Revaleson 22 - Vato Vari Vakameka Voru Ia Batu Ne

¹ Gonae aqelo ne i vamia zave besi uguru na too i damara gere duviduvi na sirosiro i za reqe me de kolokoloku batubatu ia God mana Tunana Sipi ne go,

² besi nae i zazaraṉa qoqoro za variloborina zuka lavata na komala lavata ne. Karua rikisina uguru ne, i podo e moki na too i ure taru kameka ṉalu nogotonaro inaqa torana manoga karua ṉalu kameka masirani. Uguru qira moki ro dena i vole vavelaka ze mokoso qira basoero na kolabana pua ne.

³ Kaega to kaki pata sakata niki soko go kaega God, tina vakeba ze go komala lavata dena. De kolokoloku ia God mana Tunana Sipi neso tina koego komala lavata ne. Vano zazu iato tarina vazaka go ia osina ṉalu.

⁴ Ria nae so tarina reṉataru ne go ia osina ṉalu, mana vitoṉona ia tina karoe rae qira go.

⁵ Komala dena tina kaega kuse na, iago iriki soko ze kaega tatavatana pazi ba saṉa go tina vatatavata ne go. Tanego tanuna God Batu ne tina tatavata ria, mana ria tarina batu lavata osina ṉalu topu ro ne.

Jesu Tina Lama Napu

⁶ Gonae aqelo ne i sine napu nava, igo dena, “Seko ro dena i pata ogoto mana ono ruqe go. God Batu ne i valame go Spirit ia de iri koego propetaro ia. Ia i turi nava era go tuna vamia qirae go vano zazu ia, pataro tiniki umata kaega tina lama sadaka go.”

⁷ Jesu igo, “Gata! Era tiniki umata kaega tuna lama napu! Kula de iri koego basoero iri vaogote mana lulua seko ia God, i koego loborona buka dena!”

⁸ Era, Jon, tane qa gata mana qa mia go osina pataro dena. Ṉalu qa gata mana qa mia lupo go pataro dena, qa koloku tutuṉue tarakenaqana aqelo ne, go ma vabatua, qa go.

⁹ Do ia i sine nava, igo, “Oniki vabatu ava era! Era qa basoe zazu gere go so aro, mana ria turamu ro, vano propetaro, mana ria iri vaogote go seko na buka dena, iago, ono vabatua so God!”

¹⁰ Gonae i sine nava, “Oniki pika sekoro iri koego buka dena. Tanego ṉalu tina sadaka go pataro dena i garogaro meto.

¹¹ Ka basoe i zazu nego pata sakata mara tonia zazu sakata ia, ka basoe izazu nego pata iva poṉo go too ia, mara tonia pata i va poṉo go too ia. Ka basoe i zazu ne pata ni velaka mara tonia zazu velaka nae, mana ka basoe iva tabo go too ia, mara va tabo tarua too iago.”

¹² Jesu igo, “Gata! Era tiniki umata kaega tuna lama napu. Mana tuna pala me voli qira basoero ne, tina lulua so pataro iri zazu nego basoero ne.

¹³ Era to qa kenaqana mana muzimuzi na osina ro pata. Era to qa tutupiana mana muzimuzi na osina ro pata. Era to qa tutupiana mana lupolupo na osina ro pata.”

¹⁴ Kula sivala ria vano iri saboro vadalo go roku ria. Tanego ria nae tarina ge go urena moki na too mana tarina za kebae go siporaṉa na komala lavata ne.

¹⁵ Do basoero iriki agava ne kaega vasadake na vatovato sakata ro ria, vano zazu tatakiu, vano vari vagabu, vano iri vae vale basoe, vano iri vazaka go beku poqepoqe ro mana vano iri poqe ne seko mana vatovato ria gogo ne, tarina koe so pekapeka na komala lavata ne.

¹⁶ “Era, Jesu qa turi ne aqelo era, go tina sine ne qira basoero na eklesia ne. Era qa podoe sinaqe ia Davita mana qa gere go domiri dodola, ni tatavata mego sarusaruku lolotoro ne.”

¹⁷ Spirit tabo mana qole busi ne iru go, “Lama!” Basoero iri gata go seko dena, mara sine napua, “Lama!” Lama, ramu qamu konoso go mana besia, besi na too ikaega go volina.

Seko Valupolupona Buka Dena

¹⁸ Era, Jon qa lete seko vabanabana qira vano tarina gata go sekoro ia God i karo go buka dena. Ṉalu kaki basoe i palu zaqe sekoro ia tanuna loborona seko ia God ikoego buka dena ne, God tina vapala ze ia kimata ro i sine zego loborona buka dena.

¹⁹ Mana ṉalu kaki basoe i vakuziki ne seko ia God ikoego buka dena, God tina pala vakuziki ne todo na basoe nae mana tiniki ge kaega urena moki na too mana tiniki keba e kaega komala tabo, i karoe go buka dena go.

²⁰ Basoe i sine vasadake go osina pataro dena, igo, “I pata ogoto! Era tiniki umata kaega tuna ule napu me.” Amen. Ke Jesu Batue Lama to aro!

²¹ Go Mana ia Jesu Batu ne mara ko tavisi qira osiqira basoero ia God.