Qalesia 1 - Vato Vari Vakameka Voru Ia Batu Ne

¹ Era Pol, kokoru qapala go iki reqeme kaega basoe ba vatovato ia basoe, do i reqeme de ikoego Jesu Kristo mana God Tamaqita, ivatoo napu me Jesu tepa lene.

² Osiqira to ria turaqita lotu iri koego dena iri vakameka nava era, go qimu vagaretua go seko kula, de qamu koego ramu, vano lotu qamu koego kolabana Qalesia.

³ God Tamaqita mana Batu ita Jesu Kristo mara teke ne qamu Mana mana bule ia.

⁴ Kristo iteke ne tanuna tina le ne sauna vasakata pata ro ita, go ita mata talukase too sakata na pua dena. Loborona vatovato dena to i lulua go soko ia God Tamaqita.

⁵ De ikoego God, ita mata vazaka osina ṉalu topu ro ne. Amen.

I Kameka So Tarama Veleke

⁶ Era qalete poloso sasakata, ramu qamu katikili go vananena God, ikoru bana qamue go lulu na Tarama Velaka na Mana ia Kristo.

⁷ Do pata ogotona ne, ikaega napu kaki Tarama Velaka, tanego kakiaro basoe iri lama vasakate nanao qamu mana pada ne itane na Tarama Velaka ia Kristo. Igo nae ia tanego qa sine ne qamu go.

⁸ Do ṉalu kaki kameka basoe, patavolomo remu ba kameka aqelo na rani ne i tarama ne Tarama Velaka i kakavata ne go tarama velaka, ke qi tarama ne qamue go, itora mara tulaṉa ne zaqe nako ne.

⁹ Remu qimu sine bana ne qamu pata dena, do ninidena qa sine napu ne qamu. Ṉalu kaki basoe i tarama ne qamue Tarama Velaka, i kakavata ne go, ke qamu vaogoto bana go, basoe nae mara tulaṉa ne zaqe nako ne.

¹⁰ Zazaona pata dena era ma vakula basoe qa go ba? Kaega! Pata qa soko go era, go ma vakula God qa go. Ba qamu nanao, go basoero ne mara vazakava qa go? Kaega! Ṉalu tina gogo nae, era qaki basoe zazu ogoto bana ia kaega Kristo go.

De Igo Pol Ilama Apostolo Ia Kristo

¹¹ Ma sine ne qamu turaquro, sauna Tarama Velaka qa tarama ne qamue go iki reqe me kaega basoe.

¹² Era qaki pala ze kaega de ikoe kakia basoe, ba kaki basoe tane i vatatanava go, do tanuna so Jesu Kristo i vasadaka nava go.

¹³ Ramu qamu gata bana de igogo too rera, qa lete nanao vamazale go lotu ria vano Jiu, do ikaega nava varinanao, qa vamakuru qira so vano na eklesia ia God, mana qa lete pada ne, pero na eklesia.

¹⁴ Era to qa kenaqa ne qira go vano voru qimu kameka varitora me mana qimu lete va mazale lotu mana vatovato bana ria vano kazigarata ro remu vano Jiu go.

¹⁵ Do loborona Mana ia God, ia i vine banava era torana qara koego sopa na kanae. I koru ava tuna zazu ne ia, mana ṉalu i lama doka to ṉalu itaru bana ze go nanao na,

¹⁶ i vasadaka nava Sale ia, go era tuna tarama ne go Tarama Velaka ia de iri koego vano iriki Jiu go kaega. Zazu era dena qaki taqi ze kaega kaki basoe go tina vatatanava go,

¹⁷ mana qaki za mia qira kaega apostolo kenaqa ro iri koego Jerusalema go, do era qa kenaqa za Arabia mana reqe nae qa ule za Damaskus.

¹⁸ Taramuzina kapisa ave, qa ule za Jerusalema qa za seko tabe Pita, mana torana karua vuiki qa kotavise iago.

¹⁹ Do ria kero ne apostoloro qaki mia qira kaega, tanuna so Jemisi kaena Batu ne qa mia go.

²⁰ Pata qa karo go i ogoto. God i rove era qaki poqe kaega.

²¹ Taramuzina nae qa zae kavia kena ro tepa Siria mana Silisia.

²² Torana nae vano lotu na Judia iri ara kaebo rove ava era.

²³ Ria iri gata so pataro iri sine ne qira go basoero ne sauqu era. Iri go, “Valeke dena to iva vokara qita go ita, do ninidena i tarama ne vaogoto ni vasasakata nego kokosona ne!”

²⁴ Iago ria iri vazaka to God, tanego sauna to pata ni zazu navae go era.