Leta Ia Pol I Karo Ne Qira Basoero Na Rom 1 - Vato Vari Vakameka Voru Ia Batu Ne

¹ I Era Pol kameka basoe zazu ia Jesu Kristo, mana qa kameka apostolo God i vine ava mana i koru ava go tuna tarama ne Tarama velaka ia.

² Tarama velaka dena God i pui bana me ze de iri koego propetaro ne, go iri karo ze go Buka tabo ne.

³ Tarama velaka dena i sauna Jesu Kristo Batu ita iato i Sale ia. I pala tavise too ita vano basoe na vudu pua, mana i podo me sinaqe ia Davita.

⁴ Too totoloṉo, mana too tabo ia i vasadaka me karaputa ia Tuna ogoto God, go i too napu mego tepa le ne.

⁵ Mana de ikoe go Kristo God i teke nava era mazala go tuna apostolo go mazazu ne vasadakena Kristo, go basoero na vudu pua mara vaogote mana lulua ia.

⁶ Ia dena i palu tavisi qamu to ramu qamu koego kolabana Rom. God i koru bana qamu ramu go tamuna basoero ia Jesu Kristo.

⁷ Iago, qa karo ne qamu ramu basoero topu qamu koe go Rom, tanego God i mamaligara ne qamu, mana i koru qamue basoero ia tanuna. Go God Tamaqita mana Batu ita Jesu Kristo mara riru teke ne qita mana, mana bule ia.

Pene Na Sosovolomo

⁸ Kenaqana pata loborona vitoṉona Jesu Kristo, era qa seko velake God sau qamu osiqamu, tanego vaogoto ramu sauna Kristo iri gata bana ze osina dia kolabana vudu pua.

⁹ Tanuna God i mazala go vasadakena ogotona seko era, iato qa zazu ne ze go osina karaputa i reqeme go puṉuqu, ṉalu qa tamana ne go Tarama velaka sauna ia. Iago God i rove era qa nanao taru qamue go ramu pene era.

¹⁰ Osina ṉalu qa lotu go, qa pene ze God loborona seko velaka ia, ia tina vamao ava era go tuna garetu tove qamu go.

¹¹ Tanego i loda me to soko era qa soko go mia qamu, go ma teke ne qamu kavia nanao va karaputana madau qamu.

¹² Zazao na seko era dena, ita mata vari vatatavisi napu tanuqita, go vaogoto rera mara tavisi qamu ramu, mana vaogoto raramu mara tavisi nava era go.

¹³ Ramu turaquro muna nanao tarua, topu ṉalu era qa nanao tove qamu, do torana dena iara ko nava pata i toqo taruava. Era qa soko mava tabali me qirae de ikoego Kristo basoero iri koe go de qamu koe go, gere na qa zazu bana ze go de iri koe go vano iriki Jiu go kaega.

¹⁴ Tanego iara ko nava zazu de iri koe go basoero topu ni soko vego God, sau qira basoero iri koe go komala masimasi iri poro reṉa ne go topuna pata, mana vano iri koego komala sasaniqa iri baila ne mia na topu pata. Mana de iri koego vano tarove mana vano iriki tarove go kaega.

¹⁵ Iato nae tanego era qa lete soko go tamana ne na Tarama velaka de qamu koe go ramu basoero qamu koe go Rom.

Karaputana Tarama Velaka Ia God

¹⁶ Qa taru lupo zeto ruruqe era loborona Tarama velaka. Tanego iato i karaputa iago God go i mazala go va kavele qira go osiqira basoero iri vaogote go. Vano Jiu iri gata kenaqa mego, mana taramuzina iri ara gata go vano iri ki Jiu go kaega.

¹⁷ Tanego Tarama velaka i vasadake de igogo God i vatotoloṉo napu me qira go basoero ne de ikoego tanuna. Gerena i sine go Buka tabo ne. “Basoe i vatotoloṉo napua go vaogoto ia de ikoe go God, basoe nae tina pala too ogoto.”

Kebu Ria Vano Basoe

¹⁸ Muma ia God i vasadaka me ze rani ne, go tina vakimata qira basoero iri zazu ne go vatovato sakata go iri vasakata pata go mana vatovato sakata ro dena i midiki ne ogotia God tina sadakae go de iri koe go basoero ne.

¹⁹ Iago, God tina vakimata qira, tanego pataro iri mazala go rove zena God basoero ne i nama bana me so de iri koe go. Tanego God tanuna i varove velaka qirae go.

²⁰ Pasi God i vazaria go vudu pua basoero iri mazala to nanao rovena karaputa ia i ko gadokutona i kaega, mana iato i God go. Iago basoero ne iri mazala to nanao rove zena God sauna pataro iri mia i vazaria go dena. Iago basoero ne mara kasi ara vavarito napu nena.

²¹ Iri rove ria tane God, do iri kasi qira so va batu na, mana i kaega ne qira so seko velaka na ia. Nanao qira i kaega so kaki pata velaka ikoego. Mana kuzuku qira i kokoba i purake so too rodoko ro ne.

²² Patavolomo iri go iri lete tarove, do iri ara lete bulaṉoi so.

²³ Iri vanane de igogo vazaka na God i too gadokutona i kaega; Gonae ria iri vazaka beku taqa iri zazu vagere ze go tatalina basoe, ba palero mana pata qaraqararo.

²⁴ Tanego basoero dena iri lete bulaṉoi sivala. Iago God i taru qira go mara ria lulua so nanao qira tanuqira, sauna pata sakata ro iri zazu nego ni soko go puṉu qira. Iri zazu neto pata sakata go iri vasakata napua to tokama qira tanuqira go.

²⁵ Iri kasi qira vaogote na, God ogoto, do ria iri vaogote so patapoqe ro dena. Iri vazaka so pataro i vazaria go God, do God tane i tora go vazakana osina ṉalu topu ro ne Amen!

²⁶ Tanego sauna to vatovato sakata ro ria basoero dena, iago God i taru qira, mana basoero dena iri lulua to vatovato sakata ro ni soko go nanao qira. Patavolomo tanuqira qolero, do iri vazazu vasakate tokama qira tanuqira loborona vari sokoe nena tokama qira.

²⁷ Gerena napu so valeke ro, iriki mia kaega qole, do iri vari sokoe napu so tanuqira. Iago zazu sakata ria nae God i lete vakimata qira.

²⁸ Tanego basoero ro iri kasi qira soti ze na nanao ria sauna rove velake na God. Iago, God i taru qira go mara ria lulua to vatovato sakata ro iri zazu nego, mana iri zazu ne to pata ro iki tora go kaega zazu nena.

²⁹ Iago nanao qira ne i purake to soso adoado na vatovato sakata ro. Iri le ne pala na patapata ria basoero ne. Iri vasakata qira basoero ne, iri poro misi, iri vae vale basoe, iri varitara iri muma ne qira basoero ne, mana iri poro pepeu valu qira basoero ne go.

³⁰ Iri vari seko sakata tanuqira mana kana ne God, iri damua kene basoe iri vazaka napu, mana iri poro legulegua tamaqira mana sinaqira go.

³¹ I kaega bana so ka nanao velaka ria. Iriki sotia kaega pataro iri pui ne go, mana i kaega ne qira too vari nanao, mana vari tatavisi go.

³² Iri rove tamana ro ia God i sine go, basoe i zazu ne go vatovato dena i tora ia tina le ne go. Do ria iriki mamanava kaega, mana iri zazu taru ne so. Iago iri kula ne ria tane basoe kakavata i zazu tavisi ne go vatovato dena.