Matiu 3 - Vato Vari Vakameka Voru Ia Batu Ne

Jon Na Bapitema I Tamana

¹ Torana ṉalu nae Jon na bapitema i lamae de iki koe kaega pata podopodo lavata ro ne mana ivatupia tamana qira basoero ne.

² Igo, “Manava sakata mana kavale vatovato sakata ro ramu, tanego de ikoego vari miasoka ia God i lama garogaro!”

³ I sauna to Jon tane propeta Isaia i seko ne igo, “Kaki basoe i koru me de iki koego kaega pata podopodo lavata ro igo, ‘Muna vanama ne zuka ia Batu ne, vatotoloṉe zuka tina lulua go.’ ”

⁴ Jon i va roku ne poga iri zazu ne ze uguruna kamolo, mana iva beloto ne kapotona buluka go. Pataro ige go ne, nopi mana biuma ikoego sasaniga go.

⁵ Ria basoero iri zamia go Jon, iri reqe me Jerusalema mana osina dia loborona kena Judia, mana basoero iri ko garogaro go uguru Jodan go.

⁶ Iri sine vasadake vasakata pata ro ria mana Jon i bapitema qirae uguru Jodan.

⁷ Ṉalu Jon i mia topu qira ria vano Parisio mana vano Sadusi iri lama go mara ria bapitema iri go, ia i vane qira dena, “Ramu qamu gere dole, akena i sine qamu tamuna mazala go paqa nena muma ia God i garogaro go valame na?

⁸ Muna zazu ne pataro go i mazala vasadake na, go ramu qamu manava sakata ne vasakata pataro ramu.

⁹ Muniki vapala zeso sine na ramu tamaqamu Abra-am, iago God ki mazala kaega vakimata qemu, ma sine ne qamu, God i mazala so palana ipakaro dena mana zazu vatopu zego salero ia Abra-am.

¹⁰ Pariko na qeto zego moki ro i nama bana to, osina moki iki ure velaka kaega tina qetomana vanaqe nako ne.

¹¹ Era qa bapitema qamue ramu besi go tina vasadake ramu qamu manava sakata ne vasakata pataro ramu. Do valeke tinara lama taramuziqu era i lete karaputa sivala nava era. Patavolomo makebotu ia do era ki torava kaega tuna pala ne go. Ia tina bapitema qamue ramu Spirit tabo mana nako.

¹² I palatarua pata solasola ia, go nava kuziki ne de sakatana ro vuiti ne, tina pala vuiti ne mana za taruze pade tarutaru vuiti ne. Do de sakata naro ne tina pala mana subi zaqe nako iki rove go kaega le.”

Jon I Bapitema Jesu

¹³ Ṉalu nae Jesu i reqeme tepa Qalili mana izae uguru Jordan i zamia Jon go tina bapitema go.

¹⁴ Jon i padane kadego mara kavale nanao na Jesu igo. I sine ne Jesu, “Aro tana i tora go tono bapitema va go era, iki torava kaega era tuna bapitema go aro.”

¹⁵ Do Jesu i sine ne Jon, “Ninidena mara goto dena. I tora tatana valuluze de i soko go God.” Pasi to nae, Jon iara mao go.

¹⁶ Taramuzina i bapitema lupo, Jesu i vosoro me, mana rani i papaqa ne ia, mana i mia Spirit ia God iza qoqoro me igere kurukuru i lamae dekoe Jesu.

¹⁷ Mana kakia seko i reqeme tepa rani ne igo, “Iadena to Sale valeke era qa lete mamaligara ne, mana qa lete kula ne go.”