Revaleson 13 - Vato Vari Vakameka Voru Ia Batu Ne

Kameka Pata I Sadaka Me Masi Ne

¹ Gonae qa reṉa ne kameka pata piru i sadaka me masi ne, pata qaraqara dena, i manoga kiso na mana kavitu kuzuku na go. Nogotona kuzuku ne, iko ne qira topatopa ro ria, mana kuzuku ro dena, ikoe seko sakata ro iri seko vasakata ze go God.

² Pata piru dena i mimia gere leopati mana makena ne i mimia gere bea, saqena ne i mimia gere laioni ne. Ratovo lavata ne i teke ne pata qaraqara piru dena karaputa ia tanuna, go tina kolokue de koko batubatu ia, mana mazala iago tina vazazua go.

³ Kaki kameka kuzukuna pata qaraqara piru dena, i mimia gerena pata i paleka bana go, do paleka na ne i saqau bana to. Osina basoero na vudu pua ne iri lete nureke ne pata qaraqara piru dena iago iri lulua to pata qaraqara piru dena.

⁴ Osiqira basoero ne iri vazaka ratovo dena. Tanego i teke ne karaputa ia de ikoego pata piru ne, mana iri vazaka napua so pata qaraqara piru dena go. Iago iri go dena, “I kaega to ka basoe i gere go pata qaraqara piru dena, mana kaega ka basoe i mazala go varitara ena de ikoego iago.”

⁵ Pata piru dena i malumu ne seko vazaka napu, go tina seko sakate mana dadamua God, do karaputa dena i toraso vasi ṉaulu karua inaqa.

⁶ Iago pata qaraqara piru dena, i dadamua God, vitoṉo na, de koko ia mana osiqira to basoero iri ko tavisi ze go ia rani ne.

⁷ Iago, i malumu napu neso ia varitarae na de iri koego basoe ro ia God, mana ivaqoqoro qira go. Ia i pala napua karaputa go tina kenaqa ne qira go osina ro sinaqe mana osina ro vudu mana soso adoado na vano basoe go.

⁸ Osina basoero na vudu pua ne, tarina vazaka pata piru dena. Do ria i karo banae go vitoṉo qira buka na too, tarakenaqana God i vazaria go kolabana pua ne so, tariniki vazaka go kaega pata qaraqara piru ne. Buka na too dena, i ke ia Tunana Sipi iri vae vale bana go.

⁹ “Ramu i ko ne qamu go qeqele ne, muna gata!

¹⁰ Basoe iri pala vaseka go ne, tina ko basoe seka to, basoe i tavine nego tina le ne pegi loda, tarina vae vale ze to pegi loda. Ṉalu pataro dena tina doka, ramu basoero ia God muna ko vanadu eso vaogoto ramu de ikoego God.”

Varuana Pata Piru I Sadaka Me Pua Ne

¹¹ Gonae qa reṉa napu ne kaki kameka pata piru iza sadaka me pua ne. Karua kiso na i gere kiso na sipi suka ne, mana i gere sekoseko na ratovo ne.

¹² Varuana pata piru dena, iko tavise pata piru kenaqa ne. Gonae i vazazua osina mazala ia pata qaraqara piru sakata dena. I vatutubo qirae basoero iri koego vudu pua ne go tarina vazaka pata qaraqara piru kenaqa ni paleka bana go, do paleka na ne i saqau mana i velaka to go.

¹³ Varuana pata qaraqara piru dena, i vasadake karaputa ia, i zazu ne pata vari vapoloso, i vasoru me nako na tepa rani ne mana i valame ze tarakenaqana qira basoero na vudu pua go tarina mia go.

¹⁴ Mazala i vasadake go varuana pata qaraqara piru de, i vasadaka ze tarakenaqana pata piru kenaqa ne, mana i va bulaṉoi qira basoero na vudu pua go. I sine ne qira basoero ne mara zazu ne beku mana vagere ze tatalina pata piru kenaqa niri vae vale bana ze go peqi loda ne do i too ule napu me.

¹⁵ Varuana pata qaraqara piru ne i pala vatoqe, go tina kiuru zaqe marapugana too loborona beku iri zazu vagere zego pata piru kenaqa ne. Ṉalu nae to beku nae tina ko ne karaputa na seko mana tina vae vale qira basoero iriki vazaka go kaega tanuna.

¹⁶ Iago pata piru dena i vatutubo qira basoero ne. Vano mazamazala vano vavagado, vano situ, vano seka, mana vano iri ko talukasa go. Osiqira basoero dena mara koe kameka lala tepa karisi matau qira ba rae qira go.

¹⁷ Ṉalu basoe i kaega nego lala dena, ia tiniki volivoli ne kaega kaki pata ba za voli na kapata go.

¹⁸ Tarove so tina lukase go pataro dena. Ṉalu basoe i ko ne nanao rove tina mazala so sine va voto go talukasana naba ia pata qaraqara piru dena. Tanego naba dena i vitoṉona kameka basoe. Velaka na naba nae ne onomo vasa onomo ṉaulu kaonomo.