Leta Ia Pol I Karo Ne Qira Basoero Na Rom 12 - Vato Vari Vakameka Voru Ia Batu Ne

Too Velaka I Soko Go God

¹ Iago turaquro tanego God imanava ne qita topu na ṉalu iago era qa pene vakaraputa qamu ramu muna teke ne zaqe God too ramu gerena kameka komakoma tabo go tina vakula go God. Iato nae de igogo ramu qamu ara mazala go tavatavara ogoto ne go God.

² Kasi vamao ne na too ramu mara lulua go vatotovato na vudu pua dena. Do muna vamao ne God, go mara kavele nanao qamu. Iato nae go ramu tamuna mazala go mia rove na pata ni soko go God, mana go tamunara rove go pata velaka ni va kula go God.

³ Tanego pata i teke bana nava go era God, era ma sine ne qamu. Muniki nanao vazaka qamu so tanuqamu. Do muna nanao lulusu qamu tanuqamu mana va lulu ze vaogoto ramu ni teke bana ne qamu go God.

⁴ Osiqita qata nogote kameka tokama mana i topu paqara ro, mana paqarana ro dena iri vaogo te soso zazu ro ria.

⁵ Gerena ianae, patavolomo ita qata basoe topu gonae, do ita qata gerena so kameka tokama, tanego qata lama kameka ego Kristo, iago lama kameka ita nae i gerena to topu na paqara ireqe go so kameka tokama.

⁶ Iago osiqita mata vazazua nogotona ro sosovolomo mazala ro i teke ne qitae go loborona manava ia God. Ṉalu sosovolomo mazala nae i soso na go tatana tarama ne go tarama velaka ia God, ita mata zazu ne ze to vaogoto qata pala go, patavolomo i suka, ba i lavata.

⁷ Ṉalu sosovolomo mazala nae i sauna zazu, ita mata zazu ne zeto sauna tavisi ne qira basoero ne ṉalu i sosovolomo mazala na go vari vatatana, ita mata vari vatatana to.

⁸ Ṉalu God i teke ne qita sosovolomo mazala go tatana vakaraputa qirae go basoero ne seko ita, ita mata zazu neto. Ṉalu basoe i pala sosovolomo na soso go tina teke ne qira go basoero kaki pata i toṉove go, ia mara zazu ne ze pata ogoto i ko mego loborona puṉuna. Ṉalu basoe i pala go sosovolomo na mazala go tina kenaqa ne qira go basoero ne, ia mara miasoka velaka qira to basoero ia. Ṉalu basoe qo vasadake go vari nanao aro de iri koe go basoero ne, ia mara zazu ogoto ne ze to pata ogoto i kome go loborona kula.

⁹ Tanego ṉalu qamu mamaligara ne qira go basoero ne, mara reqe me to mamaligara ogoto ramu. Iago vanaqe to pata i sakata mana palataru vanadua to pata velaka.

¹⁰ Muna vari mamaligara napu tanuqamu gerena qamu kameka tamakenae loborona Kristo.

¹¹ Muniki domaka, ne zazu vakaraputa osina ṉalu. Muna teke ne ze too ramu sauna zazu ne na Batu ne.

¹² Ruruqe ramu to mara vakula qamu go osina ṉalu. Kasi nonopa ne na ṉalu i lama doka qamu go kaki pata makuru mana ko ramu muna pene so osina ṉalu.

¹³ Muna soso patapata ro ramu de iri koe go vano iri makuru ne go kaki pata, muna vakeba velaka qirae komala ramu vano kakavata iri lamae go komala ramu.

¹⁴ Pene God go mara vamakaolo qira vano iri vasasakata ne qamu go. Pata ogoto muna pene iago mara va makaolo qira, do muniki tulaṉa ne qira.

¹⁵ Muna kula ṉalu qamu ko tavisi qira go vano iri kula go, mana muna dae ṉalu qamu ko tavisi qira go vano iri dae go.

¹⁶ Muna ko varikitalue de iri koe go kero ne basoero ne. Kasi vazaka napu qo sivala ne qira basoero ne, do muna toqe ne ko bule gere qira ria. Mana kasi nanao na qo tarove sivala ne qira basoero ne go.

¹⁷ Ṉalu kaki basoe i zazu ne ze kaki pata sakata de qo koe go, kasi soka vaule ne zena ia pata sakata. Do pada ne zazu zena pata velaka tarakenaqa qira basoero topu ne.

¹⁸ Muna pada ne zazu ne na vatovato velaka, go tamuna ko bule tavisi qira go basoero ne.

¹⁹ Turaquro, kasi vari soka soka ule ne na pata sakata de iri koe go basoero ne, do vamao ne God go mara zazu ne varitanae de iri koe go, tanego Batu ne i sine ze Buka tabo ne, “Era to i ko nava karaputa go tuna varatanae ne qira go basoero ne, mana tuna soka vaule ne qira go pata sakataro iri zazu ne go.”

²⁰ Do Buka tabo ne igo napu dena, “Ṉalu basoe i kana aro i saqo ono teke ne pata gege, mana ṉalu i kaṉoso ono teke ne besi, go mara ge besi. Ṉalu qo zazu ne go aro pata dena, ia tina lete agava sivala to.”

²¹ Iago, kasi vamao ne na sakata go mara va qoqori go, do vaqoqoro ze sakata nae loborona zazu velaka aro.