Matiu 27 - Vato Vari Vakameka Voru Ia Batu Ne

Iri Lulu Vazao Ze Jesu De Ikoego Pilato

¹ I sarusaruku lolotoro ia osiqira batu ria patere ro, mana vano kazigarata ro, iri vatovato mana vanadua Jesu tina le bana so.

² Iri qolo karua karisina Jesu, mana iri lulu vazao ze ia de i koego Pilato, iato i qauna ego kena igogo ne.

Jiudas I Vae Vale Tanuna

³ Ṉalu Jiudas ni va besa nego Jesu i rove iri vele vae vale Jesu, i kavale nanao na, mana i pala vaule za pisaṉaulu dia kesa ne, de iri koego batu ria patere ro mana vano kazigarata rone go.

⁴ I za sine, “Era qa lete kebu, valeke qa va besa ne qamu go, i valeke totoloṉo, i kaega kapata ni vasakate go.” Do batubatu ro ne iri vataule ne, “Ianae iki riqo reremu kaega i riqo aro so tanumu.”

⁵ Jiudas pasi i gata seko nae, i vana ze kesa ne loborona Pade Lotu ne, i za mana i suqi vale tanuna go.

⁶ Batu ria patere ro iri soqe kesa ne, mana iri go, “Tamana ita iki vamao kaega tatana pala kesa dena mana taru palu zaqe kesa na Pade Lotu ne, tanego kesa dena qata voli ze parasa too na basoe.”

⁷ Iago iri varitoqe ne, iri pala kesa ne mana voli ze pua, pua dena, i de vari vou ria vano iriki Jiu go kaega, ba vano na vudu kakavata go.

⁸ Iato go tokoboro pua nae ninidena iri vitoṉo ze, ‘Pua parasa.’

⁹ Mana seko i sine go propeta Jeremaia i lama sadaka ogoto, igo, “Iri pala pisaṉaulu dia kesa siliva, torana to kesa nae vano Jiu iri voli zego too ia basoe.

¹⁰ Gonae iri pala napua kesa nae, mana voli napu ze pua ia valeke i za zazu sereke pua. Pataro dena i voto so pataro i sine nava go era God.”

Pilato I Tana Ne Jesu

¹¹ Iri lulua Jesu mana va degere ze tarakenaqana Pilato, gonae Pilato i tana ne ia, “Avigo aro to qo batu lavata ria vano Jiu ba?” Jesu i vataule ne ia, “Iato qo sine go nae.”

¹² Batu ria patere ro mana vano kakazigarata ro iri vapala ze ia topuna pata, do Jesu i duduli so.

¹³ Iago Pilato i sine ne Jesu, “Aro qo gata, topu to pata basoero dena iri va pala zigoe, avigo qoki vaule ne qira go kaega?”

¹⁴ Do Jesu iki sine so kaega kapata, iago Pilato ilete poloso.

Pilato I Toqe Ne Vae Vale Na Jesu

¹⁵ Osina ṉalu kelo na Pasova, Pilato tina vasiporo banaso kameka basoe ikoego bara ne, ke iri soko go basoero ne.

¹⁶ Torana ṉalu nae, kameka valeke ikoego bara ne, vitoṉona Gesu Barabasi mana topu sasakata basoero iri rove ia.

¹⁷ Basoero ne iri lama teṉo e tarakenaqana pade ia Pilato, gonae Pilato i tana ne qira, “Adeke tane qamu soko go ramu tuna vasiporo ne qamu? Jesu Barabasi ba Jesu Mesia ne?”

¹⁸ Pilato i rove basoero ne iri valame ze Jesu de ikoego tanego iri qora ne.

¹⁹ Torana nae Pilato i kolokue pade vivine ia, gonae qole ia i valame seko ne ia, igo, “Ke qa pene go oniki zazu ne kaki pata de ikoego valeke nae, tanego i valeke totoloṉo. Tanego kuse ne qa kukureka ia mana qaki kamuku velaka neto kaega go.”

²⁰ Do batu ria patere ro mana vano kazigarata ro iri vatutubo qirae basoero ne, go tarina pene Pilato mara va sipore Barabasi mana mara vae vale Jesu iri go.

²¹ Pilato gonae i tana ne qira basoero ne, “Adeke riru karua basoe dena qamu soko go nava sipore go era na?” Basoero ne iri vataule, “Barabasi!”

²² Pilato i tana napu, “Do ava tuna vane era, Jesu ni Mesia go?” Osiqira basoero ne iri go, “Paqipaqi ze ia koluse ne.”

²³ Gonae Pilato i tana napu ne qira, “Ava na to kapata sakata i zazu nego valeke dena?” Do basoero ne iri lete koru valavata me iri go, “Paqipaqi ze ia koluse ne!”

²⁴ Pilato imia imakuru to kavala na nanaoqira basoero dena, do kadigo pera lavata mana varitara tina sadaka go, iago i pala disi besi mana i saboro ze karisina tarakenaqa qira basoero ne mana i sine, “Le na valeke dena, iki riqo era kaega, tanuqamu to qamu rove go talupasa na!”

²⁵ Osiqira to basoero ne iri vataule, “I velaka so, le na valeke nae i riqo reremu mana salesale ro remu go.”

²⁶ Goto nae Pilato i vasipore Barabasi, mana i sine ne qira soldia ro tarina sima Jesu, taramuzina i teke ne qira, go tarina paqipaqi ze ia koluse ne.

Vano Soldia Ro Iri Vakari Ne Jesu

²⁷ Goto nae soldia ro ia Pilato iri lulu va keba zaqe Jesu pade ia qauna ne, mana topu ria kero ne soldia ro ne iri ko liqute ia go.

²⁸ Gonae iri ozuke roku ro ia mana iri varoku ze ia roku mesara loda.

²⁹ Mana iri vari pipisi ne kaki qolo ipaqopaqo go, iri vatopatopa ze kuzukuna go, iri va pala taru napu ze moki karisi matauna go. Gonae iri koloku tutuṉue tarakenaqana ia, mana iri ara va kari ne ia, iri go, “Aro to qo batu lavata ria vano Jiu!”

³⁰ Vano soldia ro iri sue lapa ia, iri pala moki ne mana iri vae ze kuzukuna go.

³¹ Iri vakari lupo neto ia, iri opisi vakuziki ne roku merasa loda ne, mana iri va roku napu ze ia roku bana ro ia. Gonae iri lulu ia go tarina za paqipaqi ze ia koluse ne.

Iri Paqipaqi Ze Jesu Koluse Ne

³² Ṉalu iri siporo za, iri za soba kameka valeke na Saerina vitoṉona Saimon. Soldia ro iri vatutubo ze ia vagorena koluse ia Jesu.

³³ Iri lama dokae to de iri vitoṉo ze Qolqota, talupasana, “Kovila na kuzuku.”

³⁴ Iri teke ne ia vino iri lomiri ze marisina pani, do ṉalu Jesu i ge pada i gagaemana sakata go iki besia kaega.

³⁵ Ṉalu iri paqipaqi lupo ze koluse ne Jesu, iri kenakena poga ia mana iri qiso daisi ne go.

³⁶ Gonae iri koloku mana reṉa taru ne zaqe ia.

³⁷ Pilato i karo kameka seko, iato iri vakutama ze go, go iri vae vale go ia, i taru ze popokona koluse ne seko ne, igo, “Iato dena Jesu, batu lavata ria vano Jiu.”

³⁸ Gonae iri paqipaqi napu qirue koluse, karua valeke sikosiko kameka ikoe tepa matauna mana kameka i koe tepa gede na go.

³⁹ Basoero iri zuka sivala ego zuka ne, iri seko sakate ia, mana iri vivinuquru go,

⁴⁰ iri go, “Tanumu tono pabale Pade Lotu ne, mana vadegere lupo torana so kapisa musaqara qo go, aria to aro, ṉalu go qo Tuna God, siporo kasi neme koluse nae aro!”

⁴¹ Ria batu ro ria patere ro, vano vari vatatana na Tamana mana vano kazigarata do iri vakari napu neso iago.

⁴² Iri go, “Iva kavele qira basoero ne, do tanuna i makuru go vakavele go? Ṉalu go i batu lavata ria vano Izirel ia tara siporo kasi ne me koluse ne, go ita qata mazala vaogote na ia!

⁴³ I vaogote God, mana igo tanuna i Tuna God, mata mia ṉalu go God i soko vakavele na ia, ia mara zazu neto ninidena!”

⁴⁴ Karua basoe sikosiko iri paqipaqi tavisi go koluse ne, do iru seko sakata napua so ia.

Jesu I Le

⁴⁵ I doka to kikinaka torana manoga karua koloko, osina dia vudu ne i rodoko lupo, umata na ne torana kapisa aoa.

⁴⁶ Torana ivele kapisa koloko, Jesu i koru valavata igo, “Eli, Eli, lama sabatani?” Talupasana igo, “God erae, God erae, avigo tane qo vana nava go?”

⁴⁷ Kakiaro basoero iri degere go de gogo ne, iri gata Jesu i koru, iri go, “I korua Ilaiza.”

⁴⁸ Kaki kameka ria basoero ne i teteṉe za, i pala kaki pata tarutaru besi, mana i za va boma ze vino pani, i soma ze moki mana i pada ne vabesi zaqe Jesu.

⁴⁹ Do kero ne iri go, “Piri, mata mia Ilaiza tina lama vakavele ia.”

⁵⁰ Jesu i koru valavata mana i le to.

⁵¹ Torana so nae, poga lavata i idoke go Pade Lotu ne, i taridaka reqe zakazaka ne doka so sokasoka na ne. Nunu lavata ivizu mana i paose ipaka ro go,

⁵² kukubo ro iri paqapaqa lupo mana topu ria basoero ia God iri le bana go, iri too ule napu me tepa le ne.

⁵³ Iri kasi ne kukubo ne, mana ṉalu Jesu i too ule me tepa le ne, basoero nae iri zae Jerusalema, mana topu ria basoero iri miasoba qira,

⁵⁴ batu ria vano varitara mana soldia ro iago iri mia tarua go Jesu, iri mia go nunu ne mana pataro i sadaka go, iri lete sareki mana iri go, “Valeke dena i Tuna ogoto bana to God!”

⁵⁵ Topu napu ria qolero, iri ko valaqalaqa meso mana iri mia me pataro i doka go Jesu, qolero dena ria to iri lulu ne Jesu pasi me Qalili, mana iri tavisi ne iago.

⁵⁶ Kakiaro ria qolero ne, Maria Madalena, Maria sinana Jemisi mana Josepo mana qole ia Zebedi go.

Josepo Na Arematia I Voua Jesu

⁵⁷ I raravi to ia, kameka valeke vavagado na Arematia i lama doka vitona Josepo, ia i vaogoto napua so Jesu.

⁵⁸ I zae de ikoego Pilato mana i pene tokama Jesu. Pilato gonae i sine ne qira vano soldia ro ne, tarina teke Josepo, tokama sinarana Jesu.

⁵⁹ Iago Josepo i pala tokamana Jesu, mana i kade ze ia poga kakasa voru,

⁶⁰ mana i za va kekele ze ia leṉa ipaka voru ia tanuna Josepo. Gonae i ikole kameka ipaka lavata mana i kokoqu zaqe siporaṉa na lena ne mana i zaza.

⁶¹ Maria Madalena mana kene Maria iru koloku garogaro mana tabali zaso leṉa iri vou zaqe go Jesu.

Vano Soldia Ro Iri Miasoka Lena Ne

⁶² I musaqara vanamanama na musaqara Sabat, iago bakubaku na ne batu ria patere ro mana vano Parisio iri zae de ikoego Pilato,

⁶³ mana iri sine ne ia, “Remu qi nanao tarua so seko i sine bana go valeke poqepoqe dena igo, ‘Taramuzina kapisa musaqara era tuna too ule napu me tepa le ne.’

⁶⁴ Iago, sine ne qira vano soldia ro aro mara za ko mana miasoka leṉa ne go naza doka so vapisana musaqara, tina go nae, go tina makuru qira go disipoloro ia za siko na tokamana Jesu, mana sine ne qira basoero ne Jesu i too napu me tepa le ne. Poqe nae to tina lete sivala ne poqe iara lupo za go ne,” iri go.

⁶⁵ Pilato i sine ne qira, “Qamu mazala pala qira soldia ro mana za va miasoka qirae leṉa ne, lulua nanao qamu go tina nadu go.”

⁶⁶ Iago iri zae leṉa ne, iri za vanadu velake kokoquna mana iri taru ze lala go kaega ka basoe tina paqapaqa go leṉa ne, mana iri vamiasoka qirae vano soldia ro go.