Pilipae 4 - Vato Vari Vakameka Voru Ia Batu Ne

Ko Vanadu Mana Kameka Zazu

¹ Iago turaquroe, era qa soko qamu mana qa lete nanao qamu, gerena, de go qamu vakula va era, mana vazakanapu era sauqamu ramu, iago turaquro era qa nanao ramu muna degere vanadu loborona too ramu de ikoego Batu ne.

² Raburu karua qole Euodia mana Sinitiki, era qa pene va moqere qaburu aburuna vakameka ne nanao raburu, gerena kameka tamakena de ikoego Batu ne.

³ Mana aro napu vakitaka era, qa soko ono tavisi ne qiru karua qole dena, tanego riru dena iru tavisi velaka nava era sauna tarama ne na tarama velake ne. Kelementi mana kero ne napu vakitaka ro iri tavisi nava era, ria dena vitoṉo qira i karo banae buka na too ia God.

Kula Mana Bule Ia God

⁴ Muna kula osina ṉalu de ikoe Batu ne, era qa sine napua, muna ko kula.

⁵ Vasadake too varinanao, de iri koego basoero ne, Batu ne tiniki umata kaega tina lama go.

⁶ Kasi nanao vokara ne kaki pata, do loborona pepene ramu, pene ze God pata qamu lete soko go. Osina ṉalu qamu pepene go, muna seko velaka ne ia loborona puṉuqamu.

⁷ Mana bule ia God i lete laqalaqa ne go nanao rove ita vano basoe, tina vanadua puṉuqamu mana nanaoqamu, loborona vari vakamekae de ikoego Jesu Kristo.

⁸ Valupolupo na turaquroe, vapuraka ze nanao qamu pataro ni velaka go, mana i tora go tatana kula ne, pataro i ogoto, pataro tina vatabo go basoe, too totoloṉo, too dalo, lete meno, mana too va mazale na basoe go.

⁹ Muna vazazua pataro qamu rove go, mana qamu pala vakava ve era, seko ro era mana zazu ro era go. Mana God na teke ne qita go bule ia tina ko tavisi qita osina ṉalu.

Pol Iseko Velaka Ne Qira Vano Pilipae Sauna Sosovolomo Ro Ria

¹⁰ Loborona too era, loborona vari vakameka ia Batu ne, i lete vakula va, i lete umata sasakata to qaki pala kaega ka pata de qamu koego ramu. Do ninidena i malumu to ramu muna vasadaka me nanao ramu de qa koego era. Qaki nanao vane kaega ramu qamu mamanava nanao ava era, do iki zari kaega ka zuka, go tamuna vasadaka me nanao ramu.

¹¹ Mana qaki sine vane kaega, ramu qamu nanao vana nava, go qaki pala kaega ka vari va tatavisi de qamu koego ramu, do qa nanao rove bana de igogo, era qa kula neso pata qa pala go.

¹² Qa rove de igogo vari va nanama mana pala va sivale na pata ni tora go too era. Era qa rove bana pata pipika dena i koe de qa koe go era, go ia topu na ṉalu, topu dia era qa kula so, ṉalu qa kuma ba saqo. Ṉalu qa lete pala va topua, ba qa pala so desuka pata.

¹³ I konava karaputa go tuna vatabali zego osina too ro dena, loborona moqere iteke nava go Kristo.

¹⁴ Do i lete velaka sivala, ramu tamuna tavisi nava era, loborona makuru ro era.

¹⁵ Ramu basoero na Pilipae qamu lete rove velaka bana so ṉalu qa kasi ne era Masedonia, tupi me tarama qa vae ne Tarama Velaka ne. Mana ramu to qaniu vano lotu qamu tavisi nava go era, tanuqamu to ramu, qamu kena tavise go papala era mana vavana ro era.

¹⁶ Soko qa vae ne go era tavisi ko qa vae go Tesalonika, iki kameka ṉalu so kaega, ramu qamu valama nava era tavisi ramu.

¹⁷ Mana ia dena, iki go kaega era qa soko go ma pala sosovolomo ramu, do qa soko miana papala vatopu ramu, mara topu de iara ko mego.

¹⁸ Ia dena to seko velaka era sauna osina pata qamu teke nava go, mana i lete sivala ne topu na pata qa soko go. Osina pata qa soko go, era qa pala to ṉalu Epaparoditus i valama nava go era sosovolomo ro ramu. Sosovolomo ro ramu i nonoli meno, qamu soso zaqe de koe God, tavatavara i toqe ne mana i vakula go God.

¹⁹ Mana sauna topu na pata vavagado ia iva goe ze Jesu Kristo. God era tinara sosone qamu topu na pata qamu soko go.

²⁰ De koe God ita mana Tamaqita, karaputa mazala ia iko osina ṉalu mana ka ṉalu gado kutona i kaega. Amen.

Valupolupona Seko Kula

²¹ Seko velaka sivala de qamu koego ramu basoero ia God, qamu ke iago Jesu Kristo. Vakitaka ro ita iri ko tavisi ve era dena, iri vagaretua seko kula ria de qamu koego ramu

²² do lavata na seko dena ireqe me de iri koego vano iri zazu ego pade ia Siza.

²³ Mana, ia Batu ita Jesu Kristo mara ko tavisi qamu osiqamu.