Leta Ia Pol I Karo Ne Qira Basoero Na Rom 4 - Vato Vari Vakameka Voru Ia Batu Ne

Vaogoto I Vatotoloṉe Go Abra-am

¹ Avana mata vane too ia Abra-am, i kazigaratana go sinaqe ita? Ava patana i dokae de ikoego ia?

² Ṉalu Abra-am i zazu ne go pataro i totoloṉe go ia de ikoe go God ia tina kone pata go tina vazaka napu ne go. Do ia iki vazaka napu ne kaega tarakenaqana God.

³ Buka tabo ne igo, Abra-am i vaogote God, mana sauna vaogoto ia, God i toqe ne ia i basoe totoloṉo.

⁴ Ṉalu basoe i zazu go, i pala volina, iki pata sosovolomo kaega, do i volina to zazu ia ni zazu ne go.

⁵ Do basoe i kone go vaogoto iki va mazale kaega ia tane zazu ia, do i vaogote God ia ni vatotoloṉo qira go basoero iri kebu, tanego sauna to vaogoto ia. Iago God i toqe ne basoe dena go i vatotoloṉo ze go de ikoe go tanuna.

⁶ Iato dena to talukasana seko ia Davita i sine bana go, kula basoe i toqe ne go God, patavolomo zazu ia i totoloṉo ba iki totoloṉo kaega,

⁷ “Iri kula basoero i nanao ule ne go kebu ro ria God, mana i vakuziki ne go vasakata pataro ria go.

⁸ Basoe nae i lete kula sivala to tanego God iki nanao tarua to kaega vasakata pata ia!”

⁹ Avigo kulakula i sine go Davita dena i ke ria so vano Jiu iri kosi go ba? Kaega! I ke ria napu so vano iriki kosi go kaega go. Tanego ita qata pala ze Buka tabo ne, iri sine go, “Abra-am i vaogote God, mana loborona vaogoto ia, God i toqe ne ia i basoe totoloṉo.”

¹⁰ Ava ṉalu i doka go Abra-am pataro dena, tarakenaqana iara kaebo go kosi ba, taramuzina kosi i vae go? God i zazu ne pataro dena tarakenaqa na iara kaebo go kosi.

¹¹ Taramuzina to ia iri ara kosia go Abra-am, kosi dena i lalana to God i toqe ne Abra-am i totoloṉo vaogoto ia tarakenaqana iara kaeba go kosi. Iago Abra-am i tamaqira basoero iri vaogote go God, gerena God i toqe ne qira iri totoloṉo go. Patavolomo iara kaebo go kosi.

¹² I tamaqira napu so vano Jiu iri kosi bana go, iki sauna so kaega iri kosi go, do iri vaogote God gerena Abra-am ni zazu ne go tarakenaqana iara kaebo go kosi.

Pui Ia God I Koe De Iri Koe Ria Iri Vaogote Go

¹³ Ṉalu God i pui ne Abra-am mana ria sasaqi vari soma ia, go vudu pua tina ke ria go, God i pui ne pata dena sauna Abra-am i vaogote Tamana iki go kaega, do tanego Abra-am i vaogote God, mana God i toqe ne Abra-am i basoe totoloṉo.

¹⁴ Ṉalu tara go pui ia God i teke ne qira so vano iri lulua go tamana, vaogoto ia basoe tara patavolomo so go.

¹⁵ Tamana tane i vazari mego muma ia God, ba ṉalu tara kaega go Tamana, basoe tariki vasakate kaega Tamana.

¹⁶ Iago pui ia God i degere ne vanaduna vaogoto go tarina pala ogote go sosovolomo ia God i teke volomo ne qira go vano iri reqeme go sasaqi ia Abra-am. Do iki keria miki so kaega ria iri lulua go Tamana ia Mosese, do ria napu to vano iri vaogote go God, gerena Abra-am ni vaogoto go. Tanego Abra-am to i Tamaqita osiqita,

¹⁷ gerena i sine go Buka tabo ne, “Era qa vine go aro tono tamaqira sinaqe topu ro ne.” Iago pui dena i nadu banae de ikoe go God ni vaogote go Abra-am. God dena to i vatoo me qira go vano iri le bana go, mana seko mazala ia i vazari me pataro iriki ko banae go kaega vudu pua.

¹⁸ Abra-am i vaogote God, mana i ruruqe ia tina zazu ne pata ni pui ne ze go. Patavolomo pataro dena i makuru go nanao rove na de gogo tina lama ogoto go; iato nae tanego God i va tamana ze go ia sinaqe na vudu pua. Gerena Buka tabo i sine go, “Sasaqi iri reqeme go sinaqe aro tina gere topuna domiri ro ne.”

¹⁹ Abra-am i garogaro to kamekavasa avena igata rove tokamana i zaza taqoqoro zato tepa ia le, mana maqota ia Sera i kaega ne sale go, do Abra-am vaogoto ia iki pela kaega.

²⁰ Vaogoto ia dena iki vana ne kaega mana iki ruama ne kaega ia tane pui ia God, do vaogoto ianae i vakaraputa ia, mana i vazaka ze God.

²¹ Ia i rove velake God tina zazu ne pata ni pui bana ne go.

²² Iato nae tanego go, vaogoto ia Abra-am i toqe ne go God i basoe totoloṉo go.

²³ Sekoro dena God i toqe ne ia, i basoe totoloṉo go. Do iriki karo vamiki ne ze so kaega Abra-am.

²⁴ Do iri karo napu ne qita to ita go. Tanego God i toqe ne qita qata totoloṉo ṉalu qata vaogote ia, i vatoo napu me Batu ita Jesu Kristo tepa le ne.

²⁵ Ria iri vae vale ia, ia i le ne sauna vasakata pata ita mana i too napu me tepa le ne, go ia tina vatotoloṉo qita ita de i koe go God.