Qalesia 3 - Vato Vari Vakameka Voru Ia Batu Ne

Tamana Ba Vaogoto

¹ Ramu vano Qalesia qamu vano bulaṉoe! Akena to i poqe qamu go i toqo vakakavata qamu go na? Ramu qamu gata va velaka bana me pepeu na Jesu Kristo ile go koluse, qi sine bana ne qamu go.

² Muna sine nava era kameka pata dena. Avigo qamu pala ze Spirit tabo ia God, tanego qamu lulua pata i sine go Tamana ba go qamu vaogote go Tarama Velaka qamu gata go?

³ Avigo tane qamu bulaṉoe go! Ramu qamu vatupize too ramu Spirit ia God, do ninidena ramu qamu soko valupo zena karaputa ramu tanuqamu?

⁴ Avigo osina pataro iri doka bana qamu go iri patavolomo so ba? Kaega! Iko talukasana tane pataro nae!

⁵ Avigo God iteke ne qamu Spirit ia, mana izazu ne ze pata vari vapoloso de qamu koego, tanego qamu zazu ne pata isoko go tanuna ba, tanego qamu gata so Tarama Velaka mana vaogote so go?

⁶ Muna nanao lulusu zaqe Abra-am, gerena i sine go Buka tabo, “Ia i vaogote God mana vaogoto ia, tane God i vatotoloṉo ze go de ikoego.”

⁷ Iago ramu muna mia rove to. Vano iri vaogoto go ria to salero ia Abra-am.

⁸ Buka tabo ne i sine taru bana me so, “God i vatotoloṉo qirae vano iriki Jiu go kaega loborona vaogoto ria.” Iago, Buka tabo ne ivagata bana me ze Abra-am Tarama Velaka, igo, “De qo koego aro, God tina va makaolo qira basoero na vudu pua.”

⁹ Abra-am i vaogote God, mana God i va makaole ia, gerena napu so osiqira basoero iri vaogote go ia iri pala makaolo gerena Abra-am.

¹⁰ Basoero iri degere vanadue go Tamana, iri pala tulaṉa loborona too ria. Tanego Buka tabo ne igo, “Ka basoe iki lulua go kaega osina pata i karo banae go buka na Tamana, i pala tulaṉa de ikoego God.”

¹¹ Iago i tatavata velaka me. Kaega ka basoe tina totoloṉe de ikoego God ṉalu i lulua go so Tamana, tanego Buka tabo ne igo, “Basoe i taruze so vaogoto ia de ikoego God tina kavele go.”

¹² Ba tepa ia Tamana ne, iki zazu ne kaega vaogoto, do gerena i sine go Buka tabo ne, “Basoe i lulua go osina pata i sine go Tamana tina za kavele.”

¹³ Kristo i bauru bana ne qitae ita tulaṉa iteke ne qita go Tamana. Tanego Buka tabo ne igo, “Ka basoe iri vaidoko ze go moki ne, i pala tularia ia God.”

¹⁴ Zuka nae to Kristo i voli qitae go, go basoero iriki Jiu go kaega tarina pala tavise go, pata i pui ne go God tina teke go Abra-am. Mana zuka nae to, ita qata vaogoto go qata mazala pala na Spirit tabo i pui bana ne go God.

Pui Ia God

¹⁵ Ramu turaquro, ma sine ne qamu kameka va padapada, de igogo vatovato ita vano basoe. Ṉalu kaki karua basoe iru pui ne kaki pata mana vanadua vatovato riru gogo ne, kaega napu kakia riru tinara pero go, ba tarupoka napu ze na kaki pata.

¹⁶ God i taruze pui ro ia de ikoego Abra-am mana popodo iago. Buka tabo iki sine kaega, “Popodo,” salero igogo, na nanao zego topuna basoe, do igo, “Popodo aro.” Ianae i vatalukasa ze kameka minena so basoe, mana basoe nae to Kristo.

¹⁷ Iato dena talupasana pata qa sine go, God i teke Abra-am kameka varitoqe, mana God i pui ne tina zazu vavoto ne go. Taramuzina vasivasa pisaṉaulu ave Tamana iara lama go. Do Tamana nae i makure tina vanoto go varitoqe ia God de ikoego Abra-am.

¹⁸ Avigo luluna tamana tina teke ne qita pataro i pui nego God? Kaega! Ṉalu qata pala ze pataro igogo ne tanego qata lulua Tamana, ianae ne iki reqe me kaega pui ia God go. God i teke ne pataro Abra-am lulua so pata i pui nego.

¹⁹ Iago, ava sauna tane Tamana i zari go? God i palu zaqe Tamana dena go mara vasadaka me zazu kebu ro qata zazu ne go ita, go tina za doka go ṉalu Sale ni pui bana ne go God de ikoego Abra-am tina lama go. Tamana dena i reqeme de iri koego aqeloro ne, iri teke nego Mosese valeke ni zazue go vari loborina God mana basoero ne.

²⁰ Do ninidena valeke izazue go de ikoego God mana basoero ne ikaega to, do tanuna so God i ko go.

Zazu Ia Tamana

²¹ Iago Tamana ivae pui ro ia God ba? Kaega! Tanego ṉalu tara pala bana mego vano basoe, kameka Tamana, de ikoego God imazala go valame na too ogoto, ṉalu nae ne osina basoe tara ko totoloṉoe de ikoego God, sauna luluna Tamana ia.

²² Do Buka tabo ne igo, “Osina basoe iri koego vudu pua iri koe to karaputa ia vasakata pata.” Iago sosovolomo ia God i pui bana mego de ikoego vano iri vaogote go Jesu Kristo, iteke ne qira to ria iri vaogote go ia.

²³ Do tarakenaqana iara lama go vaogoto dena, Tamana ilete palataru vanadu qita ita go iara lama sadaka go vaogoto.

²⁴ Iago Tamana to i kenaqa ne qita ita, gogo iara lama go Kristo, mana vaogoto ita de ikoego iago, qatara lama totoloṉe go ita de ikoego God.

²⁵ Do ninidena vaogoto ramu de ikoego Jesu Kristo, osiqamu qamu salero iago God.

²⁶ Loborona to vaogoto ramu de ikoego Jesu Kristo osiqamu qamu salero ia God.

²⁷ Bapitema ramu qamu vakameka ne to Kristo mana ninidena qamu pala too ia tanuna Kristo.

²⁸ Iago ikaega so kaki pata i varivakakatae ne de iri koego vano Jiu ba vano iriki Jiu go kaega, vano seka ba vano ko talukasa, valekero ba qolero go, osiqira pataro dena iri kameka pata so de ikoego Kristo.

²⁹ Ṉalu ramu qamu keia to Kristo, ramu to qamu popodo ro ia Abra-am mana tamuna toṉove pata i pui nego God.