Revaleson 4 - Vato Vari Vakameka Voru Ia Batu Ne

Vano Na Rani Ne Iri Vazaka God

¹ Taranumna pataro dena, qa mia napua siporaṉa na rani ne i papaqa. Mana ovaṉa i gere go naki na koqo i seko tabe banava go, igo de, “Lamae zakazaka dena go ma vamia zigoe pataro tinara lama sadaka napu go.”

² Torana so nae karaputa ia Spirit tabo i lama doka va era. Pasi nae qa mia zaqe de kolokoloku ia batu ne, i kolokue kameka basoe.

³ Tarakenaqana basoe nae i gere damara na karua ipaka dulikana menomeno, liqutuna de kolokoloku ia batu ne kameka solobio i liqute go mana damara na ne i duviduvi gere ipaka lete menomeno sivala go.

⁴ Liqutu na de kolokoloku ia batu ne iri koe karabete kavasi kazigarata ro ne, mana iri vakeba ne roku kakasa loda, topatopa iri vakeba nego i qolu.

⁵ De kolokoloku ia batu ne, i za reqe me tatavatana ro kapi. Nae ne qa gata zaqe qumara na ro pakala i sorue go. Tarakenaqana de kolokoloku ia batu ne, i kamue kavitu pazi, ria nae kavitu Spirit velaka ia God.

⁶ Vari liqitu napu na de kolokoloku ia batu ne, i gere sirosiro na loka na masi ne i lete tatavata sivala. Kavasi tepa na de kolokoloku ia Batu ne, iri koe kavasi pata qaraqara too i topu go mata qira, i koe tarakenaqana qira mana taramuzi qira go.

⁷ Ke kenaqana pata qaraqara ro nae ne i mimia gere laioni, ke varuana ne i mimia gere buluka ne, ke vapisana ne tarakenaqana i gere basoe mana ke vavasina ne i gere kamaqa i bauku go.

⁸ Nogoto qira kavasi pata qaraqara ro dena, i zari kaonomo babalakuru qira, mana mata qira i kakabu lupoe so osina dia tokama qira. Musaqara mana kuse iri kera taru so mana iriki mamanava kaega. Kera iri kera nego, igo dena, “Tabo, tabo, tabo ikoego God Batu ita i moqere sivala go. Ia i ko bana meso, i ko ninidena mana tinara za lama napu go.”

⁹ Kavasi pata qaraqara dena, iri kera vazaka vitoṉona ia iri seko velaka ne zaqe mana iri vabatua ia iki rove go kaega le, i kolokue go de kolokoloku batubatu ia ne. Osina ṉalu iri zazu neso vazaka dena.

¹⁰ Karabete kavasi vano kazigarata ro dena, iri soru rabatavakapate tarakenaqana ia ni koloku ego de kolokoloku batubatu ia, mana iri vazaka ia i too go osina ṉalu topu ro ne. Gonae iri vakekele ze topatopa ria tarakenaqana ia, mana iri kera,

¹¹ “Ke God mana Batu remu, aro qo vazaria go osina pata i koego kolabana pua ne, mana aro qo teke ne too osina ro pata, tanego iato nae pata qo soko go aro. Iago i tora remu timuna teke nigo aro vazaka, karaputa menomeno go.”