Revaleson 5 - Vato Vari Vakameka Voru Ia Batu Ne

Vivolona Fepa Mana Tunana Sipi

¹ Era qa mia kameka pepa vivolo i pala tarua go valeke i kolokue go de kolokoloku ia batu lavata ne. Pepa dena iri karo karua tepa na ne, mana kavitu dia iri varoroto vanadu ze go.

² Mana qa mia kameka aqelo i ko ne mazala i seko valavata me, igo, “Akena to i tora go tina kaqole go pata iri vanadu ze go pepa vivolo dena, go tina papaqa go.”

³ Do kaega ka basoero iri koego rani, ba basoero iri koego vudu pua dena, ba vano iri koego vudu ria vano le, i mazala go papaqa na go tina mia zaqe loborona ne.

⁴ Qa lete vokara neto mana qa dae, tanego i kaega to ka basoe i torago tina papaqa go pepa dena, go tina mia zaqe loborona ne go.

⁵ Gonae kaki kameka kazigarata i sine nava, igo de, “Valeke kasi dae aro, mia basoe mazala sivala na to vapopodo ia Davita, iato i laioni na Judia nae to i karaputa bana ne go varitara dena. Iago basoe nae to i mazala go kaqole na mana papaqana pepa vivolo iri vanadu ze go kavitu dia iri varoroto ze go.”

⁶ Gonae qa reṉa ne zaqe Tunana Sipi i degere kolo iago. Tunana Sipi dena ne i gere pata iri vae vale bana go, i zari kavitu kiso na mana kavitu matana go, ianae ne iato kavitu Spirit ia God ni vazao ze go osina dia kolabana pua ne.

⁷ Gonae Tunana Sipi ne i za pala ze karisi matauna valeke i koloku ego de kolokoloku batubatu ne pepa vivolo ne.

⁸ Torana i za pala go vivolo pepa ne Tunana Sipi ne, kavasi pata qaraqara too ne mana karabete kavasi kazigatata ro ne, iri soru kapate tarakenaqana Tunana Sipi ne. Osiqira iri vabatua ia mana iri pala pata nakinaki ro ria mana iri pala tarua ebata qolu ro iri vapuraka ze insenisi, ia dena i sauna to pepene ro ria basoero ia God.

⁹ Iri vae kera voru, iri go, “Aro bana so i tora go tono pala go pepa vivolo nae, mana papaqana de iri varoroto vanadua go. Tanego iri vae vale bana go, le aro ne i gere tavatavara i bauru ne basoero ia God iri reqe me osina ro sinaqe ro, soso seko ro, soso vudu ro, mana soso tatalina basoero go.

¹⁰ Aro to qo batu lavata ria, mana aro to qo lama va patere qira, go tarina na vazaka God ita. Mana ria nae to tarina kenaqa ne qira basoero na vudu ne.”

¹¹ Ṉalu qa reṉa napu aqe qa gata mao na aqelo ro iri kera. Topu na aqeloro iri teṉo go nae, i makuru to qana qira! Iri degere ligute de kolokoloku batubatu ne, ria to aqelo ro de, kavasi pata qaraqara too, mana kazigarata ro ne.

¹² Iri kera valavata, iri go dena, “Iato Tunana Sipi iri vale bana go dena, i torago tatana vazaka, karaputa ia, vavagado ia, tarove ia mana moqere ia. Iago itora ita mata vazaka mana vabatua menomeno mazala ia osina ṉalu topu ro ne!”

¹³ Gonae qa gata osina pata too i vazaria go God, iri koego vudu rani, vudu pua mana vudu ria vano le, loborona masi ne mana osina dia kolaba ne go. Osiqira dena iri kera, iri go’ “De i koego ia i kolokue go de kolokoloku batubatu ia mana Tunana Sipi gogo ne, mata vazaka mana vabatu qirue sauna menomeno mazala mana karaputa riru i ko osina ṉalu topu ro ne.”

¹⁴ Gonae kavasi pata qaraqara too ne, iri vataule iri go, “Amen!” Mana kazigarata ro ne, iri koloku tutuṉu mana iri vazaka qiru go.