Leta Ia Pol I Karo Ne Qira Basoero Na Rom 10 - Vato Vari Vakameka Voru Ia Batu Ne

¹ Ramu turaquro, pata i lete soko qo puṉuqu era sauqira basoero ogoto era dena, qa soko mara kavele qa go. Iago qa pene taru ne qirae so God osina ṉalu.

² Era qa mazala varove velaka qirae na ria sauna soko ria iri lene go luluna vatavoto ia God. Do ria iriki rove vavelake kaega de gogo tarina zazune go.

³ Iriki rove kaega zuka na de igogo God go i vatotoloṉo girae go basoero ne de ikoego tanuna. Iri lete pada neso valuluze na vatovato ria tanuqira, iago iriki vamaone kaega God go tina valulu ze go zuka na de gogotina vatotoloṉo ze go basoe de ikoego tanuna.

⁴ Tanego Kristo i lama va mamanava bana to Tamana, go basoero iri vaogoto go, God tina vatotoloṉo qira go.

Vari Vakavele Ike Ria Osina Basoe

⁵ Pata i karo bana mego Mosese i sauna basoe go tina lama ko totoloṉoe go de i koe God ṉalu i lulua go Tamana. Iago, igo dena, “Basoe i lulua go pata i sine go Tamana tina too go.”

⁶ Do pata i sine go Buka tabo ne sauna basoe i lama totoloṉoe go de ikoego God. Igo dena, “Oniki sine ze nanaomu tanumu, akena tane tina popoka za go rani ne go tina lulu vaqoqoro mego Kristo?”

⁷ Mana kasi sine napu na, “Akena tane tina qoqoro zago uṉana go tina lulu vapopoka mego Kristo tepa le ne?”

⁸ Do pata i sine go, igo dena, “Tarama ia God i ko banae to de gamu koe go. Iato ikoego saqe qamu mana loborona puṉu qamu.” Ia to tarama na vaogoto qimu Tamana ne go remu.

⁹ Ṉalu aro qo tarama va velaka ne to Jesu i Batu mana go vaogote God i vatoo me ia tepa lene, ia tina vakavele go.

¹⁰ Tanego ṉalu ita qata vaogoto ze puṉu qita, mana vaogoto ita nae to, God i vatotoloṉo qitae go de ikoe go tanuna. Mana sauna tarama na velaka ita nae to God i vakavele qitae go.

¹¹ Tanego Buka tabo ne igo, “Ka basoe i vaogoto go, ia tiniki ara za agava kaega.”

¹² Ia dena i sapu lupo qira so osiqira, iki vari kakavatae kaega de iri koe go vano Jiu mana vano iriki Jiu go kaega. God i Batu lupo ne qira so osiqira, mana i teke ne qira pata velaka osiqira iri pene go.

¹³ Gerena Buka tabo ne i sine go, “Osiqira ria iri pene go loborona vitoṉona Batu ne sauna mara tavisi ne qira iri gogo, ia tina vakavele qira.”

¹⁴ Do ava tina gogo tarina pene go ia ṉalu iriki vaogote go kaega ia, mana ava tina go tarina vaogote go ia ṉalu iriki gata bana go kaega ka tarama na ia? Mana ava tina gogo tarina gata go ṉalu iriki tarama vasadaka bana ne girae go kaega?

¹⁵ Mana ava tina gogo tina sadaka go tarama nae ṉalu iriki turine go kaega basoe go tina za sine go? Iato nae go i sine go Buka tabo ne, “I lete vari va kula sivala lama qira basoero iri pala mego Tarama Velaka.”

¹⁶ Do iki osiqira kaega iri toqe ne go Tarama Velaka dena. Gerena Isaia i sine ne go, “Batu, ava via ria tane iri vaogote go tarama reremu?”

¹⁷ Iago, ita qata rove, vaogoto tina reqeme ṉalu qata gata go tarama, mana go tatana gata go Tarama Velaka ne, tina za reqeme ṉalu basoe i lama tarama ne sauna Kristo.

¹⁸ Do era qa tana napu, avigo, i ogoto tane ria iriki gata bana go kaega tarama dena? Kaega! Iri gata bana to, gerena i sine go Buka tabo ne, “Seko ria i za banae to osina basoero na vudu pua. Mana i za dokae to valupolupona vudu pua go.”

¹⁹ Era qa tana napu, avigo basoero na Izirel iri nanaorove ba? Kaega! Tupina Mosese i sine qira seko ia God, igo de, “Era tuna va zazu qira basoero ogoto na kaega vudu, go ria tarina qora ne qira. Era tuna va zazu qira basoero iriki nanao rove go kaega kapata, go ria tarina muma.”

²⁰ Mana Isaia i sine vakaraputa napu me seko ia God igo, “Basoero iriki taqiava kaega era, iri soba va. Era qa vasadaka ve tanuqu de iri koego basoero iriki tana ne kaega sauqu era.”

²¹ Mana seko ia God sauqira vano Izirel igo dena, “Osina to musaqara era qa koru taru qira, basoero iriki vaogoto go kaega, iri kuzuku lavata go, tanego qa lete soko qira tarina ule me de qa koego.”