Revaleson 2 - Vato Vari Vakameka Voru Ia Batu Ne

Seko Tina Vazao Zego Eklesia Na Epesus

¹ Valeke ne i sine napu nava era igo dena, “Ono karo ne zaqe Aqelo ni koego Epesus. Iato dena sekoro era, valeke qa pala taru zego kavitu domiri ne karisi matauqu, mana qa goe go vari lobori qira pazi qolu ro ne go.

² Era qa rove de igogo zazu ramu, mana qa rove de igogo zazu vokara ramu sauna karaputa ramu. Qa rove era tane qamuki soko qira kaega vano sakata. Mana qa rove era tane qamu padane qira vano iri apostoloro iri gogo, do taramuzina ramu qamu rove to, iri vano poqepoqe bana go.

³ Qa rove era tane pala taru vanadu raramu, mana qamuki vana ne kaega vaogoto ramu, patavolomo basoero ne iri va vokara ne qamu go sauqu era.

⁴ Do kameka pata qaki soko qamue go kaega ne, ramu ninidena qamuki mamaligara nava to kaega era, gerena kokoso na bana me.

⁵ Muna nanao ule zaqe de igogo ko velaka bana ramu kokosona bana me na ne. Ninidena ramu muna taleqe ule me de qakoego era. Vana ne vasakata pata ro ramu mana zazu ne pata velaka ro qamu zazu ne me kokosona ne. Do ṉalu qamuki vana ne kaega vasakata pata mana vatovato sakata ro ramu, era tuna lama pala vaule pazi ramu nae.

⁶ Ba kameka pata qamu lete velaka nego ramu, qamuki soko kaega vatovato ria vano iri lulua go vari vatatana ia Nikolasi. Era do qaki soko to kaega vatovato ria nae.

⁷ Iago ṉalu i kone qamu go qeqele, muna gata seko ia Spirit tabo i sinene qira go eklesia ro ne. Basoero iri kasia go too mana vatovato sakata ro ne, era tuna teke ne qira velaka, mana tuna vamao ne qira ge na moki na too i podo ego barue ia God.”

Seko Tina Vazao Zego Eklesia Na Simina

⁸ Ia i seko, igo napu dena, “Ono karo ne zaqe aqelo na eklesia na simina. Iato dena seko era, valeke qa kenaqana mana lupolupo nago osina ro pata. Qa le bana mana qa too napu mana tuniki ara le kaega go.

⁹ Era qa rove napua qamu ramu soba makuru mana qamu situ go, do qamu vavagado napu so. Qa rove basoero iri seko vasakata qamu go nae ne, iriki vano Jiu ogoto kaega, basoero nae ne iri vano zazu ia so Satana.

¹⁰ Muniki sareki, ṉalu kaki pata makuru tina lama doka qamu go. Muna gata! Satana tina pada ne qamu ramu, mana tina taru qamue bara ne go. Ramu tamuna pala vokara go tina za dokae manoga musaqara. Do muna vanadu zeso vaogoto ramu de qa koego era, patavolomo tamuna soba ze le. Ṉalu basoe i za karaputa ego varitara nae, era tuna sasarapa ze ia too voru iki rove go kaega za lupo.

¹¹ Ramu i ko ne qamu go qeqele muna qata seko ia Spirit tabo iri sine ne go eklesia ro ianae. Ia i karaputa ego varitara dena, tiniki ara za vokare kaega nako ne, taramuzina le ia.”

Seko Tina Vazao Zego Eklesia Na Peqamam

¹² Ia i seko, igo napu de, “Ono karo napu ne zaqe Aqelo na eklesia na Peqamam. Iato dena seko era, valeke qa pala tarua go pegi loda i zogoto go karua tepana ne.

¹³ Era qa rove, ramu qamu koe loborona vari miasoka ia Satana, do ramu, qamu ara pala taru vanadua so vitoṉoqu era, mana qamuki vana ne kaega vaogoto ramu de qa koego era go, patavolomo iri vae vale go Antipasi vasadake go too mana vatovato velaka ia, tanego i vaogoto ava era.

¹⁴ Do kavia so pata qaki soko ze kaega de qamu koego ramu ne, kavia ro ramu iri lulua vari vatatana ia propeta Balam. Tanego ṉalu ia propeta Balam to nae i vatatana go batu lavata Balak go i vasoru qirae go vasakata pata vano Izirel, go iri ge go pata gege iri tavatavara ze go banara poqepoqe ro, mana iri zazu ne pata sakataro de iri koego qolero go.

¹⁵ Iri go napu so kakia ro basoero iri koego de qamu koego nae, iri lulua vari vatatana ria vano iri lulua go Nikolasi.

¹⁶ Iago muna vana ne vatovato sakata ro nae. Ṉalu qamuki vana ne kaega, tiniki umata kaega era tuna garetu vae qirae basoero nae pegi loda i sipore go saqequ.

¹⁷ Ramu iko go qeqele qamu, muna gata seko ia Spirit tabo iri sine ne qira go eklesia ro ianae. Basoe i karaputa ego varitara nae, era tuna teke ne ia mana tina gego. Mana dena i patagege i ko pipika bana meso ṉalu bana ne. Nogoto qira basoero nae era tuna teke ne qira ipaka kakasa. Ipaka kakasa nae i karoe kameka vitoṉo voru. Tanuna so basoe i pala go ipaka nae, tina rove go vitoṉo nae, basoe kakavata niki rove kaega.”

Seko Tina Vazao Zego Eklesia Na Taetira

¹⁸ Ia i seko, igo napu de, “Ono karo ne zaqe aqelo na eklesia na Taetira. Iato dena seko era Tuna God, mataqu i uqulu gere go nako ne, mana makequ i damara gere go barasi ne.

¹⁹ Era qa rove pataro qamu zazu ne go, mana qa rove qamu mamaligara ne qira basoero, mana qamu mamaligara nava era go. Qa rove qamu tavisi ne qira basoero ne mana ko vanadu ramu go. Qa rove, zazu ramu ninidena i lete sivala ne de igo bana me kokoso na ne go.

²⁰ Do kameka so pata qaki soko ze go kaega era de qamu koego. Ramu qamu vamao qole Jezebele tina ko tavisi qamu, i poqe, igo tanuna i propeta ia God. Loborona vari vatatana ia i va soru qira vano zazu era, go iri zazu nego soso vatovato sakata ro ne, mana iri ge patagege iri tavatavara ze go banara poqepoqe ro ne go.

²¹ Era qa teke ne ia ṉalu, go mara vana ne vasakata pataro ia qa go, do iki soko neso kaega vana nena.

²² Iago tuna vamokose ia, mana ria iri zazu nego taunata tarina vokara tavise ia. Iago era tuna zazu neto pata dena de iri koego, ṉalu iriki vana nego kaega too sakata i zazu nego ia.

²³ Mana ria iri lulua go ia, era tuna vae vale lupo qira, go osiqira basoero na eklesia ne tarina rove, era qa rove lupo osina nanao ro ria mana pataro iri soko go. Era tuna teke vaule ne ia lepulepu i tora go kebu ro ia.

²⁴ Do osiqamu vano qamu koego komala Taetira qamuki lulua go kaega vari vatatana sakata dena mana qamuki nanao rove kaega pata iri vitoṉo ze go ‘seko pipika ia Satana’. Era tuniki tekene qamu kaega kaki pata makuru.

²⁵ Do muna pala taru vanadua so vatovato velaka qamu zazu nego nae, go tina za doka ṉalu era tuna za lama napu go.

²⁶ Basoero iri karaputa nego varitara dena, mana pala soma so zazu velaka era, go za dokae ṉalu vudu pua tina za lupo gogo ne, era tuna teke ne qira karaputa go tarina kenaqa ne ze go sinaqe na vudu pua ne.

²⁷ Mazala tarina kenaqa ne ze go vudu ro ne, tarina va pela kerone karaputa ro, gere ṉalu qata puaka mumuzale go sareke pua ne.

²⁸ Tanego karaputa tuna teke qira go era, i vari padana so karaputa i gere go domiri dodola i keba mego sarusaruku lolotorone.

²⁹ Ramu i kone qamu go qeqele muna gata seko ia Spirit tabo iri sine go eklesia ro ne.”