Leta Ia Pol I Karo Ne Qira Basoero Na Rom 5 - Vato Vari Vakameka Voru Ia Batu Ne

Ko Totoloṉe De Ikoego God

¹ Ninidena ita qata totoloṉoe de i koe God loborona vaogoto, tanego Batu ita Jesu Kristo i vabule qitae de ikoego God.

² Loborona vaogoto Kristo i varove qitae ita Mana ia God i teke volomo ne qita go qata too e go manava nae ninidena. Ita qata kula ne ruruqe ia tatana pala tavise go karaputa ia God kene ṉalu.

³ Ita mata kula napu ne ita tane makuru ro qata soba go dena, tanego ita gata rove makuru ro dena to tinara vanadu qita go ita,

⁴ mana ṉalu ita qata vanadu, God i vamazala qita, mana va mazala ianae i vazari me to ruruqe ita go.

⁵ Ruruqe dena iki ara poqe qita kaega, tanego mamaligara ia God i zele me ze go puṉu qita loborona Spirit tabo ni sosovolomo ia God de qata koe go ita.

⁶ I lama doka to ṉalu i vine bana me God, Kristo i le ne sau qira vano iri vasakata pata go. Tanego sauna vasakata pata ria ni makuru qira go vakavele qira go tanuqira.

⁷ I makuru kakia basoe i soko go le ne na sauna tavisi nena kameka basoe totoloṉo. Do kadi go kakia basoe i soko tane le nena sauna tavisi nena kameka basoe i totoloṉo go.

⁸ Do God i vasadaka ne qita lavata na mamaligara ia de qata koe go ita; ṉalu ita qatara vasakata pata go Kristo i le ne sauqita ita.

⁹ Le ia i vatotoloṉo qitae ita de ikoego God ninidena mana i pata ogoto ia to tina vakavele napu qitae go ita muma ia God ṉalu na varitanae ia musaqara muzimuzi.

¹⁰ Ita qata kana bana ne God, do ia i vakameka napu ne qita ita, de ikoe tuna sauna le ia ne. Ninidena ita qata ko kameka de ikoe God. Iago pata ogoto sivala ita tatana kavale too ia Kristo.

¹¹ Do miki pataro so nae kaega God i teke ne qita, do mata kula, loborona Batu ita Jesu Kristo, tanego ia i vakameka ne qita ita de ikoego God.

Adamo Mana Kristo

¹² Vasakata pata i lama banae so vudu pua ireqeme kebu ia kameka basoe, mana vasakata pata to i vae vale go ia. Iago le i sapua to vano basoe na vudu pua, tanego osiqita qata vasakata pata lupo so.

¹³ Vasakata pata iko bana me so vudu pua, muzina God iara teke go Tamana ia Mosese. De iara kaebo lama go Tamana ia God iki nanao tarua kaega vasakata pataro.

¹⁴ Do pasi me ṉalu ia Adamo lama dokae ṉalu ia Mosese, le i vatarakenaqa ne qita vano basoe. Patavolomo qatile vasakata pata kaega gerena Adamo i legulegua go God. Adamo i vapadapadana basoe tina za lamae go muzi na ia.

¹⁵ Do iriki vari pada kaega tanego sosovolomo ia God i teke ne qita go iki gere kaega vasakata pata ia Adamo. Pata ogoto, vano basoero iri le bana, tanego sauna vasakata pata ireqe me de ikoe kameka basoe nae. Do Mana ia God ilete lavata sivala ne sosovolomo i teke volomo ne qira basoero topu, loborona Mana ia kameka basoe dena, Jesu Kristo.

¹⁶ Pata i reqeme go vasakata pata ia Adamo iki varipada kaega pata i reqeme go sosovolomo ia God. Ṉalu kameka basoe dena Adamo i zazu ne go vasakata pata God i varitanae ne ia, mana igo i lete kebu. Do taramuzina vano basoe iri zazu ne go vasakata pataro, God i vasadaka me Mana ia i teke ne qirae sosovolomo ia mana igo, iri vano totoloṉo.

¹⁷ Pata ogoto, vasakata pata ia kameka basoe dena Adamo, i vatarakenaqa ne qira to vano basoe le. Tanego i sauna to vasakata pata ia. Do i pata ogoto sivala napu, pata i zazu ne ze go God zazu ia kameka basoe dena Jesu Kristo i lete lavata sivala napu. Tanego osiqira basoero iri pala Mana de i koe go God, mana iri pala napua too totoloṉo i sosovolomo ne qira, go tarina ko karaputae de i koe Kristo.

¹⁸ Iago vasakata pata ia kameka basoe dena, God i varitanae ne qirae qo basoe dena i lukase go vasakata pata ria vano basoe de i koe go God.

¹⁹ Gerena napu so kameka basoe i legulegua God, iago osina basoero iri lulu napua so vasakata pata, ia kameka basoe nae mana igerena napu so kameka basoe i vaogote God osina basoero tarina lama ko totoloṉoe de i koe God.

²⁰ Ṉalu God i valame go Tamana basoero ne iri lete zazu va popokato zazu sakata. Do ṉalu vasakata pata i zaza popoka, Mana ia God i lete zaza popoka sivala to go.

²¹ Iago vasakata pata i kenaqa ne qira vano basoe mana i teke ne qira to le. Do Mana ia God i ko ne karaputa sivala loborona zazu ia Jesu Kristo i vatotoloṉo napu qita ita vano basoe, mana i kenaqa qitae go too gado kutona i kaega.