Revaleson 19 - Vato Vari Vakameka Voru Ia Batu Ne

Kera Kula Vudu Rani

¹ Taramuzina pataro nae, qa gata naki igere qira basoero topu iri ko mego rani ne, iri go, “Mata vazaka God! Vari vakavele ita, vitoṉona na i lete mazala sivala mana i ko ne karaputa go

² Sauna varitanae i zazu ne go, i ogoto mana i totoloṉo so! Ia i tulaṉa ne qole varivagabu dena, tanego too vari vagabu ia i vasakata qirae basoero na vudu pua.”

³ Gonae iri koru napu, iri go, “Mata vazaka God! Kaukuna nako ni subia go komala lavata ne i zaza popoka mana tiniki rove kaega za lupo go!”

⁴ Karabete kavasi kazigarata ro ne mana kavasi pata qaraqara too ne iri soru rabava kapata mana iri vazaka God i koloku ego kolokoloku batubatu ia ne iri go, “Amen! Mata vazaka God!”

Kelo Busi Ia Tunana Sipi

⁵ Gonae qa gata napua kaki seko i ovaṉa me, i reqe me de kolokoloku batubatu ne, igo dena, “Osiqamu vano zazu ia God, vano qamu pala mazala mana vano i kaega ne qamu mazala gogo ne, muna vazaka God!”

⁶ Lupo nae qa gata napua ovaṉa igere ovaṉa qira basoero topu, i ovele gere dudulu na besi mana qumara na ne, igere soru na pakala lavata, qa gata iri sine, “Mata vazaka God! God Batu ita i karaputa sivala go mana tanuna so ia i batu lavata go!

⁷ Ita mata kula mana gasi, mata vazakazaka vitoṉona ia! Tanego ṉalu ia Tunana Sipi ne tina busi go, i lama doka to, mana qole ia i vanama napu neto busi riru go.

⁸ Qole ne iri teke ne roku voru ilete mimia velaka sivala, go tina va roku nego.” Roku voru dalo dena, i lalana vatovato velaka iri zazu nego basoero ia God.

⁹ Gonae aqelo ne i sine nava, igo, “Ono karo pataro dena, vano iri rave qira mego kelo na busi ia Tunana Sipi ne, iri pala to kula ria.” Aqelo ne i sine napua, “Seko dena i seko ogoto ia God.”

¹⁰ Era qa koloku tutuṉu mana qa vabatua aqelo ne, do i sine nava, “Oniki vabatu ava era, tanego era qa basoe zazu gere go so aro, mana ria turamu ro iri pala taru vanadua go seko ogoto ni vasadake go Jesu. Iago ono vabatua so God.” Tanego seko ogoto i vasadake go Jesu, iato nae karaputa i tavisi ne qira go propetaro ne.

Valeke I Age Go Popokona Ose Kakasa Ne

¹¹ Gonae qa reṉa ne rani ne i papaqa, mana qa mia kameka ose kakasa. Basoe i age go iri vitoṉo ze, “Vanadue de ikoego God mana i vaogoto go,” varitanae ia mana varitara ia gogo ne i totoloṉo lupo so.

¹² Matana i gere lome na nako ne, mana i topu topatopa ikoego kuzuku na. Vitono i karo ego kuzukuna ne, i kaega to ka basoe i rove go, do tanuna so i rove go.

¹³ Roku i vakeba ne go, i parasa lupo so. Vitonona ne, “Seko ia God.”

¹⁴ Vano degaraṉa rani ne iri muzi ne ia, iri age ose kakasa ro mana iri va keba ne roku kakasa i lete dalo go.

¹⁵ Kameka pegi loda i zogoto go karua tepa na, i siporo me saqena. Pegi nae to tina vae vaqoqoro ze go ia osina sinaqe ro ne. Ia tina kenaqa qirae tamana i lete tabo sivala go, tina vadoka ne qira basoero ne muma lavata ia God i moqere sivala go, tina gere ṉalu basoe i kube zagale go urena grep, go osina besi na i siporo lupo go.

¹⁶ Roku loda ia ne mana makena gogo ne, i karoe vitoṉo ro dena, “Batu lavata ria batu lavata ro mana batu ria batu ro go.”

¹⁷ Gonae qa mia kameka aqelo i degere popokona saṉa ne, i koru valavata qe de iri koego pale ro iri bauke go zakazaka na varioka ne, igo dena, “Lama teṉo ne kelo lavata ia God tina zazu nego!

¹⁸ Lama go muna ge qira soso sinaqe na manu ro dena, manu qira batu lavata ro, batu ria vano varitara ro, vano soldia ro, manu qira ose ro mana vano iri age go, manu qira basoero, vano seka, vano ko talupasa, vano mazamazala mana vano volovolomo go!”

¹⁹ Gonae qa mia napu zaqe pata qaraqara piru ne mana vano batu lavata na vudu pua ne mana degara varitara ro ria go, iri vanama ne za varitara ena de ikoego valeke i age go ose kakasa ne mana degara iago.

²⁰ Valeke i age go ose ne i pala pata qaraqara piru ne mana propeta poqepoqe ne mana i qolo vanadu qiru go. Propeta poqepoqe dena i zazu neze pata vari vapoloso ro tarakenaqana pata piru ne. Sauna to zazu vari vapoloso ro nae, iva qoqo qirae go basoero iri pala go lala ia mana iri vazaka go beku na go. Pata piru ne mana propeta poqepoqe ne iru vana va too too qiru aqe nako i poto sadaka mego loborona pua ne.

²¹ Vano degara ro ria ne iri vae vale qirae pegi loda i zogoto go karua tepa na, ni siporo mego saqena valeke i age go ose ne, mana pale ro ne iri lama ge lupo manu qira go.