Qalesia 4 - Vato Vari Vakameka Voru Ia Batu Ne

¹ Seko rera qa mazala vane na dena. Ṉalu basoe iara sale go iki mazala kaega tma kenaqa ne patapata ia tamana, do ia tina gere so basoe zazu. Ba osina patapata ro ia tamana, iato tinara tonovo lupo go kene ṉalu.

² Iago torana iara sale go ia ne, vano kazigarata ia ne iri miasoka ne go patapataro ia, mana go tinara doka go ṉalu i vine taru bana ne go tamana.

³ Gerena napu so ita, torana qatara kaebo go rove na God ita qata ko seka ne so osina pata na ro vudu pua dena.

⁴ Do ṉalu i lama doka to, ṉalu God i valame Sale ia tanuna. I lama podoe qole basoe na pua dena, mana i lulua tamana ria vano Jiu.

⁵ God i vazazua zuka igogo ne, go tina bauru qira basoero iri lulua go Tamana go osiqita tatana lama sasalero ia God.

⁶ Ita qata salesale ro ia God, iato go God i turi ne me Spirit na Sale ia, go tina lama koe loborona too ita. Mana Spirit nae ikoru, igo, “Aba, Mamae era.”

⁷ Iago ramu qamuki basoe seka to kaega, do qamu salero ia God. Iago God tina teke ne qamu osina pata itoṉove go ni pui bana ne qamu go.

Pol I Nanao Qira Vano Qalesia

⁸ De i lupo bana mego ramu qamuki rove kaega God. Iago ramu qamu seka ne so god poqepoqe ro ne.

⁹ Do ninidena ramu qamu rove to God ogoto, do era mago, God tane irove kenaqa qamu go ramu, do avigo tane qamu taleqe ule go manuru sakata memelaka na ro vudu pua dena, mana avigo tane qamu soko go vele seka napu ne qira go na? Avigo qamu soko tamuna seka ne pata igogo ne?

¹⁰ Osina ṉalu ramu qamu nanao vamazale tamana, sauna vatabo na kakia ro musaqara, inaqa voru mana ṉalu tavine na ave ro go.

¹¹ Era qalete nanao vokara ne qamu ramu! Qa sareki, niki go osina zazu ro era sauqamu ramu za patavolomo lupo so go.

¹² Qa pene vakaraputa qamu turaquro, muna lulua de qa gogo era tanego era do qa gere qamu so ramu de ilupo bana mego. Ramu qamuki vasakatava kaega era.

¹³ Qamu nanao tarua ramu tane de qa gogo era, ṉalu qa garetu tamana kenaqa ne qamue go Tarama Velaka ne, ṉalu nae era qa mokoso.

¹⁴ Do patavolomo mokoso na tokamaqu era, iki va makuru qamu kaega. Tanego ramu qamuki niniqi nava kaega mana qamuki silava kaega go. Do ramu qamu soti vagere ve kameka aqelo ia God. I pata ogoto qamu soti vagere ve Jesu Kristo.

¹⁵ Ramu qamu kula tane ṉalu nae. Do avana to idoka qamu go ramu ninidena. Era mago ṉalu nae tara malumu qamu go lobikena mata qamu, ramu tamu lobike mata qamu mana teke nava era.

¹⁶ Iago, avigo qa kana ne qamu, tane qa sine ne qamu pata ogoto?

¹⁷ Ria basoero iri vasadake go varikitaki velaka ro ria de qamu koego, iri soko so, go ramu mamu vana nava era, mana go ramu mamu lulua nanao ro ria gerena de iri vane qamu go nae iri go so.

¹⁸ Iago ivelaka so ṉalu iri varikitaki ego de qamu koego, ṉalu iri zazu ne go pata totoloṉo go, mana mara ria lulua to osina ṉalu go. Do mara kasi zazu ne zena so ṉalu qa lama kotavisi qamu go era.

¹⁹ Ramu salero era! I varuana to ṉalu era qa gata vokara napu, gere sinana sale i gata vokara ṉalu i vele podo go sale ia. Era tuna gata tarua so vokara igogo ne, go tina doka so ṉalu ramu tamuna lulu ogote go too ia Kristo.

²⁰ Era qa lete soko kotavisi qamu ninidena, go qa mazala kavala na seko ro era. Tanego qalete nanao qamu ramu!

Vapadapada Na Pepeu Qiru Ega Mana Sera

²¹ Era ma tana ne qamu ramu vano qamu lulua go Tamana. Avigo qamu rove ramu tane pata ni sine go Tamana?

²² Buka tabo ne i sine, Abra-am i toṉove karua sale valeke, ke kenaqa ne i podoe qole seka, mana ke varuana ne i podoe qole ogoto ia.

²³ Sale i podoe go qole seka ne, igere so de iri gogo salero topu iri podo go, do sale i podoe go qole ogoto ia, i podoe loborona pui ia God.

²⁴ Pataro dena qata mia vagere ze so vapadapada na karua seko varitoqe de ikoego God. Ega to i va podo qira go salero iri seka go, mana i vapadapada na to Tamana ia God izazu bana me ze go Kubolo Sinae.

²⁵ Ega i talukasana kubolo Sinae ikoego vudu Arabia, do i dudulena napu so komala lavata Jerusalema iko seka go ninidena. Tanego osina basoero iri ko seka taru so.

²⁶ Do Jerusalema ikoego rani ne iko talukasa, gere go qole ni ko talukasa mana i sinaqita go.

²⁷ Tanego Buka tabo ne igo, “Qole qoki vapodo sale go kaega mo kula. Qole qoki gata bana go kaega ka vokara, mo koru mana gasi. Tanego qole i ko vamiki go tanuna tina topu ne sale, sivala ne qole iko tavise go valeke ia.”

²⁸ Do ramu turaquro, qamu salero ia God, qamu podoe pui ia God, gerena Aisak.

²⁹ Ṉalu nae sale i podo gere go so de igogo podo na salero ne, iato i vamakure go sale i podoe go loborona karaputa na Spirit tabo ia God, mana i varipada so ninidena go.

³⁰ Do avana igo Buka tabo ne, “Igo kale vakuziki ne qole seka ne mana sale ia ne go. Tanego sale ia qole seka dena tiniki pala kaega vavagado ia tamaqiru, do sale ia so qole ogoto ia ne, tina pala go patapata ia tamaqiru.”

³¹ Iago, turaquro, ita qatiki ara salero ia kaega qole seka ne, do qata salero ia qole talukasa ne.