Taetusi 2 - Vato Vari Vakameka Voru Ia Batu Ne

Vari Vatatana Ogoto

¹ Do aro Taetusi, ono vatatana qira e basoero ne de igogo vatovato totoloṉo i lulua go vari vatatana ia God.

² Va rove qira e valeke ro kazigarata de go tarina miasoka go tanuqira, mana pala taru na nanao qira ṉalu iri muma go, mana vasadake vatovato velaka na too ria go. Vaogoto ria mara nadu, mara mamaligara ne qira kero ne basoero ne, mana tarina ko karaputa ṉalu na makuru go.

³ Vatatana napu qira qolero kazigarata, go tarina ko gere qole tabo loborona ko ria, mara ria kasi pepeu poqe ne qira basoero ne, mara kasi poro ge loka go, do mara vari vatatana ne pataro ni velaka go,

⁴ tarina tavisi ne qira qolero voru, go tarina mamaligara ne valeke ro ria mana salero ria go,

⁵ mana mara vasadake vatovato velaka na too ria go. Tavisi ne qira go tarina ko basoe dalo, miasoka velake ko tatamana ria mana vamazale valeke ro ria go, go kaega ka basoe tina seko vasakate go Tarama Velaka i reqe mego de ikoego God.

⁶ Ono vatatana napu qira valekero voru, go tarina miasoka too ria tanuqira.

⁷ Aro Taetusi ono vasadaka ne qira too mana vatovato velaka, go basoero ne tarina lulua go. Mana vari vatatana aro mara totoloṉo, go basoero ne tarina mia vamazale go.

⁸ Seko ne, seko totoloṉo ro, go basoero ne tariniki seko vasakate kaega seko ro aro, go vano iri vasasakata nigo tarina agava ne sine vasakata qita ita qata lulua go Kristo.

⁹ Vatatana qira vano zazu go tarina osaka ne batu ro ria. Tarina zazu ne pataro ivakula go batu ria, mana mara kasi pera qira go,

¹⁰ mana mara kasi siko na patapata ria, mara ria zazu neso pataro tina vakula go batu ria, go batu ria tina ruqe qirae loborona zazu ro ria. Loborona to zazu velaka ro nae, ria tarina vazakazaka go vari vatatana na sauna God, iato iva kavele qita go.

¹¹ Tanego God ivasadaka bana Mana ia, go tina vakavele qira basoero na kolabana pua ne.

¹² Mana ia God dena ne, ivatatana qita, ego mata vana ne pataro iki totoloṉo ego kaega dekoe God, mana mata kasi lulu na nanao sakata na vudu pua dena. Do mata vatotoloṉe too ita mana lulua soko ia, go God tina kula ne qita.

¹³ Tanego ita qata piri ne musaqara qata vaogote go tina lama doka, mana ṉalu nae karaputa mazala ia Jesu Kristo i God mana vari vakavele ita tina sadaka me.

¹⁴ Jesu Kristo i mao ne tina le, go tina vakavele qitae osina vasakata pata ro ita, mana tina vadalo too ita, go tatana ke ia tamuna, mana mata le ne zazu ne na pataro i velaka go.

¹⁵ Osina ṉalu ono vatatana qira e basoero ne zazao na pataro qa sine go era. Ono vazazua osina to karaputa i ko nigo, go tono vakaraputa go nanao qira, ono seko va moqere ṉalu iriki lulua go kaega vari vatatana aro. Go kaega ka basoe tinara mia vaqoqori go.