Revaleson 8 - Vato Vari Vakameka Voru Ia Batu Ne

Vavituna Pata Varoroto Na Vivolona Pepa

¹ Ṉalu Tunana Sipi ne i kaqolo vakuziki napua pata varoroto na vivolo na pepa ne i kaega to kaki naki, i naki ego rani ne torana takoboro na aoa.

² Taramuzina ianae, era qa mia kavitu aqelo iri teke ne qira kuvili mana iri degere tarakenaqana na God go.

³ Kakia napu aqelo ne i pala go ebata qolu na insenisi ne i lama degere go sara ne, iri teke napu ne ia topuna insenisi go tina palu zaqe pepene ro ria basoero ia God, iri tavatavara zaqe go sara qolu ne tarakenaqana de kolokoloku batubatu ne.

⁴ Kauku na insenisi ne i popoka palua pene ria basoero ia God, i reqe mego ebata qolu i pala tarua go aqelo ne, mana iza dokae tarakenaqana God.

⁵ Goto nae aqelo ne i pala nako na sara ne, mana i vapuraka zaqe insenisi ne mana i vana zaqe kolabana pua ne. Pasi nae i qumara me, i kapi, pakala i poto mana kameka nunu lavata i vizua vudu pua ne.

Aqeloro Ne Iri Puqo Kuvili

⁶ Gonae kavitu aqelo ne iri pala tarua kuvili ria, iri vanama neto puqona.

⁷ Aqelo kenaqa ne i puqoto kuvili ia, gonae aisi mana nako i lomire go parasa i tazele me vudu pua igere nare ne. Mana takoboro na vudu pua ne, i subi palua to takoborona moki ro, mana osina to seuseu kurikuri iri koego.

⁸ Gonae varuana aqelo ne i puqo napua kuvili ia, kaki pata i gere kubolo i subi e nako ne, iri vana zaqe masi ne. Takoborona masi ne i parasa,

⁹ takoborona pata too ro, iri koego masi ne iri le lupo to, mana takoboro na koluka ro iri zale go masi ne, iri sakata lupo.

¹⁰ Vapisana aqelo ne i puqo napua kuvili ia. Kameka domiri lavata i kamu, igere uquluna nako ne i reqe mego rani ne, i lama sorue takoborona besi uguru ne, mana besi sukasuka ro go.

¹¹ Vitono na domiri lavata ne “Pani”, takoborona besi ro dena i taitana mana i pani, basoero iri besia go besi dena iri le lupo, tanego besi dena ne i pani.

¹² Vavasina aqelo ne i puqo napua kuvili ia, mana kameka takoborona saṉa mana kameka takoborona inaqa iri rodoko mana gerena napu so domiri ro go. Kameka musaqara mana kameka kuse iki tatavata kaega.

¹³ Gonae qa reṉa qa go, qa mia kameka kamaqa lavata i bauke zakazaka ne igo dena, “Ke makuru lavata sivala tina dokae go basoero na vudu pua ṉalu tarina gata go kuvili iri puqo go kapisa aqelo ne!”