Revaleson 20 - Vato Vari Vakameka Voru Ia Batu Ne

Kameka Mao Masirani

¹ Gonae qa mia napua kameka aqelo i za qoqoro me rani ne mana karisi na i pala taru ze bolu na ulana ne, mana kameka seni maqata go.

² Ia i qolo vanadua dole ratovo i ko bana mego ṉalu bana ne, iato qata vitoṉo zego Satana, mana i qolo taru ze ia seni lavata torana kameka mao masirani.

³ Gonae aqelo ne i vanaqe zaqe Satana ne bolu na uṉaṉa ne, mana iva roroto vanadua siporaṉa na. Go Satana ne tiniki va soru qirae kaega vasakata pata basoero ne. Do taramuzina kameka mao masirani, ria tarina va sipore Satana desuka so ṉalu.

⁴ Qa mia napua kakiaro de kolokoloku ro ia batu ne. Ria iri kolokue go ne, ria to iri pala go karaputa go tarina varitanae ne qira go basoero ne. Qa mia napua madau qira vano iri kodaka bana go kuzuku qira, tanego iri sine vasadake go ogotona seko ia God i tarama nego Jesu. Basoero dena iriki vazaka kaega pata qaraqara piru ne ba beku na go. Iriki taru ze kaega lala ia pata piru ne rae qira ba karisi qira. Ṉalu nae iri too napu me tepa le mana iri lama batu lavata tavise Kristo torana kameka mao masirani.

⁵ Ia dena, i vari vatoo kenaqa God i zazu ze de iri koego vano le. Do osiqira kero ne vano le God iki va too qira kaega, do tarina piri ne so kameka mao masirani tina lupo go.

⁶ Kula mana makaolo i ke ria to vano iri pala go vari vatoo kenaqa dena. Tanego varuana le i kaega ne karaputa de iri koego ria. Ria tarina patere ia God mana Kristo, ria tarina batu lavata tavise ia torana kameka mao masirani.

Satana I Qoqoro To

⁷ Ṉalu tina sivala to kameka mao masirani, tarina lukasa ze Satana de iri qolo taru zego.

⁸ Ia tina za mana vaqoqo qira basoero na kolabana pua ne, iri vitoṉo qirae go sinaqe na Gog mana Megog. Satana ne tina pala qoqoṉo qira basoero de mana tarina varitarae de ikoego God. Basoero ia Satana ne tarina gere topuna karikoni ne.

⁹ Tarina zae osina dia vudu pua ne, mana tarina za liqute de iri teṉo ego basoero ia God. Iato komala lavata God imamaligara nego. Patavolomo nae, nako i reqeme rani ne i lama subi vasakata lupo qira so go.

¹⁰ Gonae Satana ni vaqoqo qira go basoero ne, iri vanaqe zaqe bolu na nako i poto sadaka mego loborona pua ne, de igogo to iri vanaqe bana qiru aqe go pata qaraqara piru mana propeta poqepoqe ne, de go tarina vokara kuse mana musaqara mana tiniki rove kaega lupo go.

Vari Tanae Muzimuzi

¹¹ Gonae qa reṉa napu ne kameka de kolokoloku ia batu, i lete kakasa go, mana kameka basoe i kolokue go. Gonae rani mana pua iru zaga mana kaega to ka basoe iara miasoka qiru go.

¹² Mana qa mia qira vano iri le bana go, vano iri pala mazala mana vano volomo, iri lama degere tarakenaqana de kolokoloku ia Batu ne. Iri papaqa buka na too, mana iri papaqa napu buka i koego osina pataro iri zazu nego vano basoe ara too iri vaego. Valeke ne i zazu ne varitanae ia, lulua so pataro iri zazu nego basoero ne, ikoego loborona buka ne.

¹³ Vano iri le go loborona masi iri zae de ikoego God go tina varitanae ne qira go. Le mana komala uṉaṉa ne iru va malumu ne me qira vano le riru, go God tina varitanae ne pataro iri zazu bana nego.

¹⁴ Gonae le mana vudu na uṉaṉa ne iri vanaqe qiru aqe bolu na nako ne. Bolu na nako dena to i varuana go le ne.

¹⁵ Basoero iki karo ego kaega vitoṉo qira buka na too dena, ria to nae tarina vana qira qe go bolu na nako ne.