Matiu 25 - Vato Vari Vakameka Voru Ia Batu Ne

Vapadapada Qira Manoga Qolero

¹ Gonae Jesu i sine, “Too ikoego vari miasoka ia God i gere manoga qole iri pala za pazi ria, mana iri za go mara ria soba valeke i vavanama nego busi ne.

² Taralima ria iri bulaṉoi and taralima ria iri tarove go.

³ Taralima iri bulaṉoi go, iri pala pazi ria, do iriki pala vasivale kaega tala na pazi ria.

⁴ Do ria taralima iri tarove go iri pala pazi ria, mana botolo na tala na pazi ria go.

⁵ Valeke i vanama nego busi ne iki lama katikili kaega, iago manoga qole ne iri piri gogo iri totoda mana iri kamuku go.

⁶ I dokae to loboro kuse, kaki basoe ikoru me igo, ‘Valeke i vanama nego busi iato de, lama go muna soba ial’

⁷ Ria manoga qolero ne iri dogara mana iri valavate pazi ro ria.

⁸ Do ria kalima qole iri bulaṉoi go, iri sine ne qira kalima qole tarove ne, ‘Teke ne qemu remu kadia tala ramu, tanego pazi remu i vele lupo to.’

⁹ Do ria taralima ne iri go, ‘Kaega tala dena tiniki tora qita kaega, zae de iri volivoli ze go tala ne, mana za volia kadia go,’ iri vane qira.

¹⁰ Iago kalima qolero bulaṉoi ne iri za volia to tala ria. Torana to iri zaza go ria, valeke i vanama nego busi ne i lama doka. Ria kalima qole ro tarove ne, iri za soba ia mana iri lulua ia go, iri keba za pade tarina teṉoe go sauna vari vabusi ne, mana siporaṉa ne iri kokoquato go.

¹¹ Taramuzina to nae, ria kene taralima ne iri lama doka to, ‘Batu, batu! va keba qemu!’ iri go.

¹² Do valeke i vanama ne go busi, ne i vataule ne qira, igo, ‘Pataogoto, era qaki rove qamu kaega.’ ”

¹³ Valupolupo na Jesu igo, “Muna miasoka, tanego qamuki rove kaega ka musaqara na mana ka torana ṉalu era Tuna basoe tuna ule mego.”

Vapadapada Qira Kapisa Basoe Zazu

¹⁴ Jesu i sine napua, “Too ikoego vari miasoka ia God i gere ṉalu kameka valeke batu i vanama ne zae na kaki vudu, gonae i koru qira vano zazu ia mana i teke ne qira patapata ro ia go tarina miasoka go.

¹⁵ I teke ne qira kesa, i valulu ze lulua so mazala ia basoe ne, kakia i teke ne lima mao kesa kakia i teke ne karua mao kesa, mana kakia i teke ne kameka mao go. Goto nae ia zaza to igo valeke ne.

¹⁶ Valeke zazu i pala go lima mao kesa ne i za mana vazazu velake kesa ne mana i pala napua kaki lima mao kesa go.

¹⁷ Ivari padana napu so valeke i pala go karua mao kesa ne, ia i pala napua kaki karua mao kesa.

¹⁸ Do valeke zazu i pala go kameka mao kesa ne, i za sola bolu e pua ne mana i pika ze kesa ia batu ia.

¹⁹ Iumata qe to ia, valeke batu ne i gado ule me, i tana ne qira vano zazu ia, ava qamu vane to kesa era qa teke ne qamu go.

²⁰ Valeke zazu i pala go lima mao kesa ne i keba me, mana i soso napu ne kaki lima mao kesa napu, mana igo, ‘Batu, kokosona aro qo teke nava so lima mao kesa, do qo mia! Era qava ure napua kaki lima mao kesa napu!’

²¹ Batu ia igo, ‘Velaka sivala, aro qo valeke zazu velaka, qo miasoka velake zazu suka dena, iago tuna va miasoka zigoe topuna pataro, lama mana kula tavisi ava era go!’

²² Gonae valeke zazu i pala go karua mao kesa ne, i keba me, mana igo ‘Batu! Kokosona aro qo teke nava so karua mao kesa, do mia me dena, kaki karua mao kesa napu, qa va ure go.’

²³ Batu ne igo, ‘Velaka sivala, aro qo valeke zazu velaka, qo miasoka velake zazu suka dena, iago tuna va miasoka zigoe topuna ro pata. Lama mana kula tavisi ava era go!’

²⁴ Valeke zazu i pala go kameka mao kesa ne i keba me mana igo, ‘Batu, era qa rove aro qo valeke makuru, qo pala ze pata gege na barue qoki zazue kaega, mana qo vae urena moki qoki leba go kaega.

²⁵ Iago era qa sareki nigo, qa za sola pua mana qa pika ze kesa aro, mia iato dena kesa aro.’

²⁶ Batu ia igo, ‘Qo valeke sakata, mana qo muaku go, aro qo rove bana so era qa pala patagege na barue qaki zazue go kaega, mana qa vae urena moki qaki leba go kaega.

²⁷ Avigo to za taru ze kesa era baṉa ne go ṉalu tu ule me tu vasipore go, mana pala palu ze desuka kesa napu go.

²⁸ Pala ze ia kesa i pala go nae mana teke ne ia i pala go manoga mao kesa ne.

²⁹ Ka basoe i vazazu velake pata iko nego, era tuna teke napu ne ia, mana tina lete topu ne go. Do ka basoe iki vazazu velake go kaega pata iko nego, patavolomo desuka pata i konego, era tuna pala vakuziki ne ze ia.

³⁰ Valeke zazu sakata dena ne, vanaqe zaqe ia pekapeka de i rodoko go, de go tina za dae mana vari kizakiza ne saqena.’ ”

Era Tuna Basoe Na Zazu Ne Vivine Musaqara Muzimuzi De Iri Koego Basoero Ne

³¹ Jesu i sine napua, “Ṉalu era Tuna basoe na lama Batu lavata go mana aqelo ro ne tarina luluava, tuna kolokue de ko batubatu era.

³² Osina basoero na kolabana pua ne, tarina lama teṉo e tarakenaqaqu era. Gonae tuna vota va karua kena qira basoero ne, gerena valeke miasoka sipi i vota qira go sipi mana naniqoti ia.

³³ Tuna taru qirae vano totoloṉo tepa matauqu mana kero ne tepa gede qu.

³⁴ Goto nae ia, tunara sine ne qira basoero iri koego tepa matauqu, ‘Ramu to qamu pala go makaolo ia Mamae, lama mana pala pataro ikoego Too ikoego vari miasoka ia God, ni vanama bana ne qamu go vazari i vae nego kolabana pua dena.

³⁵ Ṉalu era qa saqo, qamu teke nava patagege, qa kaṉaso qamu teke nava besi. Qa basoe zaza sivala, qamu koru va keba ve pade ramu,

³⁶ qa sisinaqa, qamu teke nava baribari, qa mokoso, qamu miasoka va, qa koe loborona bara ne, qamu garetu tove ava go.’

³⁷ Basoero totoloṉo ne tari tana nava era, tarina go, ‘Batu! Ava ṉalu tane qi mia go aro qo saqo mana qi teki go patagege, qo kaṉaso mana qi teki go besi?

³⁸ Ava ṉalu tane qi mia go qo zaza sivala mana qi koru va keba goe pade remu, qo sisinaqa mana qi va baribari go?

³⁹ Ava ṉalu tane qi mia go qo mokoso ba qo koe loborona bara ne, go qi garetu tove go na?’

⁴⁰ Era tuna vataule ne qira, ‘Masine ne qamu pata ogoto, ṉalu qamu zazu ne ze pataro dena, de ikoe kakia basoero era iri mimia volomo go, igerena so qamu zazu ne zeto deqa koego era go!’

⁴¹ Taramuzina tuna sine ne qira vano iri koego tepa gede qu, ‘God tina va kimata qamu, kasi nava era mana za koego nako iki rove go kaega le i vanama bana go God, ni keia Satana mana aqelo sakata ro iago.

⁴² Tanego ṉalu era qa saqo, qamuki teke nava kaega patagege, ṉalu qa kaṉoso qamuki teke nava kaega besi.

⁴³ Qa basoe zaza sivala, qamuki, koru vakeba ve kaega pade ramu, qa sisinaqa, do qamuki va baribari ava kaega, qa mokoso mana qa koe loborona bara ne, do qamuki garetu tove ava kaega.’

⁴⁴ Basoero ne tarina tana nava era, ‘Batu! Ava ṉalu tane qi mia go qo saqo go, qo kaṉoso ba qo basoe zaza sivala, ba qo sisinaqa, qo mokoso ba qo koego loborona bara ne, do qiki garetu tavisi nigo kaega na?’

⁴⁵ Era tuna vataule ne qira, ‘Masine ne qamu pata ogoto, ṉalu qamu kasi go tavisi ne qira basoero era iri mimia volomo gogo dena, i gere napuna so qamu kasi tavisi nava era.’

⁴⁶ Basoero dena tarina pala to kimata iki rove go kaega lupo, do ria basoero totoloṉo tarina zae de ikoego too iki rove go kaega lupo go.”