Revaleson 14 - Vato Vari Vakameka Voru Ia Batu Ne

Tunana Sipi Mana Basoero Ia

¹ Gonae qa reṉa aqe, a mia Tunana Sipi i degere popoko na kubolo Zaion mana kameka vasa vasiṉalu kavasi mao basoero i karo ego rae qira vitoṉo na Sipi ne, mana vitoṉona Tamana go.

² Mana qa gata kameka ovaṉa i nakie rani ne i gere qumara na besi ni kiale go, mana qumara na pakala go. Naki na ovaṉa ne i gere pata nakinaki iri vaego topu ria basoero ne.

³ Ria kameka vasa vasiṉaulu kavasi mao basoero dena, iri degere tarakenaqana God i kolokue go de kolokoloku batubatu ia, kavasi pata qaraqara mana ria napu to vano kazigarata go. Ria dena iri vae kameka kera voru, talukasana kera ne, tanuqira so iri rove go. Basoero dena to God i bauru bana qirae go vudu pua dena.

⁴ Valekero dena iri vano ko sisiama, iriki ko tavise kaega ka qole, iri ko dalo osina ṉalu iri lulu tarua Tunana Sipi ne. Ria to dena i bauru ne qira go God, i vakasi ne qirae de iri koego vano na vudu pua dena, mana ria to iri sosovolomo kenaqa iri teke ne zaqe God mana Tunana Sipi ne go.

⁵ Kaega kaki ṉalu iri sine go seko poqe mana i kaega ne qira kebu go.

⁶ Gonae qa reṉa napu ne zaqe kameka aqelo, i bauku e zakazaka sivala na varioka ne. I pala seko na Tarama Velaka i too gado kutona i kaega, i zae de iri koego vano na vudu pua ne, de iri koego soso adoado na basoero, soso sinaqe ro, soso seko ro mana vuduvudu ro go.

⁷ Ia i koru valavata me igo dena, “Muna vabatua God mana vazaka velaka ro ia! Tanego ṉalu ia tina varitanae ne go basoero na vudu pua ne, i lama doka to, iago muna vazaka ia, tanego iato ivazaria go rani mana pua, masi mana besi vuala ro go!”

⁸ Varuana aqelo ne i za muzi napu ne me aqelo kenaqa ne, mana i koru me igo, “Komala lavata Babiloni, i tapero mana i sakata lupo go. Tanego i va ge bana qirae basoero ne loka karaputa sakata na varivagabu.”

⁹ Vapisana aqelo ne, imuzi napu ne me so karua aqelo iru kenaqa bana mego, i koru valavata me igo dena, “Ka basoe i vazaka go pata qaraqara piru kenaqa ne, mana beku na ne mana lala ia pata qaraqara piru ne i koe rae na ba karisi matauna gogo ne.

¹⁰ Basoe nae God tina vakimate ia, basoe nae tina besia kapuna vino ikoego osina karaputa na muma ia God. Basoe nae tina lete vokara ne ilana nako, i gere go nako kamu i poto sadaka mego loborona pua ne, tarakenaqa qira aqelo tabo ro ne mana Tunana Sipi ne go.

¹¹ Kauku na nako na vokara ne i too taru za dokae so ka ṉalu gado kutona i kaega, osiqira ria iri vazaka go pata piru ne mana beku na ne mana lala ia gogo ne, ria nae tarina koe loborona kimata osina musaqara mana kuse go.”

¹² Sauna pataro dena ramu basoero ia God qamu lulua go tamana ro ia ne, mana qamu vaogote Jesu Kristo gogo ne, muna ko vanadue de ikoego ia osina ṉalu.

¹³ Gonae qa gata napua ovaṉa i reqe me rani ne, igo dena, “Ono karo osina pataro dena pasi ninidena popoka gogo ne, ria iri le ne go vaogoto ria sauna Jesu tarina lete kula sivala.” Spirit tabo ne igo napu de, “I pata ogoto sivala, ria tarina kula ne ziṉo, sauna zazu vokara ro ria tanego tarina pala vazao napua so zazu velaka ro ria go.”

Pala Vine Na Vano Totolono

¹⁴ Gonae qa reṉa qe qa mia kameka toba kakasa mana toba nae i kolokue kaki pata i gere basoe i vatopatopa ne qolu mana i pala taru ze karisina peqi eqoqo i zogoto go.

¹⁵ Gonae kameka napu aqelo ne i siporo me Pade Lotu ne, mana i seko valavata zaqe basoe i kolokue go popoko na toba ne, igo dena, “Pala pegi eqoqo zogoto aro nae mana puta qira urena pata lebaleba ro nae, tanego torana dena i ṉara to pata gege iri koego vudu pua ne.”

¹⁶ Iago valeke i koloku ego popoka na toba ne i puputa neto peqi eqoqo zogoto ia, de koe urena ro pata gege ro iri ṉara banae go vudu pua ne.

¹⁷ Gonae qa reṉa napu ne zaqe kakia aqelo i siporo me pade lotu na rani ne, i puputa napu ne peqi eqoqo zogoto ia.

¹⁸ Gonae kakia napua aqelo i miasoka go nako ne, i za siporo me sara ne. I seko valavata me de ikoego aqelo ipala go pegi eqoqo zogoto ia ne, “Ono vazazua pegi eqoqo zogoto aro mana puta ze pata lebaleba ro iri koego barue na vudu pua, tanego urena ro ne i ṉara lupo to.”

¹⁹ Iago aqelo ne i pala pegi eqoqo zogoto ia ne mana i puta urena ro vaini na vudu pua ne, mana i vana qira qe de iri puqopuqo zaqe vaini ne. Nae to ikoego muma lavata ia God.

²⁰ Gonae iri kube naqili ze de iri puqopuqo zego vaini ne rikisina komala lavata ne, mana parasa i sipore go de puqopuqo vaini ne i kiale za torana pisaṉaulu kiiomita loda na mana karua mita muqa na go.