loborona zaza tiruna vae go.

¹⁴ Vakitaka ro ita vano lotu, mara rove de go tarina zazu neso pataro ni velaka go, go tarina mazala go tavisi ne qira basoero i kaega ne qira go kapata. Mara ria kasi ko volomo go.

¹⁵ Osiqira ria iri ko tavisi ve era dena, iri va garetua seko kula ria de qo koego. Teke ne seko velaka ro remu de iri koego vakitaka ro ita iri vaogote go Kristo. Mana ia Batu ne ina kotavisi lupo qamu.