Revaleson 12 - Vato Vari Vakameka Voru Ia Batu Ne

Qole Kazigarata Mana Dole Ratovo

¹ Gonae kameka pata vari vapoloso lavata sivala, i sadaka me varioka ne, kameka qole kazigarata dena, saṉa i damare go ia ne, igere baribari ia, mana inaqa ne i kube poka ze makena. Manoga karua domiri iri ko kolokolo e kuzukuna ne, i gerena topatopa ia ne.

² Ia i kakate mana i vovokara, i ezana valavata ne podo na sale ia.

³ Kaki kameka pata vari vapoloso i sadaka napu me varioka ne. Kameka dole ratovo lavata sivala i mesara, i kavitu kuzukuku na mana i manoga kiso na go, kavitu kuzuku na iri nogoto topatopa lupo.

⁴ Kupele na ne i sima vasoru zaqe takoborona domiri ro iri koego varioka ne, mana i vana vasoru meze pua ne go. Ia i za degere tarakenaqana qole kazigarata ne i vanama ne ge na sale ia qole ne ṉalu tina podo go.

⁵ Gonae qole ne i vapodo to kameka sale valeke, sale nae to tina kenaqa nego osina basoero na kolabana pua ne sauna karaputa ia ne. Do ṉalu i podo go sale ne, iri lama pala vapaqa mana vazao ze de ikoego God, mana i za kolokue do koko batubatu ia ne.

⁶ Qole ne i paqa za ulana ne, de i vanama bana go God tina za koego. Dego ne to tarina za miasoka zego ia torana kameka mao karua vasa onomo ṉaulu musaqara.

⁷ Gonae kana lavata i tupi me rani ne. Maekolo mana aqelo ro ia iri varitarae de ikoego dole ratavo ne, dole ratavo ne mana aqelo ro ia iri varitara ule napu go.

⁸ Do dole ratovo ne mana aqelo ro ia ne iri qoqoro, iago iriki vamao ne qira to kaega tarinara koego rani ne.

⁹ Gonae dole ratovo lavata ne mana aqelo ro ia ne, iri kakale vakuziki ne qira to. Dole ratovo dena to, iato i ko bana mego ṉalu bana ne, iato qata vitoṉo zego Satana, iato i poqe qira go basoero na vudu pua go iri vasakata pata go.

¹⁰ Gonae era qa gata napu kameka ovaṉa na seko lavata i reqe me rani ne, igo de, “Ninidena to vari vakavele ia God i lama doka. God i vasadake karaputa ia ni batu lavata go. Ninidena to Mesia ia i vasadake go karaputa ia, i kenaqana nego osina ro pata. Tanego Satana i degere banae go tarakenaqana God mana ivari valegue de iri koego turaqita ro ne musaqara mana kuse gogo ne, iri kakale vakuziki ne zeto ia rani ne.

¹¹ Do ria turaqita ro ne iri vapela ze ia karaputa na parasana Sipi ne, mana karaputa na seko ia iri vasadake go. Iri toqe ne soso na too ria, mana iriki sareki ne kaega le go.

¹² Iago rani ne, mana osiqamu qamu koego rani ne go, muna kula vudu pua ne mana masi ne go. Tanego Satana i lama qoqoro me de qamu koego. I lete muma sasakata, tanego i rove, ṉalu ia i lete pusi.”

¹³ Ṉalu dole ratovo ne i rove iri kakale vaqoqoro me ze vudu pua ne, ia i tupi napua to kale na qole kazigarata ni vapodo go sale valeke ne.

¹⁴ Iago God i teke qole ne karua babalakuru na kamaqa, go tina bauku paqa za ulana ne, nae to tarina miasoka ze ia torana kapisa mana takoboraṉa masirani, go dole ratovo ne tiniki vae vale go kaega ia.

¹⁵ Iago dole ratovo ne, i lua ne zaqe besi ikoego saqena i gere go kiale ne, go mara za gazo vanaqe qole ne, igo.

¹⁶ Do pua ne i tavisi ne qole ne, i papaqa mana i zazu ne kameka bolu lavata sivala, iago osina to besi i lua ne go dole ratovo ne i qoqoro lupo za so bolu lavata nae.

¹⁷ Gonae dole ratovo ne i lete muma sasakata ne qole ne, mana i za varitarae de iri koego ria sinaqe ia qole ne. Ria basoero nae to, ria to vano iri vaogote go seko tamana ro ia God, mana iri ruqe go seko ogoto i vasadake go Jesu Kristo.

¹⁸ Do dole ratovo ne i za degere so karakoni rikisina masi ne.