Leta Ia Pol I Karo Ne Qira Basoero Na Rom 2 - Vato Vari Vakameka Voru Ia Batu Ne

God Tina Varitanae Ne Osina Basoero

¹ Vakitaka era, avigo tane qo varitanae ne qira go basoero ne? Aro do i kaega nigo so velaka go tono sine go i kaega nigo ka sakata tono go. Tanego ṉalu qo zazu napu ne go so pata iri zazu nego ria aro qo sine vasakata napu go so tanamu.

² Ita qata rove God so i totoloṉo go i varitanae ne qira go basoero iri zazu ne go vato miroko ro dena.

³ Do aro vakitaka era qo zazu napu ne so tanumu pata qo varitanae ne ze go de iri koego basoero ne, iago qo nanao qo mazala paqa ne na varitanae ia God?

⁴ Kadigo aro qo va patavolome so God, sauna vari nanao ia mana iki muna katikili kaega, do ia iko piri so ṉalu qata zazu ne go ita pata sakata. Iago muna mia rove God i vasadake varinanao ia de qamu koego. Tanego ia i pada ne muna nanao ule, mana kavala ze too velaka sauna too sakata ro ramu.

⁵ Do ramu qamu lete va makure papaqana puṉu qamu, tanego qamu vano gata pata kaega, iago qamu lete va lavate to kimata tamunara pala go ṉalu musaqara na muma ia God, mana varitanae ia tina sadake go de iri koego basoero ne.

⁶ Tanego God tina teke ne qira sasarapa osiqira basoero ne sauna pata ro iri zazu ne go.

⁷ Kakiaro basoe iri vanadue zazu ne na zazu velaka, mana iri taqi ze God menomeno, vamazala, mana too i too sivala go. De iri koe basoero nae God tina teke ne qira too gado kutona i kaega.

⁸ Ba ria basoero iri soko so zazu ne na pata iri soko go zazu ne na tanuqira mana iriki soko kaega pata velaka do, iri lulua so pata sakata ro, God tina lete muma ne qira mana vakimata qira go.

⁹ Osina basoero iri zazu ne go vatovato sakata ro ne tarina pala makuruna mana vokara na. Ianae tina sadaka kenaqa qira vano Jiu mana taramuzina vano iriki Jiu go kaega.

¹⁰ Do basoero iri zazu ne go pata velaka, God tina teke ne qira menomeno, mana vamazala na vitoṉo qira, mana tina teke ne qira bule go. Ianae tina sadaka kenaqa qira vano Jiu mana taramuzina de iri koe go vano iriki Jiu go kaega.

¹¹ Tanego God i vari pada ne qira so osiqira basoero ne.

¹² Vano iriki Jiu go kaega iriki pala kaega Tamana ia Mosese, iago iri vasakata pata mana iri zaza vakakavata ne to ria tane pata ni reqeme go Tamana. Ba vano Jiu go ṉalu iri vasakata pata go, Tamana i varitanae bana ne qira, tanego iri pala bana Tamana ia Mosese.

¹³ Tanego, gata na so kaega Tamana basoe i totoloṉoe de ikoego God, do ia tina zazu ne mana lulu a go pata ro i sine go Tamana.

¹⁴ Vano iriki Jiu go kaega iriki pala kaega Tamana ireqe me de ikoe go Mosese, do ṉalu nanao velaka ikoego puṉu qira, go iri zazu va gere ze go pata velaka ni totoloṉo go. Iago, patavolomo iriki pala go kaega Tamana ia Mosese.

¹⁵ Too velaka ria dena i vasadaka velake pata ni karo banae go Tamana ia Mosese, mana nanao totoloṉo ria dena i vasadaka napu ne qira so pata ni ogoto go. Tanego kakia ro ṉalu nanao qira tina vasakata qira, mana kakiaro ṉalu i bara va velaka ne qira go.

¹⁶ Iago zazao na Tarama velaka qa tarama ne go era dena, tina voto ṉalu tina doka go musaqara muzimuzi ṉalu God tina varitanae ne go nanao pipika ria basoero ne de ikoe go Jesu Kristo.

Zazao Na Tamana Ia Mosese Mana Vano Jiu

¹⁷ Iago, ava qamu go ramu? Ramu qamu degere ne tepa ia Tamana mana qamu vazaka napu ne tanuqamu, qamu basoero ia God.

¹⁸ Ramu qamu rove pata i soko go God tamuna zazu ne go, mana Tamana i varove qamu de igogo qamu vine go pata ni velaka go.

¹⁹ Ramu qamu nanao qamu mazala kenaqa ne qira vano iri ko gere qira vano kodo ne, mana ramu qamu gere go pazi tina tatavata ne qira go vano iri koego rodoko ne.

²⁰ Mana ramu qamu nanao qamu mazala vatatana qira vano iri koe go too bulaṉoi, mana vano iri ara kaebo go pala na tarove na too ria go. Iago, ramu qamu ogoto, tanego loborona ro Tamana qamu pala ze go tarove na osina pata mana ogoto go.

²¹ Iago qamu vatatana qira to basoero ne, do avigo tane qamu ki vatatana qamu go kaega tanuqamu? Ramu qamu tamana qira basoero ne kasi siko qamu go, do tanuqamu qamu siko so.

²² Qamu go kasi taunata, do tanuqamu qamu taunata. Qamu go kasi vazaka na God poqepoqe ro qamu zazu va bekua go qamu go do, qamu za sikoe pade iri varere ze go bekuro ria ne.

²³ Qamu vazaka napu ne Tamana ia God, do avigo qamu vamia qirae go basoero ne, vatovato go iri mia vaqoqore go God. Ramu qamu vasakate Tamana ia.

²⁴ Buka tabo ne igo, “Tanego i sauna vatovato sakata ramu vano Jiu dena, ia tanego vano iriki Jiu kaega iri vitoṉo vasakate go vitoṉo na God.”

²⁵ Iago, ṉalu ramu qamu lulua go Tamana na kosi na tokama qamu ianae i zari to mazala na, do ṉalu qamuki lulua go kaega Tamana, i tora mamu kasi kosi bana so.

²⁶ Vano iriki Jiu go kaega, i kaega ne qira vatovato na kosi, do ṉalu iri lulua Tamana igogo ne, God tina vari pada ne qirae so nanao ia de iri koe go vano iri kosi go.

²⁷ Iago vano iriki Jiu go kaega tarina lete sine vasakata qamu, tane go ramu qamu vae tamana. Patavolomo iri karo bana ne qamu mana ramu qamu kosi bana to go. Tanego ria ne patavolomo i kaega ne qira vatovato na kosi na tokama, do ria ne iri lulua pata i sine go Tamana ne.

²⁸ Iago basoe Jiu mara basoe Jiu ogoto to, mana kosi i vae go ne iki pata so kaega vasadakena tokamana go ni basoe Jiu ogoto go.

²⁹ Do basoe Jiu ogoto ne tina lulu ogote to pata velaka ni reqeme go puṉuna mana madauna go iara kosi ne go. Pataro dena iki reqeme kaega pata ni karoe go Tamana, do i reqeme zazu ia Spirit ia God. Mana basoe dena i tonovo ze vivitoṉo velaka de ikoego God.