Taetusi 1 - Vato Vari Vakameka Voru Ia Batu Ne

¹ Era Pol qa basoe zazu ia God mana qa apostolo ia Jesu Kristo. God i turi nava era go tuna tavisi ne qira basoero ia i vine bana qira go, go tarina vaogoto ia mana go tarina rove velake vari vatatana na vaogoto ita go.

² Seko ogoto ne, i zazao na too iki rove go kaega lupo. God iki rove go kaega poqe, i pui bana qita e too dena, tarakenaqana iara va zaria go kolabana pua ne.

³ Mana i doka velaka to ṉalu na, ia ivasadake velaka na seko ia loborona Tarama Velaka ne. God iato i vakavele qita go, i sine nava era tuna sine vasadake Tarama Velaka ia de koe osina basoero.

⁴ Qa karo nigo aro Taetusi, loborona vaogoto ituru qa va gere goe sale ogoto era. Go God Tamana mana Jesu Kristo vari vakavele ita mana teke nigo Mana mana ko bulebule iago.

Zazu Ia Taetusi Loborona Kret

⁵ Era qa kasi nigoe aro ṉugu Kret, go tono va totoloṉe kaviaro zazu iara ko go. Ono vine qira kakiaro basoero go tarina batu lotu e nogotona ro lotu ikoego nae, gere so de qa sine bana nigo.

⁶ Basoe tono vine go, tina basoe totoloṉo so mana tina kameka so qole ia. Salero ia tarina vaogote Jesu Kristo. Iki velaka kaega basoero ne tarina go salero ia iriki lulua kaega vato mana too ria i sakata go.

⁷ Basoe i batu lotu go, basoe nae i miasoka zazu ia God. Iato go too ia tina totoloṉo. Tiniki vazaka napu kaega, muma katikili kaega poro ge loka kaega vari varitara kaega, ba soka na topu kesa go.

⁸ Do basoe nae tina kula ne mana miasoka qira basoero iri gadoe go komala ia, tina mamaligara ne pata velaka go. Tina rove de go pala taru na nanao na ṉalu i muna go, tina vatotoloṉe too ia, mana na lulua vatovato ia God go, mara kasi luluna too ba vatovato i sakata go.

⁹ Ia tina pala taru vanadua tarama ogoto qata ruruqe go, ke i toqe nego tamana na lotu ita. Loborona to zuka dena, ia tina mazala vakaraputa qira kero ne basoero ne loborona vari vatatana ogoto, mana tina va mia qirae kebu ria vano iri va legua go ia.

Vari Vatatana Poqepoqe

¹⁰ Aro qo rove topu ria basoero iri koego nae, iriki toqe ne kaega vaogote na vari vatatana ogoto ne. Topu ria ne iri vano Jiu iri lama vaogoto go, do iri sekoseko volomo so mana iri poqe ne qira basoero ne go.

¹¹ Ono vanoto vari vatatana poqepoqe ro igogo ne, tanego iri va sakata bana to vaogoto ria kavia ro tatamana ro. Iri vatatana qirae basoero ne pata poqepoqe ro, tanego iri soko so pala na kesa go tina tavisi ne qira.

¹² Seko i sine bana go, kaki valeke vari vatatana lavata na Kret i pata ogoto, ia igo, “Basoero na Kret iri vano poqepoqe, iri vano muaka mana iri poro ṉaṉa go. Iri gere qira pata qara qara piru ro.”

¹³ Sauna to iadena, ono seko vakaraputa e de iri koego, go tarina mazala vaogoto napu na vari vatatana ni ogoto go,

¹⁴ mana mara kasi lulu na pepeu ṉalu bana ria vano Jiu mana seko ro ia basoe i vana bana nego vaogoto iago.

¹⁵ Basoe i velaka go nanao na, i rove osina pata i velaka mana i tora vazazu na go. Do basoe iki velaka go kaega nanao na, mana iki vaogote kaega God, i rove osina pata iki velaka kaega. Iago basoe nae ne, nanao na mana vatovato ia gogo ne i sakata lupo bana to.

¹⁶ Patavolomo tane i sine, irove God igo, do vatovato ia tanuna ivasadake i vae napua so seko ia tanuna. Basoero iri gogo nae, iri vano sakata, iriki toqe ne kaega vaogote na God, mana i makuru qira tarina zazu ne kaki pata velaka go.