Revaleson 7 - Vato Vari Vakameka Voru Ia Batu Ne

Basoero Ia God

¹ Taramuzina pataro dena, era qa mia zaqe kavasi aqelo iri degere kavasi tumu na vudu pua go tarina kokua go seva tina za go mego nae, go tiniki kuire go kaega vudu pua, masi mana moki ro go.

² Mana qa mia napua kakia aqelo i za popoka me tepa keba na saṉa ne, aqelo nae i pala me lala ria basoero ia God ni teke ne qira go too. Aqelo ne i koru valavata qira qe ria kavasi aqelo ni teke ne qira go God karaputa go tarina vasakate go vudu pua mana masi lavata go.

³ Aqelo ne igo, “Kasi vasakatena tekere vudu, masi ba moki ro go, remu mi taru ze tekere kameka lala rae qira basoero zazu ia God.”

⁴ Iri sine nava, iri go topu qira basoero ia God ikoego lala rae qira ne i 144000. Basoero dena ria to iri reqe mego manoga karua sinaqe ria vano Izirel.

⁵ Sinaqe ia Jiuda manoga karua mao ria. Sinaqe ia Reubin manoga karua mao ria. Sinaqe ia Qad manoga karua mao ria.

⁶ Sinaqe ia Asa manoga karua mao ria, Sinaqe ia Napatali manoga karua mao ria. Sinaqe ia Manase manoga karua mao ria.

⁷ Sinaqe ia Simion manoga karua mao, sinaqe ia Livae manoga karua mao ria. Sinaqe ia Isaka manoga karua mao.

⁸ Sinaqe ia Zebelon manoga karua mao ria, sinaqe ia Josepo manoga karua mao ria mana sinaqe ia Bejamani manoga karua mao ria go.

⁹ Taramuzina pata dena, qa mia zaqe topu sasakata basoero i makuru go qana qira, basoero dena iri reqe me soso sinaqe na basoero, soso vuduro mana soso sekoro go, iri va roku kakasa mana iri pala ubi, gonae iri za degere tarakenaqana de kolokoloku ia Batu ne mana Tunana Sipi go.

¹⁰ Basoero dena iri koru valavata, iri go, “Vari vakavele ita, i reqeme de ikoego God ita i koloku ego de kolokoloku ia, mana Tunana Sipi ne go.”

¹¹ Gonae osiqira aqelo ro ne mana kazigarata ro, mana kavasi pata qaraqara too ne, iri soru kapate tarakenaqana de kolokoloku ne mana iri vazaka God.

¹² Iri go, “Iogoto sivala! Vazaka, karaputa mazala, tarove, seko velaka, vabatu, karaputa mana moqere gogo ne, i reqe meso de qo koego aro God remu, qo ko osina ṉalu topu ro ne, Amen!”

¹³ Kaki kameka ria vano kazigarata ne i tana nava era, “Ake ria bana tane iri va keba nego roku kakasa ro nae, mana adi tepa tane iri za reqe mego na?”

¹⁴ Era qa go, “Qaki rove kaega, kadigo aro tane qo rove go”. Gonae i sine nava igo, “Basoero dena to iri vasivala ne go makuru lavata iri zazu ne qira e go. Iago ninidena iri lama saboro vadalo roku ria mana iri vakakasa ze parasana tunana sipi ne.

¹⁵ Iato go iri degere go tarakenaqana de kolokoloku batubatu ia God mana vazaka ia kuse mana musaqara loborona pade tabo ia. Ia i koloku ego de kolokoloku batubatu ia tina miasoka mana ko tavisi qira go.

¹⁶ Ria tariniki ara saqo to kaega ba lene ne na kaṉaso go. Patavolomo ila na saṉa ba kaki pata napu, tiniki ara vasakata qira kaega.

¹⁷ Tanego Tunana Sipi ikoego vari loborina de kolokoloku ia Batu ne tina miasoka qira gerena valeke miasoka sipi, mana iato tina kenaqa qirae go besi vuala, tina teke ne qira go besi na too ogoto mana God tina qulaze sosone na mata qira, go tariniki ara maqata napu go kaega.”