Leta Ia Pol I Karo Ne Qira Basoero Na Rom 7 - Vato Vari Vakameka Voru Ia Batu Ne

Vapadapada Na Zazao Na Busi

¹ Ramu turaquro, ramu qamu mazala rove na pataro qa vele sine ne qamu go era dena, tanego osiqamu qamu rove bana zazao na Tamana. Tamana i kenaqana ne basoe torana too i vae go.

² Gerena vapadapada dena. Kameka qole i busi, tamana na busi, i qolo vanadu ze ia de ikoego valeke ia lodana too i vae go. Do ṉalu valeke ia ile, ia i talukasae to tamana i qolo go.

³ Iago, ṉalu qole nae iko tavisi napua kaki valeke do valeke kenaqa iane iara too gogo ne, tamana igo, ia i taunata.

⁴ Igo napu so nae de qamu koe ramu, tanego ramu qamu vakameka tavise le ia Kristo, iago ramu qamu le bana, mana qamu talukase tepa ia tamana. Mana ninidena ramu qamu ke ia to Kristo go tamuna zazu velaka ne God.

⁵ Ṉalu ita qata koe go too na vudu pua dena, tamana iva tadagasiri me vasakata pata go i zazue go tokama qita, iago ita qata zazu ne pata sakata ro iri vae vale qita.

⁶ Do ninidena ita qata talukasa, tanego ita qata le bana ne pata i qolo bana go tamana. Iago ita qatiki zazu ne ze to kaega God ṉalu ninidena vatovato bana ro iri karo ze go tamana, do qata zazue vatovato voru ia Spirit tabo.

Tamana Mana Vasakata Pata

⁷ Igo nae iago Tamana i pata sakata ba? Kaega! Tamana to i varove zave go era pata ni vasakata pata go. Ṉalu tamana tara sine bana go kaega, kasi visarena patapata ia kene basoe, era tuki mazala kaega rovena tane kapata ni visara go.

⁸ Do vasakata pata tane i vasadaka mego sekoro iri koe go Tamana go iri zazu ne go osina sinaqena visara ro iri zazue de qa koe go era, ba ṉalu tara kaega go tamana, vasakata pata tara patavolomo so.

⁹ Ṉalu bana me de qara kaebo go rove na Tamana, era qa too so, do pasi ṉalu qa rove go Tamana ia God vakaega go zazu nena pata sakata, vasakata pata i lete lama karaputa eto deqa koe go era.

¹⁰ Mana i gere pata i vae vale ava go. Iago Tamana i valame nava era too, do i vae vale napu qira so.

¹¹ Tanego vasakata pata i vazazua seko ro iri koe go Tamana, mana i poqe ava era, i vae vale napu ava so era go.

¹² Iago Tamana i tabo, mana seko na ro i tabo, iri totoloṉo, mana velaka lupo go.

¹³ Iago pata velaka ro dena tane iri vae vale ava go era ba? Kaega! Vatovato ia so vasakata pata i vae vale vego era pata velaka ro dena, gogo tatana mia rove go ita vatovato ia vasakata pata. Mana iato nae go sekona ro Tamana iri vasadaka me vatovato ia vasakata pata i lete sakata sivala.

Varitarana Loborona Puṉuna Basoe

¹⁴ Ita qata rove Tamana i patana madau qita. Do era qa basoe na so vudu pua dena, mana qako seka bana ne so vasakata pata.

¹⁵ Qaki nanao rove kaega pata qa zazu ne go tanego pata velaka qa soko go zazu nena qaki zazu ne kaega do pata sakata qaki soko go kaega qa zazu ne go.

¹⁶ Ṉalu era qa zazu ne go pata qaki soko go kaega zazu nena, iadena i vasadaka me era qa toqe ne Tamana i totoloṉo.

¹⁷ Iago iki era kaega qa zazu ne go pata dena, do vasakata pata ikoego loboroqu era, tane i zazu ne go.

¹⁸ Era qa rove i kaega so pata velaka ikoe de qa koe go, do too na so vudu pua dena ikoego de qa koe go era. Iato gogo pata velaka qa soko go zazu nena qaki zazu ne go kaega.

¹⁹ Do pata qa zazu taru ne go era, iato pata sakata ro qaki soko go kaega zazu nena.

²⁰ Iago ṉalu era qa zazu ne pata qaki soko go kaega zazu nena, ia dena i talukasana iki era kaega qa zazu ne go, do vasakata pata ikoego loboroqu era tane i zazu ne go.

²¹ Iago, era qa rove vatovato sakata dena so i zazue de qa koe go era. Ṉalu qa soko go zazu nena pata velaka, do pata sakata so i reqeme go de qa koe go era.

²² Loborona puṉuqu, era qa lete kula ne Tamana ia God.

²³ Do qa mia kameka tamana kakavata i zazue go loborona tokamaqu, mana tamana nae i varitarae de ikoego Tamana i toqe ne go nanaoqu. Iago i qolo ava era, tane tamana ia vasakata pata i zazue go loborona tokamaqu.

²⁴ Ke! Era qa basoe vari vananama sivala! Do akena to tina vakavele go tokamaqu tina vadoka ve go era le na?

²⁵ Iago ita mata zazu ne, tanego ita qata koe polana Mana ia God, mana qatiki koe kaega polana tamana. Kadi go i velaka so ita mata vasakata pata so ba? Kaega!