Leta Ia Pol I Karo Ne Qira Basoero Na Rom 13 - Vato Vari Vakameka Voru Ia Batu Ne

Mata Vamazala Qira Vano Iri Kenaqa Nego Vudu Ro Ita

¹ Osina basoero mara vaogoto qira vano iri kenaqa nego vudu, tanego kaega kaki basoe i mazala go palana karaputa go tina kenaqa ne qira go basoero ne ṉalu iki mao nego kaega God. Tanego God so iteke ne qira go karaputa nae basoe go i batu ne qira basoero ne.

² Iato nae tanego, basoero iriki soko qira go kaega vano iri kenaqa nego vudu iriki soko napua so kaega pata ni taru bana mego God. Iago basoe i zazu ne go vatovato nae tarina vakimate.

³ Tanego basoero iri zazu ne go pata velaka iriki sareki ne qira kaega vano iri batu ne go vudu. Do vano iri zazu ne go pata sakata tarina sareki ne qira go vano iri miasoka go vudu. Iago muna zazu ne pata i velaka, go tarina kula ne qamu go vano iri batu ne go vudu ro ramu.

⁴ Tanego batu nae i basoe zazu ia God, go iara zazu ne go sauna velaka qamu ramu. Do ṉalu ramu qamu zazu ne go vatovato sakata, muna sareki ne ia, tanego karaputa i pala go, tina vakimata qamue go i totoloṉo. Tanego ia i basoe zazu ia God mana i zazu ne to vari vakimata ia de iri koe go basoero iri zazu ne go vatovato sakata.

⁵ Iato dena kutamana go pata tamuna vaogoto qirae go ramu vano iri batu ne qamu go. Iago muniki sareki ne zaqe so vari vakimata ia God, do nanao velaka i reqeme go loborona nanao qamu i sine bana ne qamu so.

⁶ Iato nae tanego qamu volia go takisi ramu. Tanego vano batu ro nae iri zazu ne sauna God ṉalu iri zazu ne go miasoka qamu ramu.

⁷ Iago, muna volia soso sinaqe na takisi ro i sine go Tamana, mana vasadake vamazala ramu mana vabatu ramu de iri koe go.

Zazu Ita De Iri Koe Go Kero Ne Basoe

⁸ Kasi lepulepu ne na kaki pata de ikoe go kaki basoe, do lepulepu ita to pata qata zazu ne zego kene basoe loborona mamaligara ita. Ṉalu basoe i mamaligara ne go kene basoe i lulua to Tamana.

⁹ Seko ro iri koe go Tamana igo dena, “Kasi taunata, kasi vae vale na basoe, kasi siko, kasi visare na patapata ia kene basoe go.” Osina seko na Tamana dena mana kero ne napu Tamana go i sapu lupo qira so kameka Tamana dena. Iago, “Muna mamaligara ne qira kero ne basoero gerena qo mamaligara nigo tanumu.”

¹⁰ Tanego basoe i mamaligara ne qira go kero ne basoero, ia iki mazala kaega tina zazu ne ze go pata sakata de ikoe go kene basoe. Iago ṉalu qata mamaligara ne qira go basoero ne qata lulua to ita, osina sekoro iri koe go Tamana.

¹¹ Iago ramu muna zazu ne to pata ro dena, tanego ṉalu de ita qata rove, i ṉalu ramu tamuna za dogara mego kamuku ramu. Tanego ṉalu ia God tina vakavele qita go i garogaro to, mana i sivala ne de qatara tupi mego vaogoto go.

¹² Kuse igarogaro to sivala mana musaqara igarogaro napu meto. Iago mata vana neto zazu nena pata na rodoko, do mata pala pata varitarana musaqara.

¹³ Mata vatotoloṉe too ita tanuqita gere qira basoero iri koe go tatavata na musaqara. Mata kasi ge loka sakata ro iri mazala go vabulaṉoe qita, kasi zazu ne na too vari vagabu, kasi zazu nena pata ilete mimia sakata sivala go ni tabo go, kasi varitara ba qora.

¹⁴ Do palataru vanadue de ikoe go Batu ita Jesu Kristo, go tatana vanama go varitara na de ikoe go soso pata sakata ro ne. Kasi luluna vatovato sakata ro ni poro soko go tokama qita ne.