Revaleson 18 - Vato Vari Vakameka Voru Ia Batu Ne

God I Pero Komala Lavata Babiloni

¹ Taramuzina pataro dena, qa mia kameka aqelo i za qoqoro me tepa rani me. Aqelo nae i ko ne karaputa mazala mana i tatavata e osina dia vudu pua ne.

² I seko vakaraputa me, igo dena, “Komala lavata Babiloni i tapero mana i sakata lupo to. Ninidena manuru sakataro, mana pale sakata ro to iri va komalae go.

³ Osina basoero na kolabana pua ne iri gere to pata iri bulaṉoe ne go loka sakata ne, tanego iri lulua vatovato sakata ro ia mana iri vagabua iago. Vano iri zazu nego pata volivoli ro ria iri lete vavagado napu ne so zazu vari vagabu ro de ikoego ia.”

⁴ Gonae qa gata kameka ovaṉa i naki me rani ne, igo dena, “Ramu basoero era qamu koego nae, muniki zazu tavisi vasakata pata i zazu ne go, niki go pala tavisi qamu kimata ro nae.

⁵ Tanego osina vasakata pata ro ia i vari lapo go za dokae rani ne. Iago God i nanao tarua tane sakata ro i zazu taru nego nae.

⁶ Muna soka vaule ne ze ia lulua so vasasakata i teke ne qamu go do muna vatopu napua ṉalu tamuna soka vaule ne go. Loka iva ge bana qamue go muna va ge ule napu ze ia, do muna va topu napua moqere na loka tamuna teke nego.

⁷ Teke ne ia vokara mana maqata i lete lavata go, go mara lepua ko kulakula ivaego pade vavagado ia i lete meno go, iato go i sine go, ‘Era qa kolokue dena qa kameka qole batu lavata, qaki qole nanaro kaega go tuna maqata nego kaki pata!’

⁸ Iago kameka so musaqara tina vae lupo ze go ia kimata ro dena. Tina gata vavelake to kaega ia tane tokamana mana tina pala mokoso, maqata mana saqo lavata go. Nako tina kamua tokamana, tanego God Batu ni varitanae nego ia, i lete moqere mana mazala sivala ne ia.”

⁹ Ṉalu nae vano batu lavata na to vudu pua niri le ne go ia, go iri varivagabue go de ikoego ia, tarina dae kakanota ne to komala lavata Babiloni, ṉalu tarina mia go kauku na nako iri subi zego ia.

¹⁰ Iri degere valaqalaqa me so, tanego iri sareki ne vokara i pala go ia, mana iri go dena, “Ke Babiloni, ono miasoka! Aro komala lavata go lete karaputa go, do loborona so kameka aoa qo pala to kimata aro!”

¹¹ Vano na vudu pua iri maqata mana dae, tanego tina kaega to ka basoe tinara volia go pata volivoli ro ria.

¹² Gerena pata vavagado ro ria, qolu, siliva, i paka duviduvi mana kuete go, pata tina va popoga ne, gere poga mesara, kuri, mana noba go. Pata zazu karisi gerena, moki nonoli meno, moki iri zazu ne ze pataro iri soko go. Pataro damadamara gerena barasi, mabolo mana aeana go.

¹³ Pata nonoli ro, gerena kinamon, tala, insenisi lomu voli makuru mana lodu nonoli go. Pata gege ro gerena, vino, oila, palava, mana vuiti. Pata qaraqara mana basoe zazu, gerena buluka, sipi, ose, pata aqeaqe, vano seka mana vano basoe go.

¹⁴ Vano iri zazu nego volivoli ne tarina vane dena ia, “Osina ro pata qo lene go pala na i kaega lupo zato, mana osina vavagado mana pata menomeno ro aro iri kasi lupo nigo to. Mana toniki ara pala napua to kaega go!”

¹⁵ Vano iri zazu nego volivoli mana iri vavagado nego zazu dena, tarina degere valaqalaqa meso, tanego iri sareki ne vokara i pala go ia, do tarina maqata mana dae so,

¹⁶ tarina go de, “Ke komala lavata, ono miasoka! Ṉalu bana ne qo vakeba ne poga menomeno ro i qore mana mesara go, mana qo mimia damara ne qolu, i paka menomeno ro mana kuete go!

¹⁷ Do loborona so kameka aoa osina pata qo toṉove go i kaega lupo so.” Osiqira vano iri kenaqa nego koluka ne, mana vano iri zazue go, vano iri age poka go koluka ro ne, tarina za ko valaqalaqa meso.

¹⁸ Ṉalu iri mia zaqe kauku na nako, i subia go komala lavata ne, tarina dae mana go dena, “Kaega to kaki komala i gere go komala lavata dena!”

¹⁹ Iru kuru ze lodu kakasa kuzuku qira, tanego iri lete maqata sivala mana iri dae go, iri go de, “Ke komala lavata, ono miasoka! Osina basoero, koluka ro ria igoe go masi ne, iri lama pala ze vavagado ria de qo koego aro, do loborona so kameka aoa osina pataro ikoego loboromu i sakata lupo!”

²⁰ Kula, ramu vano na rani ne mana basoero ia God, apostoloro mana propetaro ne tanego God i pero vanaqe komala lavata Babiloni! God i vasakate komala dena, tanego i sauna to pataro izazu bana qamue go ramu.

²¹ Gonae kameka aqelo mazala i soqe kameka ipaka kokodokulu lavata mana i vana aqe loka kuri ne, mana igo dena, “Tina goto dena vanaqe tarina vae nigo aro, komala lavata Babiloni, mana tiniki ara miasoba goto kaega go.

²² Vano iri vae go pata nakinaki, vano kerakera, vano iri vaqiso go seqo ne mana puqo go laqama ne tariniki ara naki napue to kaega. Tina kaega to vano zazu, vano iri zazu nego volivoli tinara reṉa ne qirae go nae. Mana naki na ipaka kokodokulu nae, tiniki ara ovaṉa to kaega.

²³ Kaega kaki tatavatana pazi tinara mia zego nae, kaega ka valeke mana qole tiruna busi ego nae. De bana neto vano iri zazu nego volivoli ro nae, ria to iri mazala mana karaputa ego kolabana pua ne, mana zazu tatakiu ro aro nae, iato qo poqe qirae go basoero na vudu pua ne.”

²⁴ Iago kimata nae i pala go aro Babiloni, tanego i sauna parasa qira vano propeta ro ne mana basoero ia God iri soba ze go komala lavata ne, ove to, parasa qira basoero iri vae vale qirae go vudu pua ne.