Leta Ia Pol I Karo Ne Qira Basoero Na Rom 6 - Vato Vari Vakameka Voru Ia Batu Ne

Qata Lene Vasakata Pata Mana Tooe De Ikoego Kristo

¹ Iago ava mata go? Mata too tarue so vasakata pata go Mana ia God tina zaza popoka go ba?

² Kaega! Ita qata le banae to vasakata pata, iago ava tina gogo tatana za too napue go loborona vasakata pata?

³ Tanego ramu qamu rove velaka pata dena ṉalu qata bapitema bana go. Ita qata ko kameka banae de ikoego Jesu Kristo, mana qata bapitema, go mata vakameka ne le ia.

⁴ Iago, ṉalu qata bapitema go ne qata le mana iri vou palu qitae ia, gerena Kristo i too napu me tepa le ne loborona karaputa ia God Tamaqita. Ita napu tatana too napue too voru.

⁵ Tanego qata vakameka bana ne le ia. Iago, ita tatana vakameka napu ne too napu ia tepa le ne.

⁶ Go God tina pero vakuziki ne go karaputana vasakata pata ita, go ita mata kasi seka ia vasakata pata.

⁷ Tanego ṉalu basoe ile, karaputa ia vasakata pata i talukasae de ikoego.

⁸ Pasi ita qata le palua Kristo, ita qata vaogote tatana too palua ia.

⁹ Tanego ita qata rove Kristo i too bana me tepa le ne. Mana ia tiniki ara le napu kaega. Le i kaega ne to karaputa de i koe go ia.

¹⁰ Mana kameka le i vae go nae i sauna to osina basoe, tanego le ianae i vakuziki ne karaputa ia vasakata pata mana too i pala go ninidena, ia i too kamekae de ikoego God.

¹¹ Gerena napu so ramu, muna nanao rove napua tanuqamu. Ramu qamu le ne vasakata pata, mana qamu too napue de ikoego God loborona ko vakameka ramu de ikoego Jesu Kristo.

¹² Kasi vamao ne na vasakata pata go mara kenaqa ne go tokama qamu ni rove go le, gogo tamuna lulua go pata ni soko go nanao qamu.

¹³ Mana kasi ara va malumu nena kaki takoborona tokama qamu go tamuna lulua go vatovato sakata. Do muna teke lupo ne God too ramu, mana gere qira basoero iri le bana, go God i vatoo napu qira go. Muna teke lupo ze too ramu de i koe ia, go ia mara vazazu qamue ramu too totoloṉo.

¹⁴ Kasi vamao nena vasakata pata go mara batu ne qamu tanego ramu qamuki too e kaega tamana, do qamu too e Mana ia God.

Ko Sekae Vatovato Totolono

¹⁵ Iago avana to mata zazu ne, tanego ita qata koe polana Mana ia God, mana qatiki koe kaega polana tamana, kadi go i velaka so ita mata vasakata pata so ba? Kaega!

¹⁶ Ramu qamu rove va velake, ṉalu qamu soso ne go tanuqamu, gerena seka ne kaki basoe qamu vaogote go, ramu qamu seka ne to batu qamu vamazale go. Do bana ramu qamu seka ne vasakatapata, ianae ne tina vadoka qamue ramu le. Do ṉalu qamu seka ne vaogotona God, ianae ramu tamuna ko totoloṉoe de ikoe go tanuna God.

¹⁷ Iago mata seka velaka ne God, tanego de i lupo bana mego ramu qamu seka ia vasakata pata. Do ramu qamu vaogoto ze puṉuqamu vatovato ogoto qamu pala ze go vari vatatana iri teke bana ne qamu go.

¹⁸ Ramu qamu talukasa banae to vasakata pata, mana qamu lama seka ne vatovato totoloṉo de ikoe go God.

¹⁹ Era qa pada ne vatatana velaka ne qamu ramu seko ro i tora qamu go ramu gata rove na, tanego nanao qamu iki loda kaega. De i lupo bana mego ramu qamu teke napu ne tanuqamu seka nena vatovato sakata, too iki totoloṉo kaega, mana zazu kebu ro qamu lulu go. Do ninidena muna teke napu nena tanuqamu seka nena too totoloṉo, mana vatabo lupo ze too ramu de ikoego God.

²⁰ De i lupo bana mego ramu qamu seka ne so vasakata pata, qamuki nanao to kaega ramu tane vatovato totoloṉo ia God.

²¹ Ninidena qamu pala to agavana pataro qamu zazu bana ne go. Vatovato nae tina za lupoe so le.

²² Do ninidena ramu qamu talukase to vasakata pata, mana qamu ko seka ia God. Iato nae go qamu vatabo ze go too ramu de ikoe go ia, mana ṉalu muzi tamuna pala ze too gadokutona i kaega.

²³ Tanego volina vasakata pata to le. Do sosovolomo i teke ne qita God iato too gado kutona i kaega, ṉalu ita qata ko vakamekae go de ikoe go Batu ita Jesu Kristo.