Leta Ia Pol I Karo Ne Qira Basoero Na Rom 14 - Vato Vari Vakameka Voru Ia Batu Ne

Kasi Toere Na Too Ia Kene Basoe

¹ Muna vavelaka ne basoe i memelaka go vaogoto ia. Kasi vari valegu ne na pata i reqeme go nanao na basoe nae.

² Vaogoto ia tanuna basoe tane i soko go gena soso pata gege ne. Do basoe i kaega ne karaputa i makure tina gego pata manu.

³ Basoe ige go soso pata gege ne mara kasi vasakate na basoe iki ge go kaega pata i manu go. Mana basoe iki ge go kaega pata i manu go, mara kasi seko vasakate na basoe i gego soso pata gege ne. Tanego God i mao bana ne ia tane pata gege ige go nae.

⁴ Qo nanao akena tane aro go qo toere go basoe zazu ia kene basoe ne na? Tanuna so batu ia basoe zazu nae i mazala go toere na pata izazu ne go ia, tanego Batu ita ne so ikone go karaputa go tina tavisi ne go ia sauna pata nae.

⁵ Kameka basoe i nanao, kameka musaqara i mazala sivala ne go kero ne musaqara igo, do kene basoe ne i nanao igo, osina musaqara iri vari pada so igo. Iago, osiqamu muna nanao va velake pata ro igogo nae zazao na i reqeme go nanao qamu.

⁶ Basoe i nanao kameka musaqara nae to ilete mazala sivala ne go kero ne musaqara igogo ne, izazu ne sauna to go ivazaka zego Batu ne. Mana basoe ige go soso patagege ne izazu ne zeto sauna go ivazaka ze go Batu ne, mana iseko velaka ne zaqe God sauna pata gege nae. Gerena napu so basoe ikasi na go gena soso pata gege ne ivazaka napu ze so Batu mana iseko velaka ne zaqe so God go.

⁷ Kaega kakia i mazala go too ne go too ia tanuna, mana kaega kakia i mazala go ile ne le ia tanuna go.

⁸ Iago, ṉalu qata too, qa too e to Batu ne, mana ṉalu qate le qata le eto de ikoe go Batu ne go, iago ṉalu qata too ba le gogone qata ke lupo iaso batu ne.

⁹ Tanego sauna to ia dena Kristo ile, mana itoo napu mego tepa le ne, mana iato i Batu ne qira vano le mana vano too.

¹⁰ Iago, avigo tane aro qoki ge go kaega pata imanu go, qo seko vasakata go turamu ige go soso pata gege. Ṉalu aro qo ge go soso patagege ne qo seko vaqoqore go turamu iki ge go kaega pata gege i manu go? Ita osiqita tatana za degere so tarakenaqana God, mana ia so tinara za varitanae ne qita go.

¹¹ Tanego Buka tabo ne igo, “I pata ogoto sivala, era to qa Batu, naqa God qa too go osiqira basoero ne tarina koloku tutuṉe tarakenaqaqu era, mana tarina sine vasadake era to qa God go.”

¹² Iago ita osiqita tatana sine vasadaka ne God osina pataro qata zazu ne go.

Kasi Vasoru Zena Kaki Basoe Vasakata Pata

¹³ Iago ita mata mamanava poro varitanae ne qita tanuqita, kasi zazu nena kaki pata go tono vasoru zego turamu, go tina zazu ne go vasakata pata.

¹⁴ Era loborona ko kameka era de ikoe go Batu ita Jesu, ivarove zave kaega kaki pata gege isakata go. Do ṉalu kaki basoe i vaogote kakiaro pata gege iki dalo go kaega, igogo nanao na ne, pata gege nae mara kasi gena to.

¹⁵ Do ṉalu qo va maqata zego turamu sauna pata gege qamu ge go, aro qoki zazu ne kaega mamaligara. Iago, kasi vasakata na pata gege qamu gego, go tina vasakate go kaega basoe iie bana ne go Kristo.

¹⁶ Iago, kasi vamao ne na pata tina vasakate go vatovato velaka ramu.

¹⁷ Tanego de ikoe go too vari miasoka ia God sauna pata gege ba loka qamu ge, gogo ne iki za pata mazala bana so kaega. Do too ivalame go so Spirit tabo dena so lete mazala go, gerena to zazu ne na, too bulebule mana too kulakula go.

¹⁸ Ka basoe i zazu ne zego Kristo vatovato dena, ia iva kula God, mana tina va kula napu qira basoero iri zazu ne go.

¹⁹ Iago ala ita, mata pada ne pata tina tavisi ne qita go tatana koego bule mana go tatana vari vatatavisi ne go vakarapata na vaogoto ita go.

²⁰ Kasi vasakata zena zazu ia God sauna pata gege qata ge go. Tanego osina pata gege ro ne iri velaka lupo so. Do i sakata ṉalu qamu gego pata tina vasoru qamue go vasakata pata.

²¹ Pata i velaka go, kasi ge na to pata gege imanu go mana loka vino ba zazu ne na kakia pata go tina vasoru ze go turamu makuru.

²² Sotia pata qo vaogoto ze go pataro dena, mana ianae tina koe to de qo koego aro, mana God go. Ka basoe i nanao pata i zazu ne go itotoloṉo mana iki ruama ne kaega gogo ne, ia tina za kula.

²³ Do ṉalu kaki basoe i ruama nego sauna pata gege ige go, God tina vasakate ia, tanego iki rove kaega pata izazu ne, bana itotoloṉo ba iki totoloṉo kaega. Tanego pata iki nadue kaega vaogoto aro, do zazu ne qo gogo ne i kebu mana i vasakata pata.