Qalesia 5 - Vato Vari Vakameka Voru Ia Batu Ne

Kristo I Vatalukasa Qita

¹ Kristo i lukasa qita ita, go qata ko talukasa go. Iago degere vanadu gere qira basoero iri ko talukasa, mana kasi vamao nena kaki basoe go mara vaseka napu qamu.

² Muna gata! Era Pol go qa sine ne qamu pata dena, ṉalu ramu qamu toqe ne tarina kosi qamu go, talukasa na pata nae ne Kristo tiniki tavisi ne qamu kaega.

³ Ma sine patu napua, ṉalu ka basoe itoqe ne go mara kosia igogo ne, basoe nae tina lulua to osina pata i sine go Tamana, mana basoe nae iki ko talukasa kaega.

⁴ Ramu qamu pada ne vatotoloṉo zena tanuqamu de ikoego God go qamu lulua go Tamana. Iago ramu qamu vakuziki ne ze tanuqamu de ikoego Kristo, mana qamu vanane to Mana ia God.

⁵ Do remu qimu ruqe zaqe God tina vatotoloṉo qemue de ikoego tanuna. Iato nae pata qimu piri ne go remu loborona Spirit tabo ia God, izazue go loborona vaogoto remu.

⁶ Tanego ṉalu ita qata ko vakamekae go Jesu Kristo, ikaega so kaki pata i varivakakavatae go basoe i kosi ba iki kosi go kaega. Do pata i lete mazala sivala go ne, vaogoto tina vasadaka mego mamaligara. Iaso nae i pata mazala go.

⁷ Ṉalu bana me ramu qamu vazazu velaka me too ramu de ikoego Kristo. Iago, akena to i vamamanava qamue go luluna seko ogoto ne, mana qamu soru kakavata go na?

⁸ God ikoru bana qamu go iki zazu ne kaega ia tane pata dena de qamu koego.

⁹ Qamu rove desuka so isti i mazala go vakeba na robe na palava ne.

¹⁰ Ba era qa ruqe qamu ramu. Loborona too ba va kameka ita de ikoego Batu ne, qa vaogote ramu tamuna lulua so nanao qu era. Patavolomo basoe ivaqoqore go nanao qamu, do God tinara vakimate ia.

¹¹ Ba tepa rera ne turaquro, ṉalu tara ogoto go era qa tamana ne go va mazalana kosi, avigo tane basoero ne iri vasasakata nava go era? Ṉalu tara ogoto go, ianae vano Jiu tara muma nava kaega era qa tamana ne Kristo i le go koluse ne.

¹² Basoero iri vaqoqore go nanao qamu ramu, itora mara ria kosi vasakate to tanuqira.

¹³ Do de qamu koego ramu turaquro, God ikoru bana qamu tamuna ko talukasa. Do ko talukasa ramu dena, kasi vamao nena pata sakata ni soko go tokama qamu go tamuna lulua go. Do mamaligara ramu muna varisoso ne ze de qamu koego.

¹⁴ Tanego osina Tamana ro iri lama voto lupoe so kameka Tamana dena, “Ono mamaligara ne qira kero ne basoero ne, gerena qo mamaligara nigo tanumu.”

¹⁵ Do ṉalu qamu muma mana varitara taru so loborona koko ramu, muna miasoka, ṉalu nae to tamunara lete vasakate go ko kameka ramu.

Spirit Ia God Mana Too Ia Tokama

¹⁶ Iago, pata qa sine ne qamu go era, muna vamao ne Spirit tabo go mara kenaqa ne too ramu, go tamuniki lulua go kaega pata ni siko go basoe na vudu pua dena.

¹⁷ Tanego pata sakata isoko go basoe na vudu pua dena, iki soko kaega Spirit tabo. Pata velaka isoko go Spirit tabo iriki soko kaega basoero na vudu pua dena go. Riru karua too dena iru varivakakavatae mana iato dena i talukasana go i makuri go tono zazu ne go pata qo soko go zazu nena.

¹⁸ Do ṉalu Spirit tabo i kenaqa ne qamu osina ṉalu, Tamana iki ara batu ne qamu to kaega.

¹⁹ Pata i zazu ne go too sakata ia basoe na vudu pua dena, i sadaka va velaka me so. Iato i vasadaka me vari vagabu, too iki dalo go kaega mana taunata go,

²⁰ iri vazaka qira god poqepoqe ro, zazu mamaruku, vari vasasakatae, lulua kaega Tamana, vari misi, poro muma, nanao na so tanuna basoe, va pera qira kero ne basoero, zazu ne vari vatavota go.

²¹ Ma sine vakaraputa ne qamu, gerena so qa sine bana ne qamu go, basoero iri zazu ne too ba vatovato igogo dena, i makuru qira tarina pala go Too ikoego vari miasoka ia God.

²² Do Spirit tabo i soso ne mamaligara, kulakula, bule nanao, muma katikili kaega, i soso napu ne too vari nanao, too velavelaka mana too basoe nadu go.

²³ Ko vaqoqoro mana ko miasoka go so tanumu. Ikaega to kakia seko na Tamana tina vasakate go pataro dena.

²⁴ Vano iri ke iago Jesu Kristo, iri vae vale bana to ria too na vudu pua dena ni soko go zazu ne na osina pata sakata ro ne.

²⁵ Spirit tabo iteke bana ne qita too, iago Spirit tabo mara kenaqa ne go too ita.

²⁶ Ita mata kasi vazakanapu ba vari vasisiki ba vari qorae tanuqita go.