Pilimon 1 - Vato Vari Vakameka Voru Ia Batu Ne

¹ Era Pol qa koe loborona bara ne, tanego qa basoe zazu ia Jesu Kristo. Mana vakitaka ita Timoti qaru karo vagaretua leta dena, de qo koego aro vakitaka raru Pilimon qata kameka zazu go,

² mana vano lotu qamu teṉo ego pade aro, mana vavaniqita Apia mana Akipusi valeke zazu, iru zazu vokara loborona zazu riru, gere qaru so raru.

³ Go God Tamaqita mana Batu ita Jesu Kristo mara teke nigo Mana mana bule ia.

Mamaligara Mana Vaogoto Ia Pilimon

⁴ Vakitaka era Pilimon, osina ṉalu qa pene, qa nanaotaru go mana qa seko velake God era.

⁵ Tanego era qa gata de go mamaligara aro de iri koego basoero ia God, mana dego vaogoto aro de ikoego Batu ita Jesu.

⁶ Pene era ne, loborona varikitaki ita vano qata vaogoto go, tina valame dego qata mazala nanao rove na osina pata velaka, qata pala ze go loborona too ita, loborona vari vakameka ita de ikoego Kristo.

⁷ Mamaligara aro, vakitaka era, i vakaraputa va mana i teke nava kula go! Aro qo va kula puṉu qira osiqira basoero ia God.

Pol I Pene Pilimon Mara Nanao Ule Ne Onisimusi

⁸ Igo nae iago, era vakitaka aro loborona Kristo, qaki sareki ne kaega vagaretu na seko vakaraputa era, go tuna tamana nigo aro sauna pata tono zazu ne.

⁹ Do tanego era qa lete mamaligara nigo, qa pene go aro. Era Pol qa sine vasadake seko ia Kristo tane qa pene go aro, mana torana ninidena, era qa koe bara ne tanego qa vaogote Jesu.

¹⁰ Iago era qa pene go aro, sauna Onisimusi, ia i sale ogoto era loborona de koe Kristo; torana ko qa vae bara ne qa vatatana ze ia vaogoto na Kristo, iago Onisimusi i gere to sale era.

¹¹ De bana ne i kaega so kaki pata mazala i tavisi goe aro, do ninidena i mazala to tavisi ne qituru ituru.

¹² Iago era qa turi vaule zatu e deqo koego ninidena, mana qa lete mamaligara ne iago.

¹³ Era qa soko Onisimusi, tina ko tavisi ava, go tina mazala degere nigo aro, go tina tavisi nava era, ko qa vae go bara dena, tanego sauna Tarama Velaka ne.

¹⁴ Do sauna pata nae, era qaki vatutubo goe kaega aro tono tavisi nava, do, era qa suko ono zazu ne ṉalu ina kaega nigo ka riqo, iago era tuniki zazu ne so kaega kaki pata, ṉalu qoki toqe go kaega aro.

¹⁵ Kadego Onisimusi iki kasi vaumata nigo kaega bago, go ia tono pala vaule go tinara koe de go koego aro osina ṉalu.

¹⁶ Mana ninidena Onisimusi iki valeke seka aro so kaega, do i lete lavata sivala ne basoe lotu, ia i basoe lotu i vakitake Kristo go. Era qa lete soko ia, do qa nanao soko aro tina sivala ne soko era, tanego Onisimusi i kaki valeke zazu aro mana qaburu tamakenae de ikoego Batu ne.

¹⁷ Iago ṉalu qo nanao ava era qaturu kameka zazu go, vakeba ze ia pade aro mana miasoka velake ia, gere so de tono go nava era ṉalu tuna garetu go.

¹⁸ Ṉalu go i zazu ne kaki pata kebu, ba i pala bana zigoe kaki patapata aro gogo ne, ono taru zaqe lepulepu era.

¹⁹ Dena qa karo ze karisiqu tanuqu. Era Pol tuna lepua go osina lepulepu ia Onisimusi. Iki tora kaega tuna sine vasadaka nigo aro, tanego lepulepu aro i koe deqa koego era, sauna too voru aro de ikoego Kristo.

²⁰ Iago vakitaka era, Ono zazu nava era pata dena, tanego i sauna Batu ne, qaturu vakitaka e loborona Kristo, go tina va kula va era.

²¹ Qa vaogote ṉalu qa karo zatu go leta dena, tanego qa rove aro tono zazu ne pata qa pene zatu go era. Mana qa rove napua aro tono zazu ne pata velaka napu, tina sivala ne seko ro qa sine zatu go era.

²² Aria ono vanama nava era kaki kova go, tanego qa vaogote God tina vataule me pene ro ramu, go era tuna ule napu atu de qamu koego ramu go.

Seko Valupolupa Na

²³ Epaparasi, ia qaru koe bara ninidena, tanego i vaogote Jesu Kristo, i vagaretua seko kula ia,

²⁴ ria qi kameka zazu go Maka, Aristakus, Demas mana Luka go iri vagaretu napua seko kula ria go.

²⁵ Mana ia Batu ita Jesu Kristo mara ko tavisi qamu osiqamu.