Revaleson 10 - Vato Vari Vakameka Voru Ia Batu Ne

Aqelo Mana Pepa Vivolo Suka Ne

¹ Gonae qa mia aqelo mazala sivala i za qoqoro me tepa rani ne. Tokamana ne i kade toba ne, mana kameka solobio i iqole kuzukuna go, tarakenaqana ne i gere saṉa mana karua makena ne i gere uqulu na nako ne.

² Karisi na i pala taru ze kameka vivolo pepa suka, i papaqa bana go. Make matau na i taru zaqe popokona masi ne, mana make gede na, i taru zaqe vudu kadala go,

³ mana i koru va lavata, ovaṉa na ne i gere naki na laioni ne. Taramuzina koru ivae go ne, kavitu pakala iri toqe ne ia.

⁴ Muzina so seko iri vae go ria, era qa vanama to karo na pataro iri sine go. Do qa gata kameka ovaṉa i seko me tepa rani ne, “Ono pika vanadua pata iri sine go kavitu pakala ro ne, oniki karo!”

⁵ I lupo so nae aqelo qa mia bana go i degere go popoko na masi ne mana vudu pua ne, i kazara ne zaqe karisi matauna rani ne,

⁶ mana i zazu ne kameka odoodo lavata ia loborona vitoṉona God i too go osina ṉalu topuro ne, i vazaria go rani mana pua ne mana osina pataro iri koego. Aqelo ne igo, “God iki ara piri to kaega!

⁷ Ṉalu vavituna aqelo ne tina puqoto kuvili ia ne, God tina valupo to osina pataro, ivanama bana mego, gerena so iri sine bana go vano zazu ia mana propeta ro iago.”

⁸ Gonae ovaṉa qa gata bana go ne, i seko me rani ne, igo de, “Ono za mana za pala ze vivolo pepa ikoego karisi na aqelo i degere go popoko na masi mana vudu kadala ne.”

⁹ Iago qa zae de ikoego aqelo ne, mana qa pene ze ia vivolo pepa suka ne. I sine nava igo, “Ono pala mana ge, tina gagaemana velake loborona saqemu, tanego i gere biuma ne, do taramuzina tono ge lupo go tina za i tane kuabamu.”

¹⁰ Gonae qa pala ze karisina ia vivolo pepa suka ne mana qa ge, loborona saqequ era ne, i veruveru meno gere biuma ne. Do taramuzina qa kunu lupo ne, i vata itane kuabaqu.

¹¹ Iri sine nava, iri go, “Ono sine vasadake seko ro dena, i seko ia God sau qira basoero na vuduvudu ro, soso sinaqe ro, soso sekoro mana batu lavata ro go.”