Leta Ia Pol I Karo Ne Qira Basoero Na Rom 3 - Vato Vari Vakameka Voru Ia Batu Ne

¹ Iago avana to kaki pata velaka ireqe mego vano Jiu? Mana avana to ka mazala i vazari mego vatovato na kosi na tokama?

² Ove, i topu pata velaka iri pala go vano Jiu. Pata kenaqa sivala, God i teke ne qira vano Jiu seko iago tarina sotia go.

³ Tane do, bana go kakiaro ria iriki lulu kaega seko ia God i teke bana ne qira, lago iki ko vanadue kaega pata ni pui bana ne go ba?

⁴ Kaega! God i ogoto taru so osina ṉalu. Do osina vano basoe so iri zazu ne go poqe. Gerena Buka tabo i sine go sauna God, “Aro ono vasadake totoloṉo aro ṉalu qo seko go. Ṉalu vano basoe iri pada zigoe kaki pata, aro ono karaputa sivala ne de iri koe go ria.”

⁵ Do ṉalu zazu keburo ita i tavisi ne qita i vasadaka velaka me God i totoloṉo ba? Avigo God i kebu tane i vakimata qita go ita? (Qa seko go dena gere so basoe volomo.)

⁶ Kaega! Ṉalu God tariki totoloṉo go kaega, ava tina gogo tina vari tanae napu ne qira go vano basoe na vudu pua ne.

⁷ Do bana era qa basoe ogoto kaega, avigo iki mazala kaega kebu rera go tina tavisi mego vasadaka na menomeno ia God, go basoero mara ria mia God so i zazu ne go, pata totoloṉo ba? Ṉalu igogo nae avigo tane God tina tulaṉa navae go era vasakata pata?

⁸ Avigo tane qatiki sine go kaega, “Mata zazu ne pata sakata go mara sadaka me pata velaka”? Seko dena i seko sakata sivala. Do kakia ro basoe iri seko vasakatava era mana iri go, era tane qa sine go pata dena. I tora God tina tulaṉa ne qira mana vakimata qirae sauna pata dena.

Kaega Kaki Basoe I Totolono Go

⁹ Iago ita vano Jiu qata lete velaka sivala ne qira vano iriki Jiu go kaega ba? Kaega! Era qa sine vasadaka bana, vano Jiu mana vano iriki Jiu go kaega iri varipada so, mana iri ko lupoe so karaputa ia vasakata pata.

¹⁰ Gerena i sine bana go Buka tabo ne, “Kaega kaki basoe i totoloṉoe go tarakenaqana God.

¹¹ I kaega ka basoe i nanao rove go pata i totoloṉo go. Mana i kaega ka basoe i taqia go mara lama ko garogaroe go de ikoego God.

¹² Osiqira basoero iri tabali kasi ne God mana iri zaza kakavata lupo so go. Kaega to ka basoe izazu ne go pata velaka, kameka mine na basoe do kaega to.

¹³ Pata iri sine go iri le ne basoero ne soso sinaqe na pata poqe i siporo mego kalamia qira, mana seko sakata sivala ireqe mego saqe qira, i gere panina dole pani ne.

¹⁴ Saqe qira i purake to seko tulaṉa sakata i mazala go vae vale na basoe.

¹⁵ Iri katikili so vari va vokara mana vae vale qira basoero ne.

¹⁶ De iri zae go iri vazaria so vari va sasakata mana pero qira basoero go.

¹⁷ Iriki rove bana to kaega vatovato na too bulebule.

¹⁸ Mana iriki rove bana to kaega padapada na de ikoego God.”

¹⁹ Ninidena ita qata rove osina pata i koe so loborona tamana, mana i zaeto de iri koe go vano iri too e go polana tamana go tina vamamanava go osina seko vavariqo ria basoero ne, mana vasadaka me varitanae ia God de iri koego basoero na vudu pua.

²⁰ Tanego kaega ka basoe i totoloṉoe go de ikoe go God ṉalu i lulua go so pataro ni sine go Tamana. Do pata i zazu ne go Tamana i varove ze so basoe nabi i zazu ne go vasakata pata.

De Igogo God I Vatotoloṉo Napu Qira Basoero De Ikoego Tanuna

²¹ Do ninidena God i vasadaka me zuka go mara vatotoloṉo napu me qira basoero de ikoego tanuna. Iago Tamana ia Mosese, mana propeta ro ne iri tarama bana ne go pata dena, do iki za sadaka me kaega tamana dena.

²² God i vatotoloṉo napu me qira basoero de ikoego tanuna. Ia i zazu ne pata dena de iri koe go basoero iri vaogote go Kristo, tanego vano Jiu mana vano iriki Jiu go kaega iri vari pada ne qira so.

²³ Tanego osina basoero iri vasakata pata, mana iri ko valaqalaqae de ikoego God ia ni mazala go vakavele qirae go de ikoego.

²⁴ Do sosovolomo na velaka ia God i vatotoloṉo napu qira basoero de ikoego tanuna, loborona Jesu Kristo ni lukase go vasakata pata ro ria.

²⁵ God i valame Kristo go i komakoma ne go sauna le ia, go tina vakuziki ne go vasakata pata, go God tina nanao ule ne go vasakata pata ro ria basoero ne. Loborona vaogoto ria de ikoe go Kristo, God i zazu ne pata dena go mara vasadake totoloṉo ia Tanuna igo. De i lupo bana mego ia iki muma katikili kaega, mana i mia vana ne so vasakata pata ria vano basoero.

²⁶ Do ṉalu ninidena ia i toere to vasakata pata ria vano basoe, go mara vasadake totoloṉo ia igo. Zuka dena God i vasadake tanuna i totoloṉo mana i vatotoloṉo napu basoe iri vaogote go Jesu Kristo de ikoego tanuna.

²⁷ Iago ava patana mata vazaka napu ne go ita? Kaega so kapata! Ava sauna go qatiki vazaka napu ne go kaega ita na? Avigo ita qata mazala vatotoloṉo napu na tanuqita de ikoego God, sauna luluna Tamana ba? Kaega! God tanuna so i vatotoloṉo napu qita ita de i koe tanuna sauna vaogote na Jesu Kristo.

²⁸ Sauna pataro dena ita qata rove basoe i totoloṉoe de i koe go God loborona vaogoto ia so, do iki reqeme kaega zazu nena pata ro i sine go Tamana.

²⁹ Iago avigo God, i God ria so vano Jiu ba? Kaega! Ia i God napu ria to vano iriki Jiu go kaega go.

³⁰ Tanego kameka so God dena i vatotoloṉo napu ze tanuna de iri koe go vano Jiu mana vano iriki Jiu go kaega loborona so vaogoto ria.

³¹ Iago sauna vaogoto dena ita qata vakuziki ne tane Tamana go ba? Kaega! Ita qata vanadu velaka to Tamana.