Matiu 4 - Vato Vari Vakameka Voru Ia Batu Ne

Satana I Pada Ne Jesu

¹ Spirit tabo i kenaqa ne Jesu i vazao ze de i kaega pata podopodo lavata naro, go Satana tina padane ia.

² Jesu i qaniqani torana vasiṉaulu musaqara mana vasiṉaulu kuse, taramuzina nae i lete saqo.

³ Gonae Satana i lama pada ne Jesu, i sine ne, “Ṉalu aro qo Tuna God, mo sine ne qira i pakaro dena mara kavala go mara bureri.”

⁴ Do Jesu igo, “Buka tabo i sine, ‘Basoe iki too neso kaega miki bureri do, vaogotena seko i reqeme de koe God.’ ”

⁵ Satana go nae i lulu vazao ze Jesu Jerusalema komala tabo ne mana i za vadegere ze Jesu zakazaka sivala na padelotu ne mana i sine ne,

⁶ “Ṉalu go qo Tuna God, ono soru za, tanego Buka tabo i sine, ‘God tina vamiasoka zigoe aro aqeloro ia, mana ria tarina palataru go aro niki go zavae nigo makemu ipaka ne.’ ”

⁷ Jesu i sine ne Satana, “Buka tabo i sine, ‘Oniki padane God Batu aro.’ ”

⁸ Gonae Satana i lulu vazao napu ze Jesu kubolo i lete zakazaka sivala go. Satana iva mia ze Jesu osina kolabana pua mana pata velaka ro iri koego.

⁹ Satana igo, “Era nara teke lupo nigo aro osina pataro dena, ṉalu go qo koloku tutuṉu mana vabatu ava era.”

¹⁰ Do Jesu i sine ne ia, “Kasi ne de qa koe go era, aro Satana! Tanego Buka tabo i sine, ‘Ono vabatua God Batu aro, mana ono osaka neso tanuna God.’ ”

¹¹ Gonae Satana i kasine Jesu, mana aqeloro iri lama tavise Jesu.

Jesu I Va Tupi Ze Zazu Ia Tepa Qalili

¹² Ṉalu Jesu i gata iri taru ze bara ne Jon, gonae i ule napu za kena Qalili.

¹³ Jesu iki zako e kaega Nazaret do iza koe Kapanaum, kakia komala ikoe rikisina masi Qalili loborona kena Zebelon mana Napatali.

¹⁴ I zazu ne ia dena go tina vavoto go seko i sine bana go propeta Isaia,

¹⁵ “Pua na Zebelon mana pua na Napatali, zuka i lulu za tepa masi, kedo tepa Jodan, Qalili pua iri koe vano iriki Jiu go kaega.

¹⁶ Ria basoero iri koe loborona rodoko tarinara mia tatavata lavata. Ria iri koe loborona pua rodoko iri koe go vano iri le go, tatavata tinara damare de iri koego.”

¹⁷ Torana ṉalu nae Jesu iva tupiana ne tamana qira basoero, “Muna manava sakata ne vasakata pataro ramu, tanego vari miasoka ia God i lama garogaro.”

Jesu I Koru Qira Kavasi Disipoloro Kenaqa Ia

¹⁸ Jesu i lama zazae rikisi masi Qalili i mia qiru karua tamakena Saimon kakia vitoṉona, Pita mana kaena vitoṉo na Aduru. Iru za gabe masi Qalili, tanego zazu riru vae iṉana so.

¹⁹ Jesu i sine ne qiru, “Luluava era, era nara varove qaburu e dego palana basoe.”

²⁰ Goto nae Pita mana Aduru iru tarua gabe riru mana iru lulua Jesu.

²¹ Jesu i kasine dego i mia napu qiru kaki karua tamakena, Jemisi mana Jon karua sale ia Zebedi. Iru koe loborona koluka, iru mia tamaqiru Zebedi iri kona gabe ria, mana Jesu i koru napu qiru.

²² Gonae iru kasine koluka ne mana tamaqiru, iru lulua to Jesu.

Jesu I Vari Vatatana Mana Iva Velaka Qira Basoero Iri Mokoso Go

²³ Jesu igoe lupoe osina dia tepa kena Qalili. Iza e loborona Pade Lotu ria vano Jiu i vari vatatana mana i tamana qira basoero ne. I tamana qirae dego velaka ia God mana iva velaka lupo qira osiqira vano i pala qira soso mokoso rone.

²⁴ Pepeuna dego Jesu i lupoe osina vudu na Siria. Ria ivae qira go pata vokara mana i pala qira soso mokoso ro, ria i siqane qira manuru sakata, ria ivae qira kakaepale mana ria i makuru vizu tokamaqira gogone iri valama qirae so dekoe Jesu mana iva velaka lupo qira.

²⁵ Topu sasakata basoero iri muzi ne go Jesu, iri reqe me Qalili, Dekapolis, Jerusalema, Judia mana kaki tepa Jordan.