Revaleson 17 - Vato Vari Vakameka Voru Ia Batu Ne

Komala I Gere Go Qole Varivagabu

¹ Gonae kaki kameka ria kavitu aqelo ro iri pala go vavituna ebata ne, i lamae de qa koego era, igo dena, “Lama go ma va mia zigo era kimata tuna teke go era komala lavata igere go qole vari va gabu iri vadegere ze go rikisina na topuna uguru ro.

² Batu lavata na ro vudu pua iri lama varivagabu bana to ia, mana basoero na vudu pua ne iri bulaṉoi lupo neto loka na varivagabu ia ne.”

³ Spirit tabo ne i lamae de qa koego era, mana aqelo ne i vazao ve era ulana ne. Dego qa mia ze kameka qole i kolokue popokona kameka pata qaraqara piru mesara, tokamana ne i purake seko dadamu de ikoego God, pata qaraqara piru dena i kavitu kuzuku na mana manoga kiso na go.

⁴ Qole ne roku ia i qore mana i mesara go. Malemale ro ivakeba nego iri zazu neze qolu, ipaka menomeno mana koete go. Karisina i pala taru ze kapu qolu, i purake go osina pata sakata ro i reqe mego too na varivagabu ia ni zazu nego.

⁵ Rae na ne i karoe vitoṉona, do talupasana i ko pipika, talupasana igo dena, “Komala lavata Babiloni i sinaqira go osina too varivagabu mana vatovato sakataro go.”

⁶ Mana qa reṉa ne qole ne i ge loka bulaṉoe ne, tanego i ge parasa qira basoero ia God, mana parasa qira basoero iri lulua go Jesu. Qa lete poloso sasakata, ṉalu qa reṉa nego ia igogo.

⁷ Aqelo ne i vane ava dena, “Avigo tane qo poloso go? Era tunara sine lupasa nigo, talupasana qole ne, pata qaraqara piru i age go, i kavitu go kuzukuna mana i manoga go kiso na go.

⁸ Pata qaraqara piru nae i too bana, do ninidena iki too kaega tiniki umata kaega tina za siporo me boluna ulana ne, mana ṉalu karaputa ia tina za lupo, ia tina za kaega napu so. Basoero iri koego vudu pua ne, do vitoṉo qira iki koe kaega buka na too tarakenaqana God i vazaria go vudu pua ne tarina lete poloso sasakata ṉalu tarina reṉa paqala ne go pata piru nae. Tanego i too bana do ninidena iki too kaega, do taramuzina ia tinara lama sadaka napu.

⁹ Pataro dena tina ko nigo tarove go tono ara nanao rove go. Iago ma varove zigoe, kavitu kuzukuna pata qaraqara piru dena, iri gere to kavitu kubolo i kolokue go qole ne, mana i gere napua so kavitu batu lavata go.

¹⁰ Kaki kalima ria batu lavata ro dena, iri le bana zato. Kameka so iara ko batu go ninidena, mana kaki kameka iara kaebo lama. Ṉalu tina lama go, tiniki umata kaega lama ko batu tina vaego.

¹¹ Pata qaraqara piru itoo bana go ne, ninidena iki too kaega, iato tina vazaluna go kavitu batu ro dena, do ṉalu nae tarina vae vale ogote too ia mana va kuziki ne too iago.

¹² Manoga kiso qo reṉa nego nae, ria to manoga batu lavata ro tarina lama batu lavata go, do iri ara kaebo pala na karaputa go tarina batu tavise go pata qaraqara piru ne, do torana so kameka aoa tarina batu go.

¹³ Manoga batu lavata ro dena, iri vakameka ne nanao qira mana iri teke ne pata qaraqara piru ne osina karaputa mana mazala ro ria go,

¹⁴ go tarina varitarae de ikoego Tunana Sipi ne iri go. Do Tunana Sipi ne mana basoero ia tarina vaqoqoro qira batu ro dena, tanego Tunana Sipi ne i batu sivala ne qira osiqira batu ro, mana i batu lavata sivala ne qira batu lavata ro. Tunana Sipi ne i koru bana qira basoero ia mana iri vanadue de ikoego iago.”

¹⁵ Aqelo ne i sine nava, igo de, “Besi ro qo mia go ni kolokue go qole vari vagabu ne, ria to basoero na vuduvudu ro, osina sinaqe na basoe, osina tatalina basoe mana soso seko na vudu pua go.

¹⁶ Manoga kiso qo mia go ne mana pata qaraqara piru ne, tarina vasasakata ne qole vari vagabu dena. Tarina pala vakuziki ne osina ro pata i toṉove go mana va sisinaqa iago. Tarina ge vigona mana subi vasakata ze ia nako ne.

¹⁷ Manoga batu lavata, tarina zazu bana ne pata igogo ne, tanego God tane i teke ne qira go nanao nae, go tarina zazu nego pataro i soko go. Iva kameka ne nanao qira, go iri teke go karaputa ria pata qaraqara piru ne. Tarina zazu ne so ia igogo ne, go tina za doka so ṉalu seko ia God tina lama sadaka ogoto.

¹⁸ Mana qole qo mia go ne, iato i komala lavata i batu lavata sivala ne qira osiqira batu lavata ro mana kolabana pua go.”